Amma, icra başçısının yaxın qohumları və ona bu və ya digər yollarla bağlı olanlar vəzifə sahibidirlər
Ölkəmizin şirvan zonasında yerləşən rayonlar içərisində daha çox sosial problemlərin yaşandığı, süründürməçilik amillərinin tüğyan etdiyi, qohumbazlıq, dostbazlıq faktorunun qabardıldığı və digər çoxsaylı xoşagəlməz olayların yaşandığı Ağsuda, hal-hazırda vəziyyət daha kritikdir. Hələ bu azmış kimi məmur özbaşınaslıqlarının tüğyan etməsi isə, tamam başqa bir mövzunun söhbətidir.
Faciə odur ki, əslən Ağsudan olan və neçə illərdir ki, rayonda icra başçısı vəzifəsini daşıyan Ənvər Seyidəliyevlə bağlı dövrü mətbuatda silsilə tənqidi açıqlamalar yer alsa da, rayonda vəziyyət azacıq da olsa qaydaya salınmır. Əldə etdiyimiz məlumatlara görə, bu gün də icra başçısının əsas vəzifəsi sakinlərin problemlərini həll etmək deyil, daha çox şəxsi məsələlərinin həlli ilə məşğul olmaqdan ibarət olur. Belə bir səbəblər üzündəndir ki, rayonda sakinlərin haqq səsi eşidilmir, narazılıq hissi pik nöqtəyə çatır.
Ümumiyyətlə, media üzərindən apardığımız araşdırmalar zamanı “Gündəm Xəbər” olaraq belə bir qənaətə gəlmişik ki, ölkəmizin şirvan zonasındakı rayonlar içərisində yerləşən Ağsuda, hal-hazırda daha acınacaqlı durum yaranıb və bunun da nəticəsi olaraq, sakinlər sosial problemlər məngənəsində boğulmaqdadırlar. Adicə bir məqama diqqət yetirək ki, bu gün əli-ayağı tutan hər kəs rayonu tərk edir, kəndlər boşalır, iş yerləri tapılmır, sosial problemlər aşıb-daşır. Amma, icra başçısının yaxın qohumları və ona bu və ya digər yollarla bağlı olanlar vəzifə sahibidirlər.
İllər uzunu Ənvər Seyidəliyevin rayonda gördüyü işlər, yalnız üzlük daşlar çəkdirməkdən ibarət olur. Belə ki, o, rayonun hansı ərazisində təmir-bərpa işləri aparılacaqsa, ilk öncə həmin ərazilərdə dağıntı-söküntü işlərini apartdırır, sonra da üzlük daşlar çəkdirir. Diqqəti cəlb edən hal o olur ki, təmir-bərpa işləri ilə bağlı lazımi materiallar, məhz Ənvər Seyidəliyevə məxsus obyektlərdən alınır. Amma, onu da unutmaq olmaz ki, həmin materiallar olduqca şişirdilmiş qiymətlərə alınır ki, bu da külli miqdarda büdcə vəsaitlərinin mənimsənilməsi ilə nəticələnir.
Rayonun iqtisadiyyatında yaşanan acınacaqlı durumun varlığı onu göstərir ki, əksər toplantılarda, ayrı-ayrı obyektlərin açılışında səslənən fikirlər, sanki baş aldatmaqdan başqa bir şey deyil. Məsələn, adicə bir məqama diqqət yetirək. Statistik açıqlamalara görə təqribən 75 min əhalisi olan Ağsuda, bu gün cəmi bir zavod işləyir. İşləyir necə? Çünki, ona görə necə deyirik ki, həmin zavodun açılışında yalandan açıqlama söylədilər ki, “Azqranata” zavodunda 500 nəfər işləyəcək. Bəs bu gün neçə nəfər işləyir? “Gündəm Xəbər” olaraq əldə etdiyimiz məlumatlara görə, hal-hazırda həmin zavodda cəmi 50-60 nəfər çalışır.
Ağsunun əsas dərdi, yuxarıda qeyd etdiyimiz kimi işsizlik problemidir. Sakinlər iş yerləri tapa bilmədiklərindən, ünvanlı sosial yardım almaq məqsədilə aidiyyəti üzrə müraciət edirlər. Bu müraciətlərin də dərdi tapılmır. Buna səbəb, ünvanlı sosial yardımla bağlı məsələlərin də, bir qrup şəxsin əlində olmasıdır.
Ağsuda iqtisadiyyatın məhvə düçar edilməsinin əsas səbəblərindən biri isə, kənd təsərrüfatı sahələrinin lazımınca inkişaf etdirilməməsidir. Bu sahə də icra başçısı başda olmaqla təsir dairəsində saxlandığından, kənd təsərrüfatı işləri ilə bir qrup şəxs məşğul olurlar ki, onlar da rayonu talamaqla məşğuldurlar. Verilən məlumatlara görə, bəzi sahibkarlara verilməli olan subsidiyalar məqsədli şəkildə mənimsənilir, bu da kənd təsərrüfatı sahəsinin çökməsinə təsir edən əsas səbəblərdən olur.
Bu gün rayonda tam əksəriyyət danışır ki, icra başçısı bələdiyyə torpaqlarını və əhəmiyyət kəsb edən digər əraziləri ələ keçirib. Belə bir addımlar atmaqla o qədər qanunsuzluğa qol qoyulub ki, hətta hüquq-mühafizə orqanı əməkdaşları da, sakinlərin haqlı narazılıqlarını eşitmirlər. Sözsüz ki, bu cür addımların hər birinin arxasında Ənvər Seyidəliyevin “barmağı” və onun təsir imkanları durur.

