Seçki ilində “şimal küləkləri” gücləndikcə, hakimiyyətin qoca əlləri titrəyib əsməyə başlayır

“Milyarderlər İttifaqı”nın nümayəndəsi Söyün Sadıqovun açıq hədələrinin pərdəarxası məqamları...

“Seçkilər mürəkkəb olacaq” - bu anonsu nə yerli ekspertlər, nə də ənənəvi müxalifət liderləri səsləndirib. Bu dəfə həyəcan təbili qonşu Rusiyadan gəlib. Prezident seçkiləri ilində “şimal küləklərinin” güclənməsi Azərbaycanın siyasi səhnəsində “qladiator” döyüşlərinin başlanacağından xəbər verir.

“O namizəd” kimdir?

Belə ki, Rusiya Azərbaycanlıları Federal Milli Muxtariyyətinin (AzerRos) keçmiş prezidenti, hazırda partiya yaratmaqla məşğul olan Söyün Sadıqovun yeni müsahibəsi bir çox mətləblərə gün işığı salmış oldu. S.Sadıqov bu ilin payızında Azərbaycanda seçkilərin mürəkkəb keçəcəyinə eyham vurmaqla rəsmi Bakının dalağını sancdı.
Çox çəkmədi ki, Sadıqovun açıqlamasından qıcıqlanan YAP-çı deputat Siyavuş Novruzov ona cavab verdi. Novruzov əslində hakimiyyətin təlaşını nümayiş etdirirdi. İlk baxışdan görünə bilər ki, Sadıqov Rusiya vətəndaşıdır və onun Azərbaycandakı seçkilərin necə keçəcəyi barədə proqnoz verməsi yersizdir. Belədirmi? - əsla.
Rusiyanın bütün dövrlərdə Azərbaycandakı seçkilərə təsir etdiyini hətta siyasətdən kənar çoban da bilir. Belədə bu il Rusiyanın seçkilərə müdaxilə etməyəcəyini deyənlər yanılır. Üstəlik, müdaxilə heç də Əliyev rejiminin aktivinə yazılmayacaq.
Sitat: “Rusiya azərbaycanlıları Azərbaycanda o namizədi dəstəkləyəcək ki, proqramı Rusiya ilə sonrakı dostluq münasibətlərinin saxlanılmasına istiqamətlənsin”. Sadıqov konkret ad çəkmir. İlham Əliyevə dəstək veriləcəyini ifadə etmir və “o namizəd” kartının kimliyini açıqlamır. Sirr pərdəsi isə yalnız o vaxt götürüləcək ki, Əliyevlə Putinin münasibətlərindəki soyuqluq seçkilərdə öz əksini tapacaq. “Milyarderlər İttifaq”ının üzvü olan Sadıqovun “o namizəd” kəlməsinin üzərindən sükutla keçmək mümkün deyil. Kimdir o namizəd?
Bəlkə Rüstəm İbrahimbəyovdur? Ya Abbas Abbasovdur? Bütün cavabsız suallara seçkiyə qısa vaxt qalmış aydınlıq gətiriləcək. İndilik isə Sadıqovun müsahibəsində yer alan ikinci məqama toxunmamış Bakı ilə Moskva arasındakı əlaqələrin korlanma səbəblərinə nəzər yetirək.

Putinə “əzələ nümayişi”

Əvvəla, Qərbi “kürü diplomatiyası”, enerji təhlükəsizliyi və neft çəlləyi ilə satın aldığına inanan hakimiyyət güman edirdi ki, bununla da 2013-də İlham Əliyevin legitimliyini növbəti dəfə rəsmiləşdirə biləcək. Bu arxayınlıq bütün diktaturalara xasdır və onlar Qərbdən gələn təhlükənin sovuşduğuna əmin olanda seçkini saxtalaşdırır, alternativlərini sıradan çıxarır, etirazları zorakılıqla boğur və taxt-taca sahiblənir.
Əmin olur ki, ona “gözün üstə qaşın var” deyən olmayacaq. Qərb təşkilatları “demokratiyaya doğru daha bir addım” bəyanatı ilə seçkiləri neft-qaza qurban verəcək. Əliyevin də bu arxayınlığı özünü son iki ayda daha nümayişkaranə şəkildə büruzə verdi. AŞPA-da lobbiçiliyin hesabına siyasi məhbuslar barədə qətnamənin keçməməsi iqtidar üçün toy-bayrama çevrildi. Səməd Seyidovun sevinc göz yaşlarını görməmək mümkün deyildi.
Ştrasserin hesabatını “kürü diplomatiyası” ilə arxivə göndərən hakimiyyət dərhal repressiya aparatının dişlərini itiləməyə başladı. Müsavat başqanının müavini Tofiq Yaqublu və REAL sədri İlqar Məmmədov İsmayıllı üsyanında təqsirləndirilib həbs edildi. Hər iki siyasətçinin həbsinin iki başı var idi. Daxildəki sosial narazılığı yatırıb siyasi arsenala çıxarmaqla xalqı xof mühitində saxlamaq, həm də seçki ərəfəsində Qərblə yenidən alverə getmək. Seçkini al, siyasi məhbusları azad et. Ancaq Moskva “göz yaşlarına inanmır”.
Əliyevin Qərbdən gözlədiyi təhlükə əslində qapısının ağzında mövcud imiş. Putinlə 2008-ci ildən bəri görüşməyən Əliyevin Rusiya ilə münasibətlərdə tarana getdiyi göz qabağındadır. Əvvəlcə Gömrük İttifaqına qoşulma təklifini rədd etdi. Daha sonra Qəbələ RLS-in illik icarə haqqını fantastik dərəcədə artıraraq Rusiyanı buradan çıxardı, RLS bağlandı. Bu da azmış kimi, Kremlin əleyhinə olan TANAP layihəsinə qoşuldu. Beləliklə, Əliyev “Milyarderlər İttifaqı” adlanan qüvvələrin timsalında Putini qarşısında görmüş oldu. Söyün Sadıqovun bu günü açıqlamaları da məhz özbaşına və havadan deyilməyən sözlərdir.

