Ziya Məmmədov və müfəttişlərinin özbaşınalıqlarından
bezən sürücülər etirazlara hazırlaşır

Azərbaycan neft burulğanına oxşayır. Ölkə seçki ilinin ilk aylarından çalxalanır. Rezin güllələr işə düşüb, gözyaşardıcı qazlar havaya buraxılıb, atəş və inqilabın tappıltı səsləri eşidilir. Etirazlarda isə sosial tələblər siyasi şüarları əvəzləyəndə hakimiyyətlər lərzəyə gəlir, təşvişə düşür, həyəcan təbili çalmağa başlayır.
Azərbaycan hökuməti də bu tarixi təcrübəyə əsaslanıb “Binə” və İsmayıllı hadisələrində geniş miqyaslı repressiyalar həyata keçirməklə müvəqqəti sosial etirazların qarşısını ala bildi. Hələlik əyalətlərdə gözlənilən üsyanların yatızdırılması prosesi gedir. İqtidar xalqla hesablaşır, icra başçıları insanların ayağına gedir, şikayətlər dinlənilir - İsmayıllı təkrarlanmasın deyə.
Ancaq narazı kütlələrin ən qəzəbli təbəqəsi sürücülərdir ki, nəqliyyat naziri Ziya Məmmədov nəinki onları dinləmir, ümumiyyətlə saymır.
Nazirin özbaşınalıqları, müfəttişlərinin sürücülərə qan uddurması ölkədə böyük bir “sürücü qiyamı” yetişdirir. Üsyanlar olmayana qədər arxayın şəkildə hərəkət edən despotlar günün birində yüz minlərin onun üstünə gəldiyini görəndə reallıq hissini itirmiş olduqlarını görürlər. Nəqliyyat naziri də reallıq hissini itirmiş oliqarx-məmurlardan biridir.
Onun sürücülərə zülm etməsi, taksi və avtobus şoferlərini incitməsi “Binə” bazarının sahibi Kəbirə Məmmədovanın hərəkətlərini xatırladır. K.Məmmədova da sahibkarlardan qeyri-qanuni pullar yığdırır, yer haqlarını artırır, ticarətçiləri müflisləşdirirdi. Z.Məmmədov da sürücülərin “qəzəb günü”nə hazırlaşdırır. Nəqliyyat sistemində çalışan bütün sürücülər aksiyalar keçirmək barədə məsləhətləşmələr aparır. Marşrut avtobusları, “London taksiləri” və eləcə də fərdi taksilərin sürücüləri Nəqliyyat Nazirliyinin qarşısında mitinqlər keçirmək istəyir.
Yada salaq ki, “Eurovision” keçirilən ərəfədə paytaxtda sürücü etirazları baş qaldırmışdı. Sürücü tətilləri bir neçə gün davam etdi. İndi yenidən sürücülər arasında aksiyalar barədə müzakirələr gedir. Onlar gündəlik planın artırılmasından, nəqliyyat müfəttişlərinin özbaşınalıqlarından beziblər.
Əldə etdiyimiz son xəbərə görə, aksiyaları körükləyən qüvvələr olacaq. Nəqliyyat nazirini gözdən salmaq və Prezident Administrasiyasında nüfuzuna xələl yetirmək üçün aksiyalara dəstək veriləcək. Məqsəd şəhərdə bir neçə gün nazir əleyhinə aksiyalar keçirilməsinə nail olmaqdır.
Odur ki, fevral-mart aylarından birində sürücü tətillərinin şahidi olacağıq. Aksiyalarda “London taksiləri” sürücüləri və nazirlik tərəfindən bağlanmış marşrut xətlərində çalışan avtobus şoferləri daha çox iştirak edəcək.
Hakimiyyət daxilində etirazların səngiməməsi üçün çalışan qruplaşmalar var və tezliklə növbəti mitinqlərin NN önündə təşkil olunması planlaşdırılır. Üstəlik, nəqliyyat sektorunda işləyənlərin narazı olduğu hər kəsə məlumdur, onların şikayətləri haqlıdır. “Gündəm-xəbər”ə danışan bir qrup sürücü bəyan edir ki, hökumət aksiyalarda öz maraqlarını güdür:
“Həbslər aparır, ölkədəki gərginliyi yatırır, insanların gözünü qorxudur, mübarizənin səmərəsizliyini təbliğ edən nümunələr qoyur. Ancaq bu məqamlar əsas vermir ki, əl-qolumuzu sallayıb etirazlarımızı bildirməyək. Çünki seçki ilidir və tələblərimiz yerinə yetirilməsə bundan sonra daha çətin olacaq. Nazirlik istədiyi əmri verəcək və zərər çəkən tərəf sürücülər olacaq. Ona görə mitinqlərə qərar vermişik. İndi başlamaq düzgün deyil. Bütün sürücülər xəbərdar olandan sonra gücümüzü göstərəcəyik”.
“London taksiləri” sürücüləri də gündəlik planı ödəyə bilmədiklərini, maaşın azlığını, hətta yanacaq pulunu özləri ödədiklərini söyləyirlər. Bu taksilərdə işləyən sürücülərin problemi barədə dəfələrlə yazılsa da, həllini tapmayıb.
Ona görə çarəsiz qalan “London” şoferləri aksiyalara qoşulacaq. Sürücülərin bir tələbi də ləğv olunan marşrut xətlərinin yenidən bərpası olacaq. Çünki 58, 19, 34, 72, 114, 117, 178, 174, 27, 41 və 63 saylı marşrutlar ləğv olunub. 23, 104, 106, 192, 78, 89, 155, 38, 194, 66, 176, 138, 174, 56 və 168 saylı marşrutları da sıradan çıxarılır.
Aslan