Diqqəti cəlb edən hal odur ki, Gədəbəydə tətbiq olunan yarıtmaz idarəçilik, təkcə Oqtay Əliyevi deyil, artıq neçə-neçə sahibkarı da ayağa qaldırıb
“Gündəm Xəbər” qəzetinin ötən saylarında, bir müddət bundan əvvəl Gədəbəydə bir neçə sahibkarın başına gətirilən müsibətlərdən, qol qoyulan qanunsuzluqlardan, süründürməçilik amillərindən, çoxsaylı sakinlərin tapdanan hüquqlarından və.s geninə-boluna bəhs etmişdik. Yazıb onu da bildirmişdik ki, rayon rəhbərliyinin verdiyi şifahi tapşırıqlar əsasında, əslən Gədəbəydən olan sahibkarlara məxsus obyektlər, hələ bir müddət bundan əvvəl heç bir əsas olmadan yerlə-yeksan edilmiş və nəticədə həmin sahibkarlara külli miqdarda ziyan da zəymişdir. Belə bir haqsızlıqlarla üz-üzə qalan sahibkarlardan Əliyev Oqtay Qara oğlu, Səfərov Vaqif Qara oğlu, Məmmədov Qasım Nəriman oğlu, Əliyev Oqtay İbrahim oğlu, Mahmudov Natiq Nuru oğlu və digərlərinin, ötən müddət ərzində döymədiyi qapı, narahat etmədiyi vəzifə sahibləri qalmadı. Diqqəti cəlb edən hal odur ki, bu gün ölkə rəhbəri cənab İlham Əliyev sahibkarlığın inkişaf etdirilməsi, sahibkarların sahibkarlıq fəaliyyəti zamanı üzləşdikləri problemlərin aradan qaldırılması istiqamətində dəfələrlə tapşırıqlarını verib. Yerli vəzifə sahiblərinə sahibkarlığın inkişafı ilə bağlı, hətta lazımi köməkdarlıq etmələrini də tapşırıb. Çünki, ölkəmizdə sahibkarlığı inkişaf etdirmədən dayanıqlı iqtisadiyyata, əhalinin zəruri mallara olan ehtiyaclarını heç cür ödəmək olmaz.
Bəs bu gün nələr baş verir ki, bir çox sahibkarlar kimi Əliyev Oqtay Qara oğlu da, dövlətimizin aşağı instansiyasından düz Prezident Administrasiyasına qədər şikayətlərini ünvanlayır. Məqsədi, yalnız və yalnız o olur ki, Gədəbəy rayon İcra Hakimiyyətinin başçısı Ramiz Yediyarovun verdiyi şifahi tapşırıq əsasında, onun tam mülkiyyətində olan 38,5 kvm-lik mağazasının hansı səbəbdən darmadağın edilməsinə aydınlıq gətirə bilsin və ona vurulmuş maddi ziyanın ödənilməsinə də nail olsun. Təəssüf doğuran hal odur ki, özünün haqlı olduğunu bilən Oqtay Əliyev, bu günədək də haqqına qovuşa bilməyib. Buna səbəb, rayon rəhbərliyinin yaratdığı şərait, tətbiq etdiyi idarəçiliyin varlığıdır.
Bir anlığa olub keçənlərə nəzər salaq. Yediyarov zülmündən təngə gələn, onun qanunsuz tapşırıqları əsasında külli miqdarda ziyan çəkən sahibkarlar Gədəbəydə haqqına qovuşa bilmirlər və son anda məcbur olurlar ki, problemlərinin mahiyyətini PA-da müəyyən rəsmlərə çatdırsınlar. Bu belə də olur və administrasiya rəsmisindən onlara, o cümlədən Əliyev Oqtay Qara oğluna bildirilir ki, “gedin Gədəbəyə, sizin problemləriniz ilə məşğul olub həll edəcəklər” vədi verilsə də, son anda heç bir problem həllini tapmır. Faciəli hal odur ki, şikayətçi sahibkarların problemləri ilə bağlı Prezident Administrasiyası rəsmisinin verdiyi tapşırıq Gədəbəydə saya salınmır və şikayətçilər icra hakimiyyətində şöbə müdiri səviyyəsində qəbul olunurlar. Son anda da heç bir nəticə alınmır.
