Məzahir Hüseynov barəsində vaxtında lazımi tədbirlər görülməzsə, yəqin ki, hələ bundan sonra da faciələrin sayı durmadan artacaq

Ötən sayımızda Gədəbəydə baş verən çoxsaylı qanunsuzluqlar barədə xeyli məlumatlar vermişdik. İşıq üzü görən məqalənin dərcindən sonra, bəzi rayon sakinləri redaksiyamıza zəng edib, bəzi məqamları da oxucuların diqqətinə çatdırmağı xahiş etdilər. Çatdırılan məlumatlarda bildirilir ki, gözü ayağının altını görə bilməyən Gədəbəy Qaz İstismar İdarəsinin rəisi Məzahir Hüseynov, bu gün də qeyri-qanuni əməllərini davam etdirməkdədir. Belə ki, o, heç bir əsas olmadan və evlərə bildirişlər paylatdırmadan, hətta xəbərdarlıq belə edilmədən əhalinin aztəminatlı hissəsinin xırda borclarına görə qaz nəqlini dayandırılması haqda, tabeçiliyində olanlara daim göstərişlərini verir. Ancaq Gədəbəydə fəaliyyət göstərən müəssisələrin əksəriyyətinin idarəyə olan borcu, bəzən 2000 manatı keçməsinə baxmayaraq, həm qazları yanır, həm də Məzahir Hüseynov tərəfindən onlara dəstək də nümayiş etdirilir.

İdarə rəisi Gədəbəy kəndlərinin əksəriyyətindən qazın ödənişini poçt və bank vasitəsilə deyil, vətəndaşlardan poçtun çekləri vasitəsilə yığdırır. Verilən məlumatlara görə, həmin çeklərlə yığılan pulların əksəriyyəti, istifadə olunan mavi qazın ödənişinə deyil, birbaşa onun cibinə daxil olur.

Ümumiyyətlə yerli sakinlər onu da bildirirlər ki, Məzahir Hüseynov belə bir saxtakarlıqlar üzrə peşəkar mütəxəssisdir. O, hələ idarəyə rəis təyin olunmazdan əvvəl də, bəzi vəzifə sahiblərinin və özünə yaxın bildiyi şəxslərin dövlətə olan

borclarını kompyuterdən çox ustalıqla sildirmiş və əmələ gələn problemlərin əksəriyyətini ört-basdır etməyə də nail ola bilmişdir. Amma, nədənsə “Azəriqaz”n rəhbərliyinə yarıtmaz vəzifə sahibinin qol qoyduğu qanunsuzluqlar barədə nə qədər müraciətlər ünvanlansa da, ona bir kimsə “qaşın üstə qara var” demir. Əhali arasında belə bir söz-söhbət də gəzir ki, Məzahir Hüseynov icra başçısı Ramiz Yediyarov tərəfindən birbaşa himayə olunur. Məhz ona görə o, himayə olunur ki, Ramiz Yediyarov rüşvət yığıb çoxunu ona verənləri sevir. Axı, o, keçmiş vergi işçisi olub. O halda belə çıxır ki, “Azəriqaz” İstehsalat Birliyinin sədri Əkbər Hacıyev, bəlkə də icra başçısı Ramiz Yediyarovdan çəkinir ki, Məzahir Hüseynovla bağlı lazımi tədbirlər görmür. Əgər bu belə olmasaydı, adicə test imtahanından keçib məqbul ala bilməyən işçilərindən, Məzahir Hüseynov pul alıb yenidən vəzifələrinə qaytarmazdı.

Görəsən, “Azəriqaz” İstehsalat Birliyinin rəhbərliyi rayonun kəndlərində debutor borcların niyə azalmadığını heç Məzahir Hüseynovdan soruşurmu? Yəqin ki, yox! Əgər soruşsaydı, o halda qeyri-qanuni yazılıb mənimsənilən pullar üzə çıxardı. Etibarlı mənbənin verdiyi məlumatlara görə, ikiüzlü çeklərlə əhaliyə ödəniş etdirilir, həmin pullar mənimsənilir və nəticədə əhalinin dövlətə olan borcları da artmaqda davam edir. Belə bir addımların nəticəsidir ki, əksər kəndlərin debutor borcları azalmaq bilmir. Əgər Məzahir Hüseynov barəsində lazımi tədbir görülməzsə, yəqin ki, yaxın vaxtlarda Gədəbəyi böyük təhlükələr gözləyəcək. Ona görə təhlükə deyirik ki, yeni tikilən evlərin və ticarət obyektlərinin qarşısından keçən əsas qaz boru xətləri, ev və obyekt sahibləri tərəfindən betonla örtülür. Ancaq Məzahir Hüseynov həmin adamlara müəyyən rüşvətin müqabilində təhlükəsizlik haqqında rəy verir. Məhz, belə bir

əməllərin nəticəsidir ki, hələ ötən saylarımızın birində də qeyd etmişdik ki, Gədəbəydə ikimərtəbəli bir ev partladı və bir nəfər də dünyasını dəyişdi. Görəsən, bu cür hadisələrdən “Azəriqaz” İstehsalat Birliyinin rəhbəri nəticə çıxarıb, Gədəbəy Qaz-İstismar İdarəsinin rəisi Məzahir Hüseynov barədə, nə vaxt “yek” qərarını açıqlayacaq?

Anar