Saxta diplom məsələsinin birbaşa korrupsiya faktı olmasını nəzərə alsaq, adı gedən arayışın təhsil naziri müşavirinin təsdiqləməsi faktı da, ortaya çoxsaylı sualların çıxmasına səbəb olur

Bir müddət bundan öncə, daha dəqiq desək 17 sentyabr 2015-ci il tarixdə “Gündəm Xəbər” qəzetində işıq üzü görən "ÇTO? QDE? KOQDA?- DİPLOM, XUCƏNDDƏ, 1994-cü ildə" başlıqlı məqalədə sadalananlarla bağlı, Gəncə Dövlət Universitetinin müəllimi Arifə Əhmədova (hal-hazırda Əhmədli) sosial şəbəkələrdə Tacikistan Pespublikası Xucənd şəhərində ali təhsil alması haqqında diplomunun tanınmasına aid sənədi, daha doğrusu 03 iyul 2012-ci il tarixdə Təhsil Nazirliyi tərəfindən ona ünvanlanmış məktubu paylaşıb. (Məktubu olduğu kimi təqdim edirik) Məktubda qeyd olunur ki, hal-hazırda təhsil naziri Mikayıl Cabbarovun müşaviri, sabiq təhsil naziri Misir Mərdanovun zamanında isə, aparat rəhbəri vəzifəsini daşıyan İlham Pirməmmədovun imza atdığı məktubda qeyd olunur: "Gəncə Dövlət Universitetinin müəllimi Arifə Əhmədovanın diplomunun yoxlanılması, həmin təhsil ocağında və Gəncə şəhər Baş Polis İdarəsində aparılıb", yəni diplom saxta deyil.

Amma redaksiyamıza daxil olan məlumatlarda bildirilir ki, Gəncə Dövlət Universiteti coğrafiya kafedrasının müəllimi, siyasi elmlər namizədi alimlik dərəcəsi elmi adını almış Əhmədova Arifə Abbasəli qızına məxsus diplom saxtadır. Çünki, Arifə Əhmədova 28 iyun 1994-cü ildə Tacikistan Respublikasının Bobocan Qafurov adına Xucənd Dövlət Universitetinin coğrafiya fakültəsini bitirməsi haqda diploma sahib olsa da, verilən məlumatda o da bildirilir ki, 2002-ci ildə qeyd olunan ali təhsil ocağı əməkdaşlarından birinin, Bobocan Qafurov adına Xucənd Dövlət Universitetinin rəhbərliyinə ünvanladığı sorğuya verilən cavab məktubunda yazılır ki, “Arifə Əhmədovanın 1994-cü ildə coğrafiya ixtisası üzrə əyani və yaxud da qiyabi təhsil alması əmrdə qeydə alınmamışdır”. Sorğuya verilən cavab məktubu, rektor N.Y.Salimovun imzası və möhürü ilə də təsdiq olunur.

Arifə Əhmədovanın qol qoyduğu digər qanunsuzluqlardan biri də, “Torpaq Coğrafiyası Fənnindən Çöl Təcrübələrinin Aparılmasına Dair” metodiki göstəriş kitabının müəlliflik hüququnu da öz adına çıxmasıdır. Qeyd olunan kitab 2007-ci ildə işıq üzü görmüş və müəllifi dosent Nuriyev Rəşad Məmməd oğlu olmuşdur. Həmin kitab eyni zamanda, Təhsil Nazirliyi Elmi-Metodiki Şurasının “Coğrafiya” bölməsinin 13 iyul 2007-ci il tarixli iclasının qərarı ilə də (protokol~4) təsdiq olunmuşdur. Amma, bütün bunlara baxmayaraq Arifə Əhmədovanın da müəllifi olduğu “Torpaq Coğrafiyası Fənnindən Çöl Təcrübələrinin Aparılmasına Dair” metodiki kitabının 2014-cü ildə işıq üzü gördüyü, müəllifinin dosent əvəzi (kitabın son səhifəsində Arifə Əhmədova GDU coğrafiya fakültəsinin dosenti kimi qeyd olunub) Əhmədova Arifə Abbasəli qızının olduğu bildirilir. Eyni zamanda həmin kitabın Təhsil Nazirliyinin “Dərslik və Nəşriyyat” şöbəsinin 10 fevral 2014-cü il tarixli iclasının qərarı və 147 saylı protokolu ilə də təsdiq olunduğu da, bildirilir.