Bugünkü durumu haqda “Gündəm Xəbər”ə danışan Əliyev Oqtay Qara oğlu onu da bildirir ki, “səhhətimdə olan problemim fiziki işlə məşğul olmağa imkan vermir. Hal-hazırda ailəlikcə Bakı şəhərində kirayədə və maddi sıxıntılar içərisində yaşayıram. Gədəbəydəki 38,5 kvm-lik obyektimi işlədərkən ailəmi də dolandırırdım, müəyyən problemlərimi də həll edirdim. Elə ki, Ramiz Yediyarovun verdiyi şifahi tapşırıq əsasında mülkiyyətimdə olan obyektim, heç bir xəbərdarlıq olunmadan yerlə-yeksan edildi, o halda ailəmin dolanışığı da kəsildi, problemlərim də çoxaldı. Bu da mənim rayon rəhbərliyindən əldə etdiyim “qazancım” oldu” deyir.
Digər tərəfdən onu da vurğulaya bilərik ki, Ramiz Yediyarovun Gədəbəydə tətbiq etdiyi idarəçilik, nədənsə arxasız, köməksiz, kimsəsiz iş adamlarına qənim kəsilir və bir kimsə də bu sahə ilə məşğul olmaq istəyərsə, mütləq o, rayon rəhbərliyi ilə hesablaşmağa məcbur edilir. Amma, bəzi iş adamlarına “yaşıl işıq” yandırılır. Bunun bir çox özəl səbəbləri var ki, onların da mahiyyətini Ramiz Yediyarovla bərabər, rayonun əsas söz sahiblərindən biri hesab olunan Namiq Məmmədov da çox gözəl bilir. Məsələn, rayonun maliyyə idarəsinə rəhbərlik edən və ən imkanlı şəxslərindən biri olan Namiq Məmmədov, vaxtilə ona məxsus aptek plana düşsə də, onun sökülməsinə imkan vermədi. Bu gün o, təkcə daşıdığı vəzifəsi ilə deyil, həm də ona hər ay külli miqdarda gəlir gətirən obyektlərə nəzarət etməklə də, ən imkanlı şəxslərdən birinə çevrilib. Bu da onu söyləməyə əsas verir ki, Namiq Məmmədov bu gün vəzifə daşımaqla bərabər, həm də sahibkarlıq fəaliyyəti ilə də məşğul olmaqdadır.
Bir məqamı da vurğulayaq ki, rayon rəhbərliyinin mürtəce idarəçiliyindən zinhara gələn, problemlərinin həllinə hələ də nail ola bilməyən sahibkarlar, bir neçə gün bundan əvvəl haqq səslərini geniş iştimaiyyətin diqqətinə çatdırmaq üçün, mətbuat konfransı keçməyə də qərar verirlər. Konfransın gedişi zamanı onlar üzləşdikləri problemlərdən bəhs edir və ölkə rəhbərinə açıq müraciətlərini də ünvanlayırlar. Tədbirin keçirildiyi gün, ANS televiziya şirkəti saat 18.00 xəbərlər buraxlışında mətbuat konfransından bəhs edən açıqlamanı yayır. Çox keçmir ki, Gədəbəy rayon İcra Hakimiyyəti Aparatında hüquq şöbəsinə rəhbərlik edən Zülfüqar İsgəndərov, ANS televiziya şirkətinə zəng edərək bildirir ki, “həmin şəxslərin sahibkarlıq fəaliyyəti ilə məşğul olmalarına aid, onların heç bir rəsmi sənədləri yoxdur”. Dərhal şirkət rəsmləri tərəfindən ANS-ə dəvət olunan sahibkarların, o cümlədən Əliyev Oqtay Qara oğlunun, Səfərov Vaqif Qara oğlunun və Əliyev Oqtay İbrahim oğlunun sənədlərinə baxış keçirilir. Eyni