İcra başçısı bu rüsvayçılığa son qoymur - zibil tullantıları, ayaq altda qalan meyvə-tərəvəz, zibil sellofanları...; ət məhsulları satılan məkana üfunət iyindən və milçəklərin vızıltısından yaxınlaşmaq olmur

Sabunçu rayon sakinlərinin Adil Vəliyevdən gözləntiləri böyükdür. Ümid edilir ki, icra başçısı Bakıxanov qəsəbəsinə əl gəzdirdiyi kimi rayonun digər ərazilərində də abadlıq işlərinə tapşırıq verəcək. Amma Sabunçu vağzalı önündəki bazarda illərdir hökm sürən rüsvayçı vəziyyətə A.Vəliyev tərəfindən heç bir reaksiya müşahidə olunmur.

Bu barədə “Gündəm-xəbər”ə məktub yazan sakinlər qeyd edirlər ki, Sabunçu bazarı zibillik içində üzür. İcra başçısı Adil Vəliyevi isə bu şərait deyəsən, narahat etmir. Odur ki, bu vəziyyətin nə vaxta qədər davam edəcəyi sual altındadır.

İcra başçısı və nümayəndələri mütləqdir ki, bazarın yanından keçiblər. Ancaq niyəsə bu iyrənc mənzərə ilə bağlı hər hansı tədbir görülməsində maraqlı görünmürlər. A.Vəliyev Bakıxanov qəsəbəsini kosmetik də olsa abadlaşdırıb və əvvəlki dövrlə müqayisədə qəsəbənin görkəmi çox dəyişib.

Vaxtilə yol üstündə tör-töküntü şərait, köhnə binaların qopan üzlükləri, yola çıxan mağazalar, aramsız tıxaclar var idi. Ancaq yeni başçının ilk işi bu qəsəbəni müasirləşdirmək oldu. Amma sözügedən bazar diqqətsiz qalıb. İcra başçısı görməsə belə, müavinləri, RİH əməkdaşları bu məsələni qaldıra bilər. Ölkənin heç bir yerində cür biabırçı vəziyyət yoxdur.

Ancaq Sabunçu bazarı hər gün eyni templə işləyir. Bu isə həm xəstəlik mənbəyidir, həm qanunsuzluqdur, həm də yeni nəslin qidalanmasına ziyanlıdır.

Çünki bazara addım atar-atmaz üfunət iyi adamı geri itələyir. Səbəb isə bazarda həmişə antisanitar vəziyyətin hökm sürməsidir. Bazara nə vaxt daxil olsan, orada qalaqlanmış zibil tullantılarını, ayaq altında qalan meyvə-tərəvəzi, zibil sellofanlarını görmək mümkündür.

Bazarda daha çox diri toyuq və quşların satılmasını nəzərə alsaq, buradakı qoxunu təsəvvür edin. Ət və ət məhsulları satılan məkana isə üfunət iyindən və milçəklərin vızıltısından yaxınlaşmaq müşkül məsələyə

çevrilib ki, insan burada ətlərə baxan zaman, bir daha ət xörəyi yemək istəmir. Balıq satılan ərazidə isə pişiklərin var-gəl etməsi görünür heç kimi narahat etmir. Qabları çirklə bürünmüş şorabalara isə yaxın durmaq, ümumiyyətlə, mümkün deyil. Bazardakı bu acınacaqlı vəziyyət havanın soyuq və küləkli vaxtı belə problemlər yaradırsa, yayın isti aylarında isə vəziyyətin daha da acınacaqlı hal almasına səbəb olur. Bazarda səliqə-sahman bir yana, nəyin harada satıldığını müəyyənləşdirmək üçün hələ bir müddət müşahidə aparmaq lazım gəlir. Çünki təmizliyə nəzarətin zəif olması səbəbindən, məhsulu kim harda gəldi, necə istədi satır. Ölmüş heyvan ətləri məhz Sabunçu bazarına gətirilir. İddia edilir ki, bazarda keyfiyyətli, sağlam dana və qoyun adı altında at, eşşək, camış və ölmüş heyvanların əti satılır. Elə məhz bu səbəbdən, həmin ətlər bazara gecə saat iki-üç radələrindən sonra gətirilir. Hələ ətlərin üstündəki milçəklər, üzərlərinə atılmış bezləri gördükdə, bir sözlə insan ətdən iyrənir. Ümumiyyətlə, bazarın əsas problemləri sırasında yalnız antisanitariya yer almır. Bura bazardakı fırıldaq tərəziləri də əlavə etmək yerinə düşərdi. Bazardan alış-veriş edən hər kəs, burada çəkidə aldadıldığını iddia edir.