Komitə sədri "torba" tikdiyi Fərhad Əliyevin taleyini yaşaya bilər

gundemxeber.az Əmlak məsələləri üzrə dövlət komitəsinin sədri Kərəm Həsənovun karyerası təhlükə altındadır. Bu barədə "Gündəm Xəbər"ə daxil olan məlumatlarla görə, yuxarı səviyyələrdə Kərəm Həsənovla vidalaşmaq məsələsi müzakirəyə çıxarılıb. Məlumatlarda deyilir ki, komitə sədrinə qarşı münasibətin dəyişməsi onun fövqəladə hallar naziri Kəmaləddin Heydərovun hədəfinə gəlməsilə bağlıdır.
Oxucuların diqqətinə çatdıraq ki, Kərəm Həsənov vaxtilə sabiq iqtisadi inkişaf naziri Fərhad Əliyevin kölgəsi altında fəaliyyət göstərib. Sonradan sabiq nazirin rəqibi Kəmaləddin Heydərova sığınıb və əvvəlki "şef"inin həbsində müstəsna rol oynayıb. Fərhad Əliyevin həbsində göstərdiyi "xidmətlərə" görə Kərəm Həsənova daha çox qazanmaq üçün şərait yaradılıb. Komitə sədri də qısa müddət ərzində özünün iqtisadi imperiyasını qura bilib.
Bundan sonra iddiaları daha da artıb. O, hətta yaxın çevrələri ilə söhbətdə baş nazir olmaq arzusunu və bu post uğrunda özünəməxsus şəkildə mübarizə apardığını dilə gətirib. Bu söhbətlər Kəmaləddin Heydərovun qulağına çatıb və "fövqəlnazir"i hiddətinə səbəb olub. Kəmaləddin Heydərov düşünüb ki, artıq Kərəm Həsənovun "vurulmasının" vaxtı çatıb. Beləliklə də bu məsələ hakimiyyət dəhlizlərində müzakirəyə çıxarılıb. Bəzi məlumatlara görə, müzakirələrdə komitə sədrinin həbsi məsələsi də ortaya atılıb.
Məlumatlarda deyilir ki, Kərəm Həsənov da bu müzakirələrdən duyuq düşdüyündən indidən tədbir görməyə başlayıb. Məsələn, onun əmlaklarını başqalarının adına keçirməyə başladığı bildirilir. Hətta bu günlərdə mətbuatda belə məlumat yayıldı ki, komitə sədri xarici ölkələrdəki, konkret Birləşmiş Ərəb Əmirliklərindəki mülklərini də başqa şəxslərin adına rəsmiləşdirir.
Məlumatlarda həmçinin qeyd edilir ki, Kərəm Həsənovun "vurulması" istiqamətində atılan addımlardan biri də onun son dövrlər hərrac maxinasiyaları da yol açıb. Kərəm Həsənov adətən Əmlak Məsələləri üzrə Dövlət Komitəsində bir sıra dövlət əmlakının hərracını düzgün təşkil etməyib. Bu halda məmurların maraqlarında olan əmlaklar komitə sədrinin yaxın adamları tərəfindən satın alınıb. Adətən bu tip hərracların nəticəsi barədə komitənin orqanı olan "Mülkiyyət" qəzetində dərc edilir. Lakin bəzi hallarda isə Kərəm Həsənovun tapşırıqları ilə hərracın nəticəsi sözü gedən qəzetdə verilimir, yaxud da həddən artıq kiçik hərflərlə çap edilir ki, bunu oxumaq mümkün olmasın.
Bütün bunlar bir daha göstərir ki, Kərəm Həsənovla məsələ çox ciddidir. Ehtimal etmək olar ki, yaxın gələcəkdə komitə sədrinin "kitabı" bağlanacaq.

Azər Talıbov