Düşündürücü hal odur ki, Beyləqana da hər il sosial problemlərin həlli məqsədilə büdcədən külli miqdarda vəsait ayrılsa da, ümumi vəziyyət hələ də acınacaqlı durumdadır.

Son vaxtlar Beyləqanda yaşanan ab-havanın xoşagəlməz macəraya yönəlməsi, sosial problemlərin tüğyan etməsi, sakinlərin rayon rəhbərliyinin idarəçiliyindən zinhara gəlmələri və.s kimi problemlərin varlığı, mətbuatın gündəmini zəbt etməkdədir. Diqqəti cəlb edən hal o olur ki, rayonun bütöv sahələrini əhatə edən tənqidi məqalələr nə qədər işıq üzü görsə də, silsilə həyacan təbili çalınsa da, ciddi sosial problemlərin həllindən söhbət belə gedə bilməz. Adicə bir faktı qeyd etmək kifayət edər ki, sadalananların həqiqət olduğunu isbata yetirmək mümkün olsun. Məsələn, icra hakimiyyətinə məxsus inzibati binanın ətraf əraziləri, mərkəzi küçələrin yolları, daha çox isə kəndarası yolların olduqca xoşagəlməz durumda olması, sanki hər kəsi düşünməyə sövq edir. Düşündürücü hal odur ki, Beyləqana da hər il sosial problemlərin həlli məqsədilə büdcədən külli miqdarda vəsait ayrılsa da, ümumi vəziyyət hələ də acınacaqlı durumdadır.

Biz rayonun yol problemlərini qabartmaqla, heç də digər problemlərin varlığını kölgə altına qoymağa, yaxud da onları ictimaiyyətə çatdırmaq fikrindən daşınmaq niyyətində deyilik. Çünki, bu gün ən çox sakinləri incidən, minbir haqsızlıqlarla üz-üzə qoyan, aylar, illər uzunu onları idarə, müəssisələr qapısında sürünməyə məcbur edən səbəb, rayonun rəhbəri Vaqif Abdullayevin qol qoyduğu maxinasiyalar, yaxud da qanunsuz imzaladığı sənədlərin varlığıdır. Məsələn, hələ ötən saylarımızın birində Beyləqan rayon sakini Cəfərov Kamal Hüseyn oğlunun üz-üzə qaldığı problemin varlığından bəhs etmişdik. Yazıb bildirmişdik ki, Vaqif Abdullayev onun istifadəsində olan, yəni 20 il ərzində mühafizə etdiyi, çoxillik ağaclar əkdiyi 1,42 ha torpaq sahəsinin 0,70 ha-nı 03 iyul 2012-ci il tarixdə imzaladığı 77 saylı sərəncamla Əsədov Xaqani Əsgərxan oğluna vermişdir.

Belə bir addımın atılması, çox ciddi qanun pozuntusu hesab olunur.

Bir məqama da diqqət yetirək ki, Vaqif Abdullayev icra başçısı olduğu ilk gündən varlı, imkanlı, var-dövlətə malik şəxslərin axtarışına çıxdı və həmin şəxslərə də pulunun müqabilində rayon ərazisində lazımi şərait də yaratdı. Məsələn, əslən Beyləqan rayonundan olan Xaqani Əsgərov adlı şəxs də, icra başçısının “dobro” deməsindən yararlanaraq, rayonun “Dostluq soxozu” adlanan ərazisindən 60 hektar torpaq sahəsini icarəyə götürür. Onun icarəyə götürdüyü torpaq sahəsində mişar daşlarından binalar tikməsi qalsın bir yana, binada çalışan fəhlələrlə əmək müqaviləsi bağlamadan fəaliyyətini davam etdirməsi, əkib-becərtdirdiyi məhsulların statistikasını açıqlamaması və.s kimi hallar, heç də diqqətdən kənarda qalmır. Bu şəxsə yaradılan imkanın nəticəsidir ki, hal-hazırda onun Beyləqanda milyonlarla qiymətləndirilən mülkü, külli miqdarda var-dövləti var. Bu gün Xaqani Əsgərovun rayonda “prestijnı” hesab olunan “Elita” ticarət mərkəzi, Beyləqan bazarının qarşısında “Minbir xırdavat” mağazası, Bakı şəhəri Elmlər Akademiyasının yaxınlığında “Qala market” mağazası, rayonun Şəfəq qəsəbəsində tikinti materialları bazası, rayonun “RTS” qəsəbəsi adlanan ərazisində tikinti materialları bazası (bazada çalışan işçilərlə əmək müqaviləsi bağlanmır), mərkəzi bazarın yaxınlığında “Lider İnşaat” bazası və.s fəaliyyət göstərməkdədir.

