Adil Vəliyevin Bakıxanovdakı məşhur «Talkuçka»nın sahibindən külli miqdarda pul istədiyi iddia olunur

Sabunçu rayonunun icra başçısı Adil Vəliyevin adı rüşvət qalmaqalında hallanır. Verilən məlumata görə, son dövrlər rayonun Bakıxanov qəsəbəsində ticarət obynektlərinin sökülməsi, xüsusən də məşhur «Razin Talkuçkası»nın bağlanması ilə bağlı məsələnin gündəmə gəlməsinin arxasında da bu amil dayanır.

İddialara görə, Sabunçunun icra başçısı Adil Vəliyev qəsəbədəki bir sıra obyektləri sökdürdükdən sonra, «Talkuçka»nın da bağlanması üçün tədbirlər görməyə başlayıb. Həmin bazarın yerində böyük ticarət mərkəzinin inşasının nəzərdə tutulduğunu əsas gətirən icra başçısı, həm də antisanitariyanın hökm sürdüyünü deyib. Mənbənin iddiasına görə, Adil Vəliyevin əvvəlcədən bazarı sökdürmək fikri olmayıb. Buna qədər onun «Talkuçka»nın rəhbəri Hacı Fərhadla danışıqlar apardığı və ondan 300 min manat pul istədiyi söylənilir.

Məlumatlara görə, icra başçısının iş adamı ilə danışıqları uğurlu nəticə verməyib. Bazarın rəhbəri rayonun rəhbərinə çatdırıb ki, onun bu qədər pulu yoxdur, hətta olsa belə vermək niyyətində deyil. Elə mərəkə də bundan sonra baş qaldırıb. Adil Vəliyev Hacı Fərhadla bağlı araşdırma aparılmasını və onun rəhbərlik etdiyi «Talkuçka»nın sökülməsi barədə göstəriş verib.

Bu əsnada Sabunçu rayonu ilə bağlı digər maraqlı məlumatlar da daxil olub. Həmin məlumatlarda rayondakı sahibkarlardan pul yığılması, yeni yolların salınması, abadlıq və yenidənqurma işlərində korrupsiya ilə bağlı ciddi məqamlar var. Bəzi dəqiqləşdirmələrdən sonra bununla bağlı geniş araşdırmanı oxucuları təqdim edəcəyik.