İcra başçısının bir il öncəki vədindən nə xəbər var?

Sumqayıtda Eldar Əzizov rejiminin hökmranlığı davam edir. Gəncədən “ixrac” olunan kadrın gənclər şəhərindəki korrupsiya və maxinasiyası haqda mediada çox yazılıb. “Gündəm xəbər” olaraq diqqətimizi çəkən məqam E.Əzizovun düz çıxmayan vədləridi. Bu sıradan ilk olaraq icra başçısının kadr siyasətinə toxunmaq istərdik.
Təxminən bir il öncə E.Əzizovun bir açıqlamasına diqqət edək:“Sumqayıtda vəzifələrdə sumqayıtlılar olmalıdır”. Bunu SİA-ya Sumqayıt şəhər İcra Hakimiyyətinin başçısı Eldar Əzizov sumqayıtlıların işləmək üçün Bakıya üz tutması məsələsinə münasibət bildirərkən deyib. Onun sözlərinə görə, ölkə Prezidenti İlham Əliyevin səyi nəticəsində O cümlədən müəssisələrin sayı artır. İcra hakimi həçminin qeyd edib ki, 10 gün bundan öncə şəhərdə 3 yeni müəssisə istifadəyə verilib: “Bu günlərdə Kimya parkının əsası qoyulub. Bir ildən sonra təxminən onun 10 000-ə qədər işçisi olacaq. Proqnozlara görə, 10 ildən sonra 30 000 adam işlə təmin ediləcək”.
Beləliklə Eldar müəllimin açıqlamasından təxminən bir il ötüb. Sumqayıt sakinlərinin iş dalınca Bakıya axınını real olartaq görmək üçün hər gün səhər və axşam Bakı-Sumqayıt yolundakı tıxaca nəzər salmaq kifayətdir. O ki qaldı vəzifə sahiblərinə Sumqayıt şəhərində vəzifədə çalışan şəxslərin əksəriyyəti yalnız vəzifəli şəxslərin qohumlarıdır. Onlar uzun illərdir ki, qohumlarının hesabına bu vəzifələrdə çalışırlar. Bu barədə daxil olan məlumatda bildirilir ki, Sumqayıtı hazırda məhz məmurların qohumları idarə edirlər.
Baş nazirin müavini, “Qaçqınkom”un sədri Əli Həsənovun qardaşı Ramiz Həsənov vaxtilə Sumqayıt şəhər icra başçısının müavini vəzifəsində çalışıb. Hazırda isə o, Zəngilan rayon İcra Hakimiyyətinin başçısıdır. Digər qardaşı İlyas Həsənov isə Sumqayıt şəhər Yaşıllaşdırma İdarəsinin rəisidir. Dövlət Sərhəd Xidmətinin rəisi Elçin Quliyevin qardaşı Akif Quliyev Sumqayıt şəhər icra hakimiyyətində müavin vəzifəsində çalışır.
Sumqayıt şəhərin icra strukturlarında qohumluq əlaqələri olan məmurlar da çoxdur. Şəhər “Su-kanal” Törəmə Səhmdar Cəmiyyətinin sədri Müşfiq Əsədovun spiker Oqtay Əsədovla çox yaxın qohumluq əlaqəsinə malik olduğu bildirilir.
Məmmədovla Küçə İşıqları İdarəsinin rəisi Əhməd Məmmədov arasındadır. Belə ki, Əhməd Məmmədov keçmiş icra başçısının qardaşı oğludur. Sumqayıt Texnologiyalar Parkının qurulmasında yaxından iştirak edən “Azinko” tikinti şirkətinə başçılıq edən Malik Həsənovun isə Dövlət Əmlakının İdarə edilməsi üzrə Dövlət Komitəsinin sədri Kərəm Həsənovun qardaşı oğlu olduğu söylənilir.
Sumqayıt şəhər Telekommunikasiya Qovşağının rəisi Akif Əsgərovla Sumqayıt Regional Təchizat İdarəsinin rəisi Xəndan Əhmədovun quda olduğu bildirilir.
Abşeron rayon icra hakimiyyətinin başçısı Zakir Fərəcovla Sumqayıt şəhər icra hakimiyyəti başçısının keçmiş müavini, hazırda Ərazi maliyyə müfəttişliyinin rəisi vəzifəsində çalışan Akif Zeynallı qudadırlar. Onun İsveçrə Konfederasiyasında fövqəladə və səlahiyyətli səfir işləyən oğlu Əkrəm Zeynallı isə Abşeron rayon icra başçısının kürəkənidir. Zakir Fərəcovu həm də Sumqayıt Şəhər İcra Hakimiyyətinin Corat qəsəbəsi üzrə nümayəndəsi Cəmil Quliyevlə qohumluq telləri birləşdirir. Belə ki, Zakir Fərəcovla Cəmil Quliyev də qudadır. Cəmil Quliyevin Müşfiq adlı oğlu 3 saylı Mənzil İstismar Sahəsinin rəisidir.
