Komitə sədri Azərbaycanda yeni pivə zavodu tikdirir; Zavod gələn ilin ortalarına qədər hazır olacaq

Dövlət Əmlak Komitəsinin sədri Kərəm Həsənovun spirtli içki biznesinə olan marağı hər kəs məlumdur. Çexiyanın müxtəlif şəhərlərində pivə və digər spirtli iççi zavodları olan komitə sədrinin bu zavodlarda istehsal olunan məhsulu yalnız Azərbaycana deyil, həm də Avropanın bir çox ölkələrinə ixrac etdiyi KİV-in zaman-zaman gündəmə gətirdiyi məsələlərdən biridir. Bugünlərdə redaksiyamıza müraciət edən özəl mənbə komitə sədrinin bu kəs Azərbaycanda yeni pivə zavodu açmağa qərar verdiyini söyləyib. Mənbənin sözlərinə görə, komitə sədri hələ bir neçə il bundan öncə belə bir zavodun tikilməsini planlaşdırsa da, bu addımı ilə diqqət cəlb edə biləcəyindən ehtiyat etmiş və və məlum planın reallaşmasını qeyri-müəyyən vaxta qədər təxirə salmlışdı. K.Həsənovun məlum planı yenidən gündəmə daşıması isə artıq komitə sədrinin məlum zavodla bağlı lazımi dairələrdən gərəkli razılıq aldığını göstərir.Tikiləcək zavodun miqyas və gücünə gəlincə, zavodun istehsal gücünün kifayət qədər böyük olacağı gözlənilir.

Çexiya pivəsinin Azərbaycan nümunəsi

Mənbənin bildirdiyinə görə, tikiləcək pivə zavodu üçün gərəkli olan bütün avadanlıqların Çexiyadan gətirilməsi planlaşdırılır. Əslində Çexiya avadanlığı əsasında istehsal ediləcək pivənin tərkibi də çex pivəsindən o qədər də fərqlənməyəcək: “Tikiləcək zavod üçün gərəkli olan emal avadanlıqlarının hamısı Çexiyadan gətiriləcək. İstehsal ediləcək pivə də Çexiyadan gələn mütəxəssislərin rəhbərliyi altında, çex üsulu ilə hazırlanacaq. K.Həsənovun Çexiyanın bir çox şəhərlərində bu cür zavodlatra malik olduğunu nəzərə alsaq, o zaman belə bir zavodun inşasının komitə sədri üçün heç də çətin başa gəlməyəcəyini təxmin etmək olar”.
Mənbənin sözlərinə görə, komitə sədrinə məxsus zavodda istehsal ediləcək məhsullar daxili bazarla yanaşı beynəlxalq bazara da çıxarılacaq ki, bu da onun keyfiyyət əmsalının yüksək olmasını zəruri edir: “Yeni pivə zavodunda istehsal olunacaq məhsul yalnız daxili bazara deyil, həm də dünya bazarına çıxarılacaq. Lakin dünya bazarında rəqabət çətin olduğu üçün komitə sədri istehsal ediləcək pivənin keyfiyyətinin yüksəkliyinin təmin olunmasını daha vacib sayır. Əslində pivə zavodunda əsas işlərin Çexiyadan dəvət alan xüsusi mütəxəssislər tərəfindən həyata keçiriləcəyi gerçəyi də komitə sədrinin bu məsələdə yerli mütəxəssislərə etibar etmədiyini göstərir. K.Həsənovun qənaətincə, pivə istehsalı sahəsində yüzillər boyudur ki, zəngin təcrübəyə malik olan Çexiya mütəxəssisləri bu işi yerli mütəxəssislərdən daha yaxşı görmək bacarığına malikdir”.

Komitə sədri spirtli içki bazarını çökdürəcək

Mənbənin məlumatına görə komitə sədrinin spirtli içi biznersinə gəlişi yerli bazar uğrunda mübarizəni şiddətləndirəcək ki, bu da yalnız iqtisadi əsaslarla deyil, həm də inzibati üsullarla həyata keçiriləcək: “Doğrudur, Azərbnaycandakı spirtli içki bazarı Qərb və digər ölkələrdə olduğu kimi oturuşmuş bazar olmasa da, hər halda bu bazarda müəyyən söz sahibi olan şirkətlərin olduğu inkaredilməzdir. Məhz bu baxımdan K.Həsənovun daxili bazar uğrundakı mübarizədə müəyyən müqavimətə rast gələcəyi istisna deyil. Lakin bütün bunlara rəğmən komitə sədrinin daxili bazarı ələ keçirməkdə ciddi çətinliklə üzləşməyəcəyi də məlum həqiqətlərdən biridir. Belə ki, külli miqdarda nəğd maddi vəsaitə malik olan, öz məhsulunun reklam kampaniyasına yetərincə pul sərf edən və lazımi əlaqələrə malik olan K.Həsənov qısa müddət ərzində digər məhsulları bazardan sıxışdırıb çıxardacaq ki, bu da onu ölkənin spirtli içki bazarının əsas söz sahibinə çevirəcəkdir”.
Zavodda pivə ilə yanaşı digər spirtli içkilərin də istehsal ediləcəyini bildirən mənbə, daxili bazarda pivə ilə birlikdə digər spirtli içkilərin də sıxışdırılacağını vurğuladı: “Zavodun əsas təyinatı pivə isttehsalı olsa da, pivə ilə birlikdə digər spirtli içkilıərin istehsal ediləcəyi də planlaşdırılır ki, bu da Azərbaycanın spirtli içki bazarında yeni bir dövrün başladığından xəbər verir. Heç şübhə yoxdur ki, K.Həsənovun başlatdığı yeni dövr ölkənin bütün spirtli içki bazarının gələcəkdə tam inhisara alınması ilə nəticələnəcək və bu bazar üzərindəki monopoliya möhkəmlənəcəkdir”.

Komitə sədrinin gələcək planlarının xülasəsi

Mənbənin bildirdiyinə görə, K.Həsənovun gələcək planları da miqyas etibarilə yetərincə böyükdür: “Pivə zavodunun inşası və ölkənin spirtli içki bazarını ələ keçirmək K.Həsənovun yalnız yaxın gələcək üçün müəyyənləşdirdiyi ilkin məsələlərdir. Komitə sədri bu missiyanı başa vurduqdan sonra mineral su bazarını da ələ keçirməyi planlaşdırır ki, K.Həsənovun bu məsələdə də kifayət qədər imkanlara malik olduğu danılmazdır. Məlumat üçün qeyd edək ki, komitə sədri Çexiyada mineral su istehsalı ilə məşğul olan bir neçə zavoda malikdir ki, onların istehsal etdiyi məhsul Azərbaycanla yanaşı Avropa bazarında da özünə yer edib. Lakin görünən odur ki, komitə sədri mineral su biznesini Azərbaycanda da genişləndirməyi nəzərdə tutur ki, bu da komitə sədrinin həm maddi, həm də siyasi gücünə uyğundur. Bir sözlə, yaxın günlərdə ölkə iqtisadiyyatının spirtli içki və mineral su bazarının K.Həsənov tərəfindən istilası gerçəkləşdiriləcək ki, bu istilanın nə ilə nəticələnəcəyini zaman göstərəcək”.

İlqar Rəsulov