Ölkə başçısının məmur övladları barədə verdiyi göstərişə yenə də məhəl qoyulmur

Bu mövzu bir aydan artıqdır ki, redaksiyanın poçtunda “mürgü” vurur. Dərhal ictimaiyyətin qınağına çıxarılmamasının müəyyən səbəbləri vardır. Elə bu səbəblər ucbatından həm mövzu gündəmə gətirilmədi, həm də problemin çözülməməsinin səbəbləri araşdırıldı.

Problemin gündəmə çıxarılmamasının birinci səbəbi Zeyqəm Hüseynovun adının hallanması ilə bağlıdır. Sumqayıt Şəhər Məhkəməsinin sədri Zeyqəm Hüseynovun adı heç bir qruplaşmada çəkilmir, demək olar ki, o, dövlət qulluğunda sadiqdir, bitərəfdir. Eyni zamanda indiyə kimi işlədiyi vəzifələrdə özündən sonra ad-san qoyub getmişdir ki, hələ də onun haqqında xoş danışırlar. Amma bu da bir faktdır ki, özü Sumqayıt şəhərinin rəhbərliyində təmsil olunduğundan oğlu başqa bir yerdə, lap elə paytaxtın özündə xidmət keçə, rəhbər vəzifədə işləyə bilər, amma atasının rəhbər olduğu şəhərdə işləyə bilməz. Əgər orada işləyirsə bu yüz faiz atasının Daxili İşlər Naziri cənab general-polkovnik Ramil Usubov qarşısında xidmətləri müqabilindədir.

Heç kimə sirr deyil ki, hər zaman məmurların, varlı adamların və oliqarxların övladları özlərini xalqla davranışda yuxarıdan aparıblar. Bu hal o qədər həddini aşıb ki, son zamanlar camaatın səbr kasası daşıb, bir himə bənddirlər ki, onları cəzalandırmağa qalxsınlar.

Belə bir hadisə bir neçə il bundan əvvəl İsmayıllı rayonunda baş vermişdi. Ölkə başçısı dərhal hadisə ilə əlaqədar yığıncaq keçirtdi və günahkarları cəzalandırdı. Bu hadisədən sonra daha bir neçə hadisə baş verib və günahkarlar öz cəzalarına çatıblar. Amma bununla belə, faktlar faktlığında qalmaqdadır və belə faktların biri də toxunduğumuz məsələdir.

Zeyqəm Hüseynovun Ruslan adlı oğlu Sumqayıt şəhərində yerləşən 4-cü Polis bölməsinin rəisidir. Vəzifəli şəxsin övladı niyə və necə onunla bir şəhərdə işləməlidir ki? Elə vətənpərvərdirsə niyə Daşkəsəndə, Yardımlıda, Lerikdə, Şirvanda, Lənkəranda deyil, Sumqayıtda dövlətə sədaqətini göstərməlidir? İnanırıq ki, ölkə başçısının bundan xəbəri yoxdur və cənab nazir Zeyqəm Hüseynova görə onu Sumqayıtda saxlayır. Əgər belə olmasaydı, Sumqayıt Şəhər Polis İdarəsinin rəisi cənab general heç olmasa kvartalda bircə dəfə onu ayağa durquzub sahəsində qalaqlanmış açılmayan cinayət işlərinin açılmamasının səbəbini soruşardı.

Bir neçə il əvvəl Sumqayıt şəhər Polis İdarəsinin rəisi vəzifəsində polkovnikin generalla əvəzlənməsi məsuliyyətin artacağına, nizam-intizamın gücləndiriləcəyinə dəlalət edirdisə də hadisələrin sonrakı məcrada cərəyan etməsi heç də bunu təsdiqləmədi.

İlk günlər “General hamını bir qozun qabığına yığıb, qayda-qanun yaradır” deyənlər sonradan ağızlarına su alıb durdular. Bəlkə də başqa bölmələrdə belədir, amma dördüncü bölmədə hələ də “köhnə hamam, köhnə tas” prinspi hökm sürür.