Ümumiyyətlə verilən məlumatlarda o da bildirilir ki, bu gün icra başçısı Beyləqanda elə bir şərait yaradıb ki, hansı şəxsin pulu varsa o, istənilən vaxt başqa şəxslərə məxsus özəl mülkləri məhkəmə yolu ilə, icra başçısının verdiyi saxta sərəncamlar əsasında, hətta pul gücünə belə ələ keçirə bilərlər.

Belə bir addımların nəticəsidir ki, Vaqif Abdullayevlə bağlı qalmaqallar bu gün də bitib tükənmək bilmir. Yəni, icra başçısı çox zaman zor, hətta fiziki güc tətbiq etməyə üstünlük verən vəzifə sahibi olduğundan, onun adı daim qalmaqallarda da hallanır.

Hələ bir müddət bundan əvvəl belə bir məlumat da əldə edə bilmişdik ki, icra başçısı ilə aparıcı telekanallardan birinin əməkdaşı arasında, hansısa səbəb üzündən hətta söyüş həddinə çatan incident də yaşanmışdı. Verilən məlumatlarda bildirilirdi ki,Vaqif Abdullayev sakinlərin gözü qarşısında telekanalın operatorunu küçə söyüşləri ilə təhqir edir. Təhqir olunan telekanal

əməkdaşı, baş verənlərlə bağlı ölkə başçısı cənab İlham Əliyevə müraciət ünvanlayacağını açıqlayır. İnsidentdən təqribən bir gün sonra isə, icra başçısı telekanal əməkdaşının yanına “elçi” göndərir və problemin ictimailəşməsinə imkan vermir. Son anda da o, istəyinə nail olur.

Əldə etdiyimiz başqa bir məlumata görə bir müddət əvvəl Vaqif Abdullayevlə, rayonda sahibkarlıq fəaliyyəti ilə məşğul olan Tərlan Kamaloğlu arasında ciddi münaqişə də yaşanır. Münaqişə icra hakimiyyəti binasının yaxınlığındakı istirahət parkında baş verir. Münaqişəyə səbəb, icra başçısı parkda kafe və çayxanası olan iş adamından, abadlaşdırma adı altında onmin manat pul istəməsi olur. Tərlan Kamaloğlu istənilən vəsaiti ödəməkdən imtina etdikdə, Vaqif Abdullayev onu camaatın gözü qarşısında təhqiramiz söyüşlərlə təhqir edir və ailə üzvlərinin ünvanına nalayiq ifadələr də işlədir. Bu zaman başçının söyüşlərini həzm edə bilməyən sahibkar, yerdən götürdüyü kərpiclə icra başçısını vurur. Baş verən olay istirahət parkına dincəlməyə gələn sakinlərin səyi nəticəsində sakitləşdirilsə də, az sonra sahibkarı polis şöbəsinə aparırlar. Və çox keçmir ki, Tərlan Kamaloğlu polis şöbəsindən sərbəst buraxılır. Yəqin ki, onun həbs olunması Beyləqanın tarixində “beyni qan icra başçısı” izini buraxan Vaqf Abdullayevə sərf etmir ki, sahibkarla bağlı belə bir qərar verilir.

Ümumiyyətlə, Vaqif Abdullayevin rayon sahibkarlarına ayırılan güzəştli kreditlərə əl qoyması barədə də, söz-söhbətlər dolaşmaqdadır. Məsələn, hələlik adının çəkilməsini istəməyən Beyləqanlı bir sahibkar bildirir ki, başçı sahibkarların aldıqları kreditlərin 10 faizinin mütləq ona çatması tələbini qoyur. Əgər hansısa sahibkar onun irəli sürdüyü şərtə əməl etməzsə, vay həmin sahibkarın halına. Çünki çox keçmir ki, Vaqif Abdullayev öz adamlarının vasitəsilə həmin sahibkarı gözümçıxdıya saldırır.

Məhz, belə bir səbəblər üzündəndir ki, Vaqif Abdullayevin Beyləqanda tətbiq etdiyi idarəçilik, həyata keçirdiyi “islahat” proqramları, rayonunun iqtisadiyyatını, xüsusilə də heyvandarlıq və taxılçılıq təsərrüfatı ilə bərabər, üzümçülük təsərrüfatını da bərbad hala salıb. Artıq günü-gündən rayonda vəziyyətin getdikcə dramatikləşməsi, çoxsaylı sosial problemlərin baş qaldırması, sakinlərin üzləşdikləri haqsızlığın, süründürməçilik amillərinin tüğyan etməsi və digər olayların baş verməsi, onu söyləməyə əsas verir ki, bu gün Vaqif Abdullayevlə vidalaşmağın zamanı çatıb. Ətraflı növbəti sayımızda.

Mətləb Balakişiyev

gundemxeber.az