Gədəbəydə PA-dan göndərilmiş məktuba məhəl qoyulmur

Qəbul edilmiş əsasnamənin varlığına baxmayaraq, bu gün Gədəbəydə şah qanun olduğundan, qəbul edilmiş prinsiplər Ramiz Yediyarov tərəfindən qulaqardına vurulmaqdadır

“Gündəm Xəbər” qəzetinin ötən sayında Gədəbəy rayon sakini Əliyev Oqtay Qara oğlunun üzləşdiyi problemdən, yəni rayonun M.Quliyev küçəsində ona məxsus 0,06 ha torpaq sahəsində 38,5 kvm-lik sahəsi olan birmərtəbəli qeyri yaşayış binasını, hansı ki, 12 fevral 2015-ci il tarixə qədər ondan ərzaq mağazası kimi istifadə edirdi, həmin mağazanın yerlə-yeksan edilməsindən bəhs etmişdik. Problem artıq respublika ictimaiyyətinə bəlli bir problemə çevrilib ki, onun da əmələ gəlməsinə rayon rəhbərliyinin verdiyi qanunsuz tapşırıqlar olub. Bu günədək aidiyyəti dövlət qurumlarına, bir çox vəzifə sahiblərinə ünvanladığı müraciətlərində Oqtay Əliyev, yalnız üzləşdiyi problemin ədalətli həllinə nail olmaq istəsə də, Ramiz Yediyarovun tətbiq etdiyi idarəçilik buna imkan verməyib. Yəni, o, qanuni sənəd-sübutu olan obyektinə eksper komissiyası tərəfindən qiymətləndirilmiş 50 min manat kompensasiyanı tələb etsə də, hələ ki, istəyinə nail ola bilməyib.

Diqqəti cəlb edən hal odur ki, Oqtay Əliyevə məxsus mağaza darmadağın edilərkən, atılan addım barədə heç bir məlumat verilməyib və ona məxsus əmlak ( hansı ki, daşınar və daşınmaz əmlak) yerlə-yeksan etdirilib. Belə bir halın varlığı da, Əliyevlər ailəsinin dolanışığını tam kəsir. Bu gün rayon rəhbərliyində əsas vəzifə sahiblərindən biri olan Qüdrət Paşayev, atdıqları addımın müqabilində müəyyən edilmiş kompensasiyanı ödəmək əvəzinə, Oqtay Əliyevə 20 min manat pul və yeni tikilmiş ticarət mərkəzində heç bir sənədi olmayan 17 kvm-lik obyekt təklif etsə də, qarşı tərəf edilmiş təklifdən imtina edir. Buna səbəb həm də o olur ki, inşa olunmuş obyektlər 35 kv-luq yüksək gərginlikli elektrik xətlərinin altında yerləşir.

Maraqlı hal odur ki, icra hakimiyyətinin başçısı hələ 16 fevral 2015-ci il tarixdə, rayonun memarlıq və tikinti şöbəsi müdirinin iş otağında Oqtay Əliyevə yeni obyekt verilməsi barədə təklif versə də, o edilmiş təklifdən imtina edir. Belə olan halda Ramiz Yediyarov şöbənin müdiri Elxan Vəliyevə tapşırıq verir ki, edilmiş təklifdən imtina barədə şikayətçidən ərizə alın. Elə ki, Oqtay Əliyev imtina haqda ərizəsini təqdim edir, bu zaman Elxan müəllim bildirir ki, “belə olan halda biz maliyyə idarəsinin rəisi Namiq Məmmədova tapşırıq verərik ki, sənə vermək istədiyimiz obyekti satışa çıxartsın və əldə olunan “haqq-hesab”ı da sənə versin. Problemin həllinə icra hakimiyyəti rəsmləri tərəfindən bu cür yanaşma göstərilərkən, Oqtay Əliyev hövsələdən çıxır və qarşı tərəfə sual da ünvanlayır. Görəsən Namiq müəllim alqı-satqı şöbəsinin müdiridir, yoxsa maliyyə idarəsinin rəisidir?

Bir məqama da toxunaq ki, Oqtay Əliyevə məxsus obyekt yerlə-yeksan edildikdən sonra, həmin ərazidə fontan tikməyə başlayırlar. Amma, inşaat işləri aparılarkən rayon rəhbərliyi xəsislik nümayiş etdirir və yeni tikinti malları almaq üçün büdcə vəsaitini xərcləmək niyyətindən “vaz” keçir. Məqsədi yəqin ki, ayrılmış həmin vəsaitə də “əl gəzdirmək” olur. Belə olan halda o, Oqtay Əliyevə məxsus obyektdən sökülmüş “kubik” daşlardan istifadə etməyə qərar verir. [ gundemxeber.az ] Etdikləri xəsisliyi ört-basdır etmək üçün, teztələsik inşaası qismən başa çatdırılmış fontandan birini suvaqla üzləyə bilsələr də, digər fontandakı bicliklərini gizlədə bilmirlər. Hələ bunlar azmış kimi, fontanların inşaası aparılan zaman, yaxınlıqdakı şəhidlər binasına, digər yaşayış

binalarına gedən yol da bağlanır. Belə bir halın varlığı da, çoxsaylı sakinlərin haqlı narazılığına səbəb olur.

Bəli, bu gün Oqtay Əliyev üzləşdiyi problemin həllini PA axtarmağa vadar olduğundan o, 08 sentyabr 2015-ci il tarixdə ailəlikcə qeyd olunan qurumun qəbul şöbəsində olurlar. Həmin vaxt PA səlahiyyətlisi onlara bildirir ki, daxili telefonla 14-83-ə zəng edin, sizə hər şey açıq-aydın izah olunacaq. [ gundemxeber.az ] Oqtay Əliyev qeyd olunan nömrəyə zəng edərkən, telefona cavab verən xanım bildirir ki, “A-3881-149 kodu ilə sizin şikayətiniz, 29 avqust 2015-ci il tarixdə həlli üçün Gədəbəy rayon İcra Hakimiyyətinə göndərilmişdir”. Təəssüf doğuran hal odur ki, həmin vaxtdan bu günədək göndərilmiş məktubla bağlı icra hakimiyyəti rəsmlərindən bir kimsə Oqtay Əliyevə nəsə demir, hansısa formada da maraqlanmırlar.

Baxmayaraq ki, ölkə rəhbərinin 06 iyun 2012-ci il tarixli Fərmanı ilə təsdiq edilmiş, yerli icra hakimiyyətləri haqqında Əsasnamədə bildirilir ki, yerli icra hakimiyyətlərinin başçıları öz fəaliyyətlərini vətəndaşların hüquq və azadlıqlarının, qanuni mənafelərinin müdafiəsi, müvafiq ərazinin əhalisinin rifahını yaxşılaşdırmaq naminə iqtisadiyyatın, sosial və mədəni sahələrin inkişafının təmin edilməsi, qanunçuluq, aşkarlıq və ictimai rəyin nəzərə alınması prinsipləri əsasında qururlar. Qəbul edilmiş əsasnamənin varlığına baxmayaraq, bu gün Gədəbəydə şah qanun olduğundan, qəbul edilmiş prinsiplər Ramiz Yediyarov tərəfindən qulaqardına vurulmaqdadır. Bu da onu söyləməyə əsas verir ki, Gədəbəydə rayon rəhbərliyi mütləqi-hakimdir.

Araşdırmamız davam edəcək

Mətləb Balakişiyev

gundemxeber.az