Qeyd olunan kitabları bir-birinə tutuşdurduqda o da bəlli olur ki, Arifə Əhmədovanın müəllifi olduğu “Torpaq Coğrafiyası Fənnindən Çöl Təcrübələrinin Aparılmasına Dair” metodiki kitabı, əvvəli kitabdan olduğu qaydada köçürülmüş, bu da dosent Nuriyev Rəşad Məmməd oğlunun müəlliflik hüququnun birbaşa oğurlanması deməkdir.

Diqqəti bir məqama da yönəldək ki, baş verən qanunsuzluq faktının yoxlanılması prokurorluq orqanlarının işi olduğu halda, bu fakt prokurorluqda deyil, polis idarəsində araşdırılıb. Görəsən polisin Arifə Əhmədovaya məxsus diplomun qanuniləşməsində marağı nə olub ki, adı gedən araşdırmaya qol qoyub və diplomun saxta olmadığını da təsdiqləyib? Polis İdarəsinin diplom araşdırılması səlahiyyətinə malik olmaması və təhsil naziri Mikayıl Cabbarovun müşaviri vəzifəsini daşıyan İlham Pirməmmədovun isə, qeyd olunan diplomun orijinallığına müsbət münasibəti, öz-özlüyündə böyük şübhələrə yol açır. Çünki, Tacikistan Respublikasının Bobocan Qafurov adına Xucənd Dövlət Universitetinə sorğu məktubu ünvanlamadan, İlham Pirməmmədovun Arifə Əhmədovaya məxsus diplomun doğruluğunu təstiqləməsi, hər kəsdə böyük müəmmaların əmələ gəlməsinə də səbəb olur. Belə olan halda İlham Pirməmmədov atdığı addım, onun adı ilə bağlanan daha bir korrupsiya faktı deyilmi?

Araşdırmamımızı davam etdirmək məqsədi ilə, Arifə Əhmədovanın sosial şəbəkələrdə İlham Pirməmmədovun imzası ilə təsdiqlənən məktubına münasibət bildirməsi üçün, Gəncə Dövlət Universitetinin tədris işləri üzrə prorektoru Faxrəddin Məmmədova müraciət etsək də, o, suallarımızı cavablandırmadı. Aydınlıq gətirmək istədiyimiz problemin varlığına, qeyd olunan təhsil ocağının elm və inovasiyalar üzrə prorektoru Pərvin Kərimzadəninun iştirakı ilə, təlim-tərbiyə işləri üzrə prorektor Asif Cavadov cavab verdi. O, 2012-ci ildən universitetin siyasi elmlər namizədi olan və coğrafiya ixtisasından mühazirə aparan Arifə Əhmədovaya məxsus diplomun qanuni olduğunu vurğuladı və bildirdi ki, həmin diplom Gəncə Baş Polis İdarəsinin köməkliyi ilə də təsdiqlənib. Daha sonra onu da müəyyən edə bildik ki, polisin diplomun təsdiqində "köməyi" belə olub. Belə ki, 2012-ci ildə Gəncə şəhər Baş Polis İdarəsinin rəisi vəzifəsini daşımış mərhum Rasim Musayev də, Göyçə mahalından olduğu üçün, Arifə Əhmədovaya həmin arayışın tərtibatında lazımi köməklik göstərir. (Qeyd: General Rasim Musayevdə Göyçə mahalında doğulub. Müəllif) Məhz belə bir səbəbdən də, İlham Pirməmmədovun imza atdığı məktubda, Gəncə şəhər Baş Polis İdarəsinin də adı çəkilir. Saxta diplom məsələsinin birbaşa korrupsiya faktı olmasını nəzərə alsaq, adı gedən arayışın təhsil naziri müşavirinin təsdiqləməsi faktı da, ortaya çoxsaylı sualların çıxmasına səbəb olur.

Görəsən adı çəkilən universitetin təlim-tərbiyə işləri üzrə prorektorunun da, Arifə Əhmədovaya məxsus diplomun təsdiq olunmasına cənfəşanlıq göstərməsi nə ilə bağlıdır? Suallar çox, amma hələlik cavab da yox!

Hörmətli oxucular! Qeyd olunan diplomun saxta olmadığını imzası ilə təsdiqləyən və bu gün təhsil naziri Mikayıl Cabbarovun müşaviri vəzifəsini daşıyan İlham Pirməmmədovun imzasının doğru olub-olmadığını araşdırırıq. Yaxın günlərdə əldə edəcəyimiz cavabı, geniş ictimaiyyətin diqqətinə çatdırmağa çalışacağıq.

Bizi izləyin.

Mehriban Əzizqızı

gundemxeber.az