Mərkəzi bazarın və “Karvan” Ticarət Mərkəzinin sahibi Ağamirzə Əhədovun nəvəsi Abşeron rayon icra hakimiyyətinin başçısı Zakir Fərəcovun qardaşı, əvvəllər Dövlət Sosial Müdafiə Fondunun Sumqayıt şəhər şöbəsinin rəisi işləmiş, hazırda isə millət vəkli olan Nazim Fərəcovun qudasıdır. Deyilənlərə görə, Nazim Fərəcovun oğlu Sumqayıt şəhər Məhkəməsində hakim köməkçisidir. Akif Zeynallının digər oğlu Kənan “AtaBank”ın Sumqayıt filialının müdiridir.
Sumqayıt şəhər icra hakimiyyəti başçısının müavini Tariyel Hacıyev 1989-1991-ci illərdə Azərbaycanın baş nazirinin müavini işləmiş və Qarakənddə vurulan vertolyotda həlak olmuş Zülfü Hacıyevin qardaşıdır. Sumqayıt şəhər icra hakimiyyətinin İctimai-siyasi və humanitar məsələlər şöbəsinini baş məsələhətçisi Seyfəddin Rəhimovun oğlu Samir Rəhimov “Bank of Baku”nun Sumqayıt filialının müdiridir. Yayılan xəbərlər arasında Seyfəddin Rəhimovun Prezident Adminstarsiyasının rəhbəri Ramiz Mehdiyevlə qohum olması barədə məlumatlar da var.
Vergilər nazirinin 1-ci müavini sumqayıtlı Natiq Əmirov “Azərikimya” İstehsalat Birliyinin baş energetiki İslam İslamovun kürəkənidir.
Sumqayıt Çörək zavodunun direktor müavini Fərəməz Bünyatovun qardaşı Əbülfəz Bünyatov Sumqayıt şəhər 1 saylı notariat kontorunun notariusudur.
Yeni Azərbaycan Partiyasının Sumqayıt təşkilatının sədri Asif İmaməliyevin iki qardaşı icra strukturlarında çalışır. Onun bir qardaşı Ayaz İmaməliyev Sumqayıt şəhər icra hakimiyyətində İnformasiya təminatı və təhlili sektorunun müdiri vəzifəsində çalışır. Digər qardaşı Əşrəf İmaməliyev isə Sumqayıt şəhər “Su-kanal” Törəmə Səhmdar Cəmiyyətində satış üzrə rəis müavinidir.
Sumqayıt Şəhər Məhkəməsinin sədri Zeyqəm Hüseynovun oğlu Ruslan Hüseynov Sumqayıt şəhər Polis İdarəsinin 4-cü bölməsinin rəis müavinidir.
Sumqayıt Şəhər Bələdiyyəsinin sədr müavini Soltan Kərimovun qardaşı Fehruz Kərimov şəhər qəbiristanlığının müdiridir. Qeyd edək ki, bu vəzifədə əvvəllər Soltan Kərimov özü çalışıb.
Sumqayıt Şəhər Bələdiyyəsinin sədri Əbülfəz Babayevin qardaşı Təmreyxa Babayev isə bələdiyyədə hüquq şöbəsinin müdiridir.
Sumqayıt şəhər 41 saylı I seçki dairəsinin sədri Məzahir Süleymanov Abşeron rayon icra hakimiyyəti başçısının birinci müavini Sərviz Süleymanovun qardaşıdır. Sərviz Süleymanovun Abşeron rayonunun icra hakimiyyətinin başçısı Zakir Fərəcovla da qohumluq münasibətləri var. Həmin dairədən millət vəkili seçilmiş Sumqayıt şəhər 18 saylı orta məktəbin direktoru Leyla Abdullayevanın Sumqayıtın keçmiş icra başçısı, hazırda Mədəniyyət və Turizm nazirinin birinci müavini olan Vaqif Əliyevlə qohumluq əlaqələrinin olduğu vurğulanır.
Yazıda adları çəkilən şəxslərin də mövqeyini dərc etməyə hazırıq.

Malik