Yerli sakinlər “Gündəm Xəbər”ə bildirirlər ki, artıq rayon ərazisində satılmalı torpaq sahələri qalmayıb. Hələ bunlar azmış kimi, Şəhidlər Xiyabanının ətraf əraziləri də ələ keçirilib. Sözsüz ki, həyata keçirilən satış əməliyyatlarının hər biri, icra başçısının “dobro” deməsindən sonra baş tutur.
Ağsu sakinlərindən tam əksəriyyətinin dolanışıq vəziyyətlərinin minimum həddə olmasına baxmayaraq, hal-hazırda sakinlərin ən böyük problemləri, Ağsu rayon Qaz İstismarı İdarəsi ilə yaşanmaqdadır. Belə ki, bu haqda da məlumatları “Gündəm Xəbər”ə çatdıranlar onu da vurğulayırlar ki, qış fəslinin soyuq günlərində idarənin əməkdaşları sakinlərin vəziyyətini nəzərə almadan, borcu olanlardan qaz pulu yığılmağa başlayıblar. Hər ünvandan 50-100 manat arası pul tələb edirlər. Baxmayaraq ki, əvvəlki borclar illər öncə bağışlansa da, idarənin əməkdaşları indi həmin pulları geri tələb edirlər. Qol qoyulan qanunsuzluqlarla bağlı kimə, hara şikayət ediriksə bir kimsə şikayətlərə baxmır. Buna da səbəb, Qaz İstismarı İdarəsi rəisinin icra başçısına bağlı şəxs olmasıdır.

Ağsunun bənzəri olmayan problemlərindən biri də, rayonun əslən Ağsudan olan bir neçə nəfər vəzifə sahibi tərəfindən bölüşdürülməsidir. Həmin şəxslərdən biri bugünkü icra başçısı Ənvər Seyidəliyev, digəri onun bacısı oğlu olan, hal-hazırda ƏƏSMN vəzifəsini daşıyan Səlim Müslümov və digəri isə, ARDNŞ-də söz sahiblərindən biri olan Mikayıl müəllimdir. Bir qədər araşdırmalar aparılarsa, o da bəlli olar ki, rayonun mərkəzi ərazilərindəki obyektlərin çoxu adı çəkilən vəzifə sahiblərinə məxsusdur. Yəni, həmin obyektlərə kənar bir kimsənin sahiblik etməsini müəyyən etmək, yəqin ki, olduqca müşkül məsələ olar.

Rayonda olan obyektlərin ələ keçirilməsindən başqa, Ağsudakı idarə, müəssisə, təşkilat və digər qurumların rəhbərliyində duranlar da, onlara bağlı şəxslərdirlər. Daha çox isə, icra başçısının yaxın qohum-əqrəbasıdır.
Ümumi şəkildə götürdükdə, sakinlər Ənvər Seyidəliyevin icra başçısı olduğu müddət ərzində, onun rayonun inkişafı üçün dəyərli bircə işini belə dilə gətirə bilmirlər. Çünki o, icra başçısı təyin olunduğu gündən yerli sakinlərin gününü qara edib. Yalnız öz qohum-əqrəbalarını ətrafına yığıb və belə bir yolla da, rayonu idarə etməkdədir. İcra başçısının qəbul günləri olsa da, belə bir durum yalnız sözdədir. Ona görə sözdədir deyirik ki, onun qəbuluna düşməyin özü olduqca müşkül məsələdir.
Araşdirmamiz davam edəcək və növbəti saylarımızda daha müfəssəl məlumatlarla çıxış etməyə çalışacağıq.
Akif

gundemxeber.az