Rayonun külli miqdarda var-dövlətini mənimsəyən, hər ay milyonlarla qazanc əldə edən vəzifə sahiblərinə, nədənsə “qaşın üstə qara var” deyən tapılmır

Məlum olduğu kimi, bu gün də Azərbaycanın əksər bölgələrində məmur özbaşınalıqları davam etməkdədir. Buna səbəb, mərkəzdə oturan məmurların yerlərdəki vəzifə sahiblərini müdafiə etmələridir. Ona görə də, regionlardan gündəlik məmur özbaşınalıqları barədə məlumatlar sızmaqdadır. Belə rayonlardan biri, bəlkə də lap birincisi Gədəbəy rayonudur. Üç il bundan öncə Gədəbəy rayonuna yeni icra başçısı təyin olunmuş Ramiz Yediyarov, hal-hazırda rayonun idarə və müəssisələrini sanki özəlləşdirmiş və özünün bir növ “ticarət obyekti”nə də çevirmişdir. Demək olar ki, Gədəbəy rayonunda müəssisə rəhbərlərindən hər biri ancaq bir şey haqqında fikirləşir, rüşvəti toplamalı və onun yarıdan çox hissəsini Ramiz Yediyarova çatdırmalıyıq ki, daşıdığımız vəzifədə qalıb işləyə bilək. Bu cür düşünən, belə bir əqidəyə xidmət edən təşkilatlardan biri də, “Azəriqaz” İstehsalat Birliyi Gədəbəy rayon Qaz İstismar İdarəsinin rəhbərliyidir. Adı çəkilən idarənin rəisi Məzahir Hüseynov, daşdan “pul çıxartmağı” məharətlə bacaran vəzifə sahibidir. Çünki, o, Ramiz Yediyarovdan vaxtilə “dərs” aldığından, bu gün də onun yolunu davam etdirməkdədir. Elə bu səbəbdəndir ki, “demontaj” edilmiş qaz boruları çıxarılır, heç bir qeydiyyata alınmadan çox ustalıqla da

satılır. Əslində həmin borular idarədə həm qeydiyyata alınmalı, həm də saxlanmalı olduğu halda, belə bir addım heç cür atılmır.

Onu da nəzərə almaq lazımdır ki, qaynağa aid elektrodlar Gədəbəyin mərkəzi bazarının bütün mağazalarında satılır və idarədən verilmiş elektrodlardır adı ilə satışa çıxarılır. Məhz, bu cür addımların nəticəsidir ki, Məzahir Hüseynov yuxarıdakı “daydayı”larına rüşvət verməyin müqabilində, hələ də vəzifə başındadır.

Ölkə rəhbərinin verdiyi sərəncama baxmayaraq, Gədəbəy rayonunda yeni tikilən evlər və ticarət obyektlərinin tam əksəriyyəti, qaz boru xətlərinin üstündə inşaa olunub. Ancaq hər bir evə və obyektə, Məzahir Hüseynov aldığı rüşvətin müqabilində təhlükəsiz olmasına dair sənəd verir. Məsələn, rayonunun Saratofka kəndindən düz Xar-xar kəndinə qədər qazlaşdırılmış kəndlərdən heç birinin smetası yoxdur və qaz xəttinin keçməsi məqbul hesab olunmayan obyektlərə isə, müəyyən rüşvətin müqabilində qaz xətləri çəkilir. Hətta elə hallar da olur ki, kənd sakinləri rüşvət verməklə qaz boru xətlərini özləri çəkdirirlər. Bu məqsədlə Qaz İstismar İdarəsinə hər ay 1 ton 300 litr yanacaq ayrılır və həmin yanacaq da Məzahir Hüseynov tərəfindən mənimsənilir. Sonra isə kağız üzərində sənədləşdirmə aparılır ki, guya təmir işləri aparılıb adı altında, verilmiş yanacaq qeyri-qanuni yollarla silinir. Maraq kəsb edən hal o olur ki, tutduğu əməllərə görə Məzahir Hüseynova bir kimsə “qaşın üstə qara var” demir. İcra başçısı Ramiz Yediyarovun onu müdafiə etməsinin səbəbini də başa düşürük. Çünki, Yediyarov keçmiş vergi mütəxəssisidir və rüşvətin necə əldə etməyin yollarını yaxşı bilir.

Bu belə olan halda görəsən “Azəriqaz” İstehsalat Birliyinin sədri cənab Əkbər Hacıyev nə fikirləşir? Axı, bu idarə dəqiqlik və diqqət cəlb edən idarədir, demək edilən hər səhv bir rayonun, bir evin, bir yaşayış zolağının məhv edilməsi deməkdir.