zamanda onlardan təkrar reportaj da hazırlayıb, həmin gün “İç Xəbər” proqramının 23.30 buraxlışında canlı şəkildə səsləndirirlər. Maraqlı hal o olur ki, təkrar ANS televiziya şirkətinə zəng edən Zülfüqar İsgəndərov bu dəfə bildirir ki, Əliyev Oqtay Qara oğluna məxsus obyekti Gədəbəy rayon İcra Hakimiyyəti deyil, “Rabitə Bank” söküb. Onun belə bir danışıqları və əldə olunan sənədlər, icra rəsmisinin tamamilə yalan danışdığını açıq-aşkar ortaya çıxarır. Çünki, həmin günün səhəri Oqtay Əliyev oğlu ilə birlikdə “Rabitə Bank”a gedir və Zülfüqar İsgəndərovun “İç Xəbər” proqramına zəng edib danışdıqları çəklişin videosunu banka təqdim edir. Həmin vaxt bank rəhbərliyi təqdim olunan video çəklişə baxdıqdan sonra, Zülfüqar İsgəndərovla əlaqə saxlayıb məsələyə aydınlıq gətirməsini istəyir. O, isə bank rəhbərliyinə yazdığı cavab məktubunda bildirir ki, “Əliyev Oqtay Qara oğluna məxsus obyekti bank yox, elə onun özü söküb” cavabını yazır. Diqqəti o halda cəlb edir ki, elə ki, Oqtay Əliyev ona məxsus obyektin Gədəbəy rayon İcra Hakimiyyəti rəsmləri tərəfindən 12 fevral 2015-ci il tarixdə sökülməsi barədə xəbər tutur və ləngimədən söküntü barədə ANS televiziya şirkətinə yazılı ərizə ilə də müraciət edir. Bu da onu söyləməyə əsas verir ki, Ramiz Yediyarovun formalaşdırdığı komandanın üzvüləri, o cümlədən Zülfüqar İsgəndərov da olduqca savadsız və naşı kadrdır. Belə bir səbəblər üzündəndir ki, bu gün sahibkarlar Zülfüqar İsgəndərovu məhkəməyə vermək qərarına da gəliblər. Səbəb də onun həm on ay müddətinə Oqtay Əliyevə, həm də ANS televiziya şirkəti ilə bərabər, “Rabitə Bank”a da yalan danışmasıdır.
Bu günədək bəzi vəzifə sahiblərinə, ayrı-ayrı dövlət qurumlarına üzləşdiyi probleminin həlli ilə bağlı ümid bəsləyən Əliyev Oqtay Qara oğlu, artıq onlardan kömək olacağına inanmadığını vurğulayır. Çünki, o, bizimlə söhbətində daim vurğulayır ki, “Gədəbəydə Ramiz Yediyarov elə bir idarəçilik həyata keçirməkdədir ki, həyata keçirilən idarəçilik problemləri həll etmir, sanki problemlərin üstünə yeni-yeni problemlər də gətirir. Mən artıq yorulmuşam, boş-boş vədləri eşitməkdən təngə gəlmişəm deyərək, ümidsizliyə qapandığını da dilə gətirir. Bu gün mən heç kimə yox, yalnız və yalnız ölkə rəhbəri cənab İlham Əliyevə güvənirəm, ona inanıram. Çünki, ona inanıram ki, ölkə rəhbərinin bəzi vəzifə sahiblərinə barmaq silkələməsi, çoxlarının, o cümlədən mənim problemimin həlli də demək olacaq.”

P.S. Hörmətli oxucular! Növbəti sayımızda Əliyev Oqtay Qara oğlunun dəqiq faktlara
söykənən açıqlamalarını oxuya biləcəksiniz. Odur ki, bizi izləməyi unutmayın.

Akif Quliyev

”Gündəm Xəbər”