Ölkəmizin strateji əhəmiyyət kəsb edən sahələrindən biri də, BDYPİ və onun tabeçiliyindəki qurumlardır. Bu sahədə yaşanan problemlərin varlığı daim diqqəti cəlb etdiyindən, hələ bir neçə il bundan əvvəl ölkə rəhbərliyinin iştirakı ilə geniş tərkibdə müşavirə keçirildi və baş alıb gedən qanunsuzluqların aradan qaldırılması istiqamətində lazımi tapşırıqlar da verildi. Bütün bunlara baxmayaraq, bu gün də qayda-qanunu pozan, verilmiş tapşırıqlara məhəl belə qoymayan neçə-neçə yol polisi əməkdaşları var ki, onlardan biri də polis serjantı Ağayev soyadılı əməkdaşdır. Həmin əməkdaş, Binəqədi rayonu Xırdalan dairəsi adlanan ərazinin yaxınlığındakı “Ekologiya postu”nda çalışır.

Onun bir neçə gün bundan əvvəl, rayonun Sulu-Təpə qəsəbəsi, Ş.Əfəndizadə küçəsi ev-1a ünvanında yaşayan Qədirov Orxan Sahib oğlunun başına açdığı oyunları eşitdikcə, sanki dəhşətə gəldik. Şikayətçi redaksiyamıza ünvanladığı ərizəsində bildirir ki, “26 aprel 2015-ci il tarixdə həm qonşum, həm də dostum olan Elvin adlı şəxsə məxsus 07 markalı, dövlət nömrə nişanı 10-Sİ-894 olan avtomobildə, ailəmlə birlikdə Xırdalandan şəhərə qayıdırdım. Bu zaman Ağayev soyadlı YPX-nin əməkdaşı “saxla” əmrini verdi və bizə yaxınlaşaraq avtomobilə aid sənədləri istədi. Sənədləri ona təqdim edərkən, YPX–nin əməkdaşı o yana bu yana baxıb “bu maşının sığortasının vaxtı keçib” dedi. Dərhal avtomobilin sahibi Elvin maşından düşərək Ağayevə başa sala bildi ki, hələ sığortanın müddəti başa çatmayıb. Belə olan halda o, yeni bir bəhanənin axtarışına çıxaraq bildirdi, “bəs siz sağ zolaq xəttini tapdalamısınız”. Hansı ki, biz sağ zolaqla sağa dönmək üçün maşınların arxasınca gedirdik. YPX-nin əməkdaşı ilə bir qədər mübahisə etdikdən sonra o, bizi “post”a dəvət etdi və kompyuterdə maşına aid cərimənin olub-olmamasını dəqiqləşdirdi. Və çox keçmədən stolun üstündəki sənədləri mən tərəf itələyib, “bilirsiniz sizin bu qayda pozuntunuz 60 manat pulla və 3 balla qiymətləndirilir” dedi. Çox keçmədi ki, o, Elvinə “istəyirsinizsə 40 manat verin heç bir protokol-filan yazmayım” dedikdə, onunla mübahisə etməyə başladım və bildirdim ki, axı biz heç bir qayda pozuntusuna yol verməmişik. Bəs səbəb nədir ki, sən bizdən 40 manat pul tələb edirsən dedim. Mənim iradımdan sonra “yaxşı, heç olmasa 20 manat manat verin yazmayım” dedi. Elvin ona 10 manat təklif etdikdə, Ağayev həmin pula razı olmadığını bildirdi. Mən ondan hansı qayda pozuntusuna yol verdiyimizi təkrar soruşduqda, YPX-nin əməkdaşı üzümə baxıb protokol tərtib etdi və imza atmağımı bildirdi. Düzdür, mən yazılmış protokola

imza atdım, amma sonradan anladım ki, səhv etmişəm. Çünki, mənim sürücülük vəsiqəm olsa da, nəqliyyat vasitəsi olmadığından heç vaxt YPX-nin əməkdaşları ilə təmasda olmamışam. Elə bu səbəbdən də, protokola hansı hallarda imza atmaq olar, yaxud da olmaz olduğunu bilməmişəm”.

Bəli, Qədirov Orxan Sahib oğlu belə bir problemin varlığını ictimailəşdirməyə ona görə çalışır ki, qoy həqiqət hər kəsə bəlli olsun. Axı, YPX əməkdaşlarına hansı qanun, yaxud da hansı vəzifə sahibi ixtiyar verib ki, onlar çox zaman vətəndaşlarla “bazarlıq” açır, yeri gələndə “endirim kampaniyası”na da qol qoyurlar.