Söyün Sadıqovın bu günkü gəncliyi

Gəlin baxaq - Sadıqov müsahibəsində gənclər faktoruna diqqət çəkir: “Seçkilərin mürəkkəb olacağı dəqiq məlumdur. Bunu şərtləndirən bir neçə amil var: birincisi, bu günkü gənclər əvvəlki gənclər deyil. Onların mövqeyini nəzərə almamaq istənilən dövlət üçün ciddi səhv olardı”.
Heyhat! Tunisdə, Misirdə inqilabları məhz sosial şəbəkələrdə təşkilatlanan etirazçı gənclik etmədimi? Özünü yandırıb Tunisdəki etirazların alovlanmasına sadə bir gənc səbəb olmadımı? Azərbaycanda da sosial şəbəkələrin funksiyası getdikcə genişlənir. Gənclər facebook-da təşkilatlanıb etiraz aksiyaları keçirirlər.
Təşkilatsız, lidersiz, qərargahı və maliyyə resursları olmayan bu gənclər Bakının mərkəzi küçələrində hakimiyyət əleyhinə şüarlar səsləndirirlər. İctimai Palatanın qərarı olmadan meydanlara çıxan bu gənclər Sadıqovun nəzərdə tutduğu kimidir. Onlar əvvəlki müsavatçı-cəbhəçi gənclər kimi düşünmürlər. Yeni, proqressiv və kreativ bir gənclik yetişib. Onların amalları, düşüncələri, təhsil səviyyəsi belə fərqlidir. Bəziləri Avropa görüb, Qərb cəmiyyətlərində yaşayıblar.
Belə gənclər kökündən çürümüş, məddahlıq və korrupsiya üzərində qurulan belə şəraitdə yaşamaq istəmirlər. Sadıqov hakimiyyətə mesaj ötürür ki, bu gəncliklə hesablaşmaq vacibdir, onların mövqeyini nəzərə almayan hökumətlərin sonu yaxşı qurtarmır. Necə ki, Tunis və Misirdə gənclik avanqarda çevrilə bilmişdi.

“Köhnə qvardiya” ilə vidalaş

“Milyarderlər İttifaqı”nın nümayəndəsi müsahibəsinin ən önəmli nöqtəsində “ərəb bahar”ından söz açır və Əliyevi islahatlara çağırır: “Yəqin ki, “ərəb baharı” Azərbaycanda müəyyən ayıldıcı təsir göstərib. İndiki prezident Əliyev öz ətrafındakı bəzi adamlardan yaxa qurtarmalıdır. Hansı ki, onlar xalq arasında nüfuzu olmayan məmurlardır. Həmçinin o, regionlarda daha çox iş aparmalıdır”.
Və yenə də Azərbaycan hökuməti üçün qanqaraldan, narahatlığa səbəb olan tikanlı cümlələrə rast gəlirik. Bu sözləri Azərbaycan vətəndaşı və ölkəmizdə siyasi fəaliyyətlə məşğul olmayan biri deyir. Onun ən yaxşı halda Rusiyadakı seçkilərdən danışmaq səlahiyyəti var.
Demək, Sadıqov Azərbaycandan danışırsa vəziyyət həddindən artıq mürəkkəb və ciddidir. Seçki ilində “ərəb bahar”ını hakimiyyətin yadına salmaq, gənclərin fəallığına əhəmiyyət vermək Əliyev rejiminə xoşbəxt perspektiv vəd etmir. Müsahibədə Əliyevin ətrafındakılardan yaxa qurtarması barədə açıqlamalar isə “köhnə qvardiya” ilə vidalaşmağa çağırışdır.
Sadıqov prezidentin regionlarda daha çox iş aparmalı olduğunun vacibliyindən danışması da blef kimi qarşılanmamalıdır. Ölkədə baş qaldıran etirazlar məhz əyalətlərdən başlanır. Quba, İsmayıllı, Lənkəran, İmişli, Zaqatala potensial müqavimət ocaqlarıdır. Sadıqov da Əliyevin ətrafındakıları təmizləməklə iqtidarda qala biləcəyinə eyham vurur. Yoxsa regionlarla işləməyən prezident hər həftə bir üsyanla üz-üzə dayanmalı olacaq...
Aslan