Təqribən bir ay bundan öncə Gədəbəy şəhərində ikimərtəbəli ev, qaz sızması nəticəsində göyə sovruldu. Baş verən hadisə bir daha onu göstərirdi ki, Məzahir Hüseynovun başı ancaq rüşvət yığmağa qarışıb. Əldə etdiyimiz məlumatlara görə, göyə sovrulan evin sahibi hadisə baş verməzdən 3-4 gün öncə Qaz İstismar İdarəısinin xəbərdar edibmiş ki, evdən mavi qaz iyi gəlir. Edilən xəbərdarlığıa baxmayaraq idarədən bir kimsə həmin ünvana getmir və nəticə də o olur ki, bədbəxt hadisə baş verir. Buna da əsas səbəb, idarənin ştat cədvəlində 50-60 nəfər işçinin olmasına baxmayaraq, onlardan təqribən 10-15 nəfərin iş başında tapılmaları olur. İşçilərdən tam əksəriyyəti əlləri ciblərində gəzirlər, elə ki, əmək haqlarının verilməsi vaxtı çatır, bu zaman hər kəs Məzahir Hüseynovla hesablaşmağa məcbur olurlar.

Etibarlı mənbədən əldə etdiyimiz məlumatlara görə, əksəriyyət Məzahir Hüseynovla bağlı həm yerli icra hakimiyyətinə, həm də “Azəriqaz” İstehsalat birliyinə dəfələrlə müraciət etmələrinə baxmayaraq, onunla bağlı bu günədək heç bir tədbir görülmür. Deyilənlərə görə, buna da səbəb hər ay Məzahir Hüseynovun “Azəriqaz” İstehsalat Birliyinin sədri, cənab Əkbər Hacıyevə göndərdiyi sovqatlar olur. Təkcə Mor-Mor suyu kifayət edir ki, “Azəriqaz”ın rəhbərinin od-alov tutan hirsini “söndürsün”. Hələ Gədəbəy balını, Gədəbəy quzusunu, Gədəbəy kartofunu və.s demirik. Üzümüzü “Azəriqaz” İstehsalat Birliyinin sədri cənab

Əkbər Haclyevə tutub bildiririk, yaxşı olar ki, ədalətli bir komissya təşkil etsin və Məzahir Hüseynovun bu gün də davam edən qanunsuzluq əməllərinin araşdırılması ilə bağlı vəzifə sahiblərinə müvafiq tapşırıqlarını versin. Əgər rüşvətxor, korrupsioner, üzərinə düşən vəzifəsinin öhdəsindən gələ bilməyən Məzahir Hüseynov daşıdığı vəzifəsində yenə qalarsa, o halda Gədəbəyi bundan sonra da saysız-hesabsız faciələr gözləyə bilər.

Əslində bütün bunlar, Məzahir Hüseynovla bağlı qanunsuz əməllərin olduqca cüzi bir hissəsinin açıqlamalarıdır.

“Azəriqaz” İstehsalat Birliyinə onu da bildirmək istəyirik ki, Gədəbəy rayon İcra Hakimiyyəti Aparatının bir növ nökərinə çevrilmiş bu şəxs haqqında, artıq ölçü götürməyin zamanı çatıb. Yediyarov hələ vergilər idarəsinə rəhbərlik edən zaman, əhalinin kürəyində “kösöv də ütüb”. Odur ki, Ramiz Yediyarov o vəzifə sahibidir ki, MTS adlandırılan və bu gün səhmdar cəmiyyətin ərazisi hesab olunan böyük bir sahəni, külli miqdarda rüşvətin müqabilində Mübariz Qəşəmoğluna sataraq bazar yaradıb. Demək olar ki, 3 il ərzində fəaliyyət göstərən bazardan əldə olunan pullar, yalnız şəxsi ciblərə daxil olur və dövlətə heç bir vergi belə ödənilmir. Onu da qeyd edək ki, müharibə veteranı olan Məmmədli Cəfərovun rəhbərlik etdiyi vaxtda, mal-qara bazarından toplanan pullar hesabına dövlətin vergisi vaxtlı-vaxtında ödənilirdi, hətta imkanı olmayan şəxslərdən belə, bazarda mal-qarasını satmaq üçün pul belə tələb olunmurdu.

Faciəli hal odur ki, Dağlıq Qarabağ müharibəsinin odu-alovu içərisində vuruşan Cəfərovdan, rəhbərlik etdiyi bazar rayon icra hakimiyyəti başçısı Ramiz Yediyarovun birbaşa tapşırığı əsasında

alındı və torpaqlarımızın bütövlüyü uğrunda ölüm-dirim savaşı gedən bir vaxtda Azərbaycandan kənarda yaşayan, Vətən xalq hissindən uzaq olan, bir qədər açıq desək, dolyası yolla fərarilik edən Mübariz Qəşəmoğluna verildi. Bu gün təqribən 4-5 hektar ərazisi olan bazardan toplanan pullar yalnız şəxsi ciblərə daxil olur, dövlətin vergisi ödənilmir, kasıba, imkansıza bir qəpik olsun belə maddi köməkliklər göstərilmir. Bax budur, Ramiz Yediyarovun Gədəbəydə tətbiq etdiyi totalitar idarəçiliyin mahiyyəti, məsələlərin görünən tərəfi.

P.S. Növbəti sayımızda, diqqəti cəlb edən digər olaylardan varlığından bəhs edəcəyik

Mətləb Balakişiyev