Nə qədər oğurluq faktları, açılmayan cinayətlər olsa da bölmədə məsul şəxslərin vecinə deyil, çünki heç kim onlardan heç nə tələb etmir. Bığlı-saqqalsız polislər yalnız statistik hesablamalar hazırlayıb göndərməklə kifayətlənirlər.

Vətəndaşlarla söhbət zamanı əldə etdiyimiz məlumata görə, Ruslanın əlaltıları sayılan, hər yerdə özlərini fəxrlə cinayət-axtarış şöbəsinin əməkdaşları kimi təqdim edən Kənan, Zaur və Emin üçlüyü, hətta bölmənin ərazisindən kənarda da pul ovlamaqla məşğuldurlar. Onlar üçün heç tafəvutu yoxdur, kim kimin evini oğurladı, yaxud da başqa cinayət... baş verdi.

Maraqlısı ondan ibarətdir ki, Ruslan vəzifəli şəxsin övladı olduğundan əlaltıları onu sözsüz başa düşürlər. Necə deyərlər; arifə bir işarə bəs edər. Odur ki, onların varlı uşaqları ilə işləri yoxdur, qoy gedib keflərini sürsünlər. Harda ki, gördülər kasıb, fağır, ley kimi tez kəsirlər başının üstünü.

Atası tənbeh edib başa salmır, general tənbeh eləmir, özbaşına qalmış bölmə rəisindən nə gözləmək olar?

Araşdırma zamanı bəlli olmuşdur ki, Ruslan baş idarənin baş müstəntiqlərini belə saya salmır, onların xahişini (tapşırığını) qulaqardına verir. Bilir ki, heç kim generala bir söz deyə bilməz, desələr də generalla atası arasında olan haqq-salama görə onun xətrinə dəyməyəcək. Bizə ən çox maraqlı görünən həm də ondan ibarət oldu ki, bu xətir-hörmət nazirlikdə də mövcuddur. Nazirliyin baş zabitləri ilə apardığımız söhbət zamanı onlar: “Ruslan qanacaqlı oğlandır, həm də Zeyqəm müəllimdən ayıbdır” söylədilər.

Elə bu üzdən biz də üz tutduq Zeyqəm Hüseynovun “hüzuruna” ki, bəlkə məsələni çözə. Cənab yerində tapılmadığından məsələni onun yaxınlarından birinə anlatdıqdan sonra koordinatlarımızı buraxdıq ki, məsələni həll edəndən sonra nəticəsindən bizi agah etsinlər. Nəticə isə heç də ürəkaçan olmadı. Cənab Hüseynov bir ağsaqqal kimi məsələni araşdırmaq əvəzinə oğlunun müdafiəsinə qalxdı. Əlbəttə ki, bu təbiidir, o, belə də etməli idi. Ancaq məsələni araşdırıb kökünə çıxandan sonra. Söhbət Ruslanın birbaşa neqativ əməllərindən deyil, onun himayə etdiyi işçilərinin əməllərindən gedirdi. Məsələ araşdırılıbsa və cənab Hüseynov oğlunun himayədarı kimi çıxış edirsə, deməli əlaltılarının çirkin əməllərindən Ruslan birbaşa xəbərdardır. Elə isə buradan iki nəticə çıxarmaq mümkündür. Birincisi, dövlət qulluğunda olan məmur övladı ona qarşı yaranmış boşluqdan istifadə etməklə dövlətə deyil, özünə xidmət edir. İkincisi, Kənan, Zaur, Emin adları ilə özlərini fağır-fuğura təqdim edib, onları soymaq məqsədilə bölməyə gətirən üçlüyün timsalında cinayətkar bir qrupun əməllərinə göz yummur, onların cinayətkar əməllərinə himayə durur. Bu isə gələcəkdə çox ağır nəticələrə səbəb ola bilər. Odur ki, işə ən azından nazir səviyyəsində müdaxilə olunmalıdır.

Məsələni nəzarətdə saxlayacağıq.

Əli bəy Azəri