15 saylı Yasamal 1-ci seçki dairəsindən namizədliyi qeydə alınan Ülvi Quliyevin atdıqları addımlar da, həm keçiriləcək seçkinin demokratikliyinə, həm də ki, müstəqil Azərbaycanımızın imicinə vurulan zərbələrdən başqa bir şey deyil


01 noyabr 2015-ci il tarixdə MM-ə növbəti seçkilərin keçiriləcəyinə bir neçə gün qalmış, yenə də seçki saxtakarlığı mövzusu gündəmi zəbt etməkdədir. Çünki, Gündəm Xəbər”in əldə etdiyi məlumatlara görə, bəzi dairələrdə namizədliyi müəyyən qurumlar və yaxud da siyasi partiyalar tərəfindən irəli sürülmüş namizədlər, seçki haqqında qanunun tələblərinə əməl etmək əvəzinə, daha çox qanunsuzluqlara qol qoymaqla yaddaşlarda qaldı. 15 saylı Yasamal 1-ci seçki dairəsindən namizədliyi qeydə alınan Ülvi Quliyevin atdıqları addımlar da, həm keçiriləcək seçkinin demokratikliyinə, həm də ki, müstəqil Azərbaycanımızın imicinə vurulan zərbələrdən başqa bir şey deyil.
Belə bir səbəblər üzündəndir ki, 28 oktyabr 2015-ci il tarixdə saat 11.00-da Vətəndaş və İnkişaf Partiyasının mərkəzi qərargahında, 15 saylı Yasamal 1-ci seçki dairəsindən namizədliyi qeydə alınmış beş namizəd bir araya gələrək mətbuat konfransı keçirdilər. Konfransı giriş sözü ilə açan VİP-nın sədri Əli Əliyev bildirdi ki, “bizim dairədə 8 namizəd qeydiyyata alınıb ki, həmin namizədlərdən beşi bugünkü tədbirdə iştirak edir. Qeydiyyata alınmış namizədlərin çoxu aktiv fəaliyyət göstərsə də, namizədliyi qeydə alınmış İsa Qənbər isə, sanki süstlük nümayiş etdirməyə üstünlük verdi. Hətta, onun namizədliyini geri götürməsi ilə bağlı məlumat da əldə etmişik. ( Red: məqalə hazırlanarkən İsa Qənbərin namizədliyini geri götürməsi haqda məlumat əldə etdik)
Bu gün 8 namizəd içərisində daha çox qanun pozuntularına qol qoyan namizəd varsa, o da Ülvi Zahid oğlu Quliyevdir. O, bu günədək müxtəlif seçki dairələrindən iki dəfə deputat olub və hər seçkidə də dairəsini dəyişib. Bunun da özəl səbəbləri var ki, həmin səbəblər içərisində daha çox onun, MM-in deputatı olarkən təmsil olunduğu seçki dairəsi ərazisində bir dəfə də olsun gözə dəyməməsi olub. Bu gün 15 saylı Yasamal 1-ci seçki dairəsindən namizədliyi qeydə alınmış Ülvi Quliyevin, niyə bu seçki dairəsini seçməsi haqda müəyyən versiyalarımız da var.
Əldə etdiyimiz məlumatlara görə, o, əvvəlcədən bu seçki dairəsini nəzərdə tutduğundan, bir qədər uzaqgörənlik edib və hələ Qurban bayramı günü, ərazidə yaşayan sakinlərə təqribən tonyarım ət də paylatdırıb. İndiki mərhələyə gəldikdə isə belə xəbərlər də əldə edə bilmişik ki, Ülvi Quliyev adamları vasitəsilə seçicilərinə ərzaq paylatdırmaqla, pul verməklə də ələ alır. Bu cür addımlar da, birbaşa qanunla qadağan olunan addımlardır.
Onun belə bir addımları ilə bağlı, MSK-na şikayət ərizələrimizi da ünvanlamışıq. Yazıb bildirmişik ki, Ülvi Quliyevə məxsus çap materiallarında nə istehsal tarixi, nə sayı, nə də ki, digər göstəricilər var. Hətta ona məxsus bir barner var ki, həmin barnerin də istehsalı haqda heç bir məlumat yoxdur. Dövlət qurumu olan poçt məntəqəsində onun plakatı asılıb ki, bu da birbaşa Ülvi Quliyevin təbliğatı deməkdir.
Belə bir saxtakarlıqlarla bağlı, 15 saylı Yasamal 1-ci seçki dairəsinin sədri Sərdar Süleymanova müraciətlər etsək də, o, müraciətlərimizə məhəl qoymadı, açıq-aydın şəkildə bitərəfli mövqe tutdu. Bütün bu kimi səbəblər üzündən də, beş nəfər namizəd bir araya gəldik və birgə fəaliyyət haqda qərarımızı da ortaya qoyduq. Bu gün də, “Loğman” apteklər şəbəkəsinə rəhbərlik edən Ülvi Quliyevin, geniş seçici auditoriyası ilə görüşmək fikri yoxdur. Onun ötənilki seçkilərdə olan şüarına bir nəzər salsaq onu görərik ki, “sağlam gələcək, ülvi ilə gələcək” dedikdə, bu şüarın mənasında bildirilir ki, Ülvi Quliyev bu şüarı ilə Azərbaycan cəmiyyətinə sanki bir sağlamlıq gətirmək fikrini ortaya qoymuş olur. Əslində bu şüar cəmiyyətimizə yönəlik həqarətdən başqa bir şey deyil.

Mətbuat konfransında çıxış edən digər namizəd də, Ülvi Quliyevin qanunsuzluq addımlarından bəhs edərək bildirdi ki, Yasamal rayonu ərazisindəki 60 saylı Körpələr Evinin rəhbərliyi, valideyinləri ona səs verməyə dəvət edib. Odur ki, biz baş verən saxtakarlıqları ölkənin siyasi rəhbərliyinin diqqətinə çatdırmağa çalışmalıyıq.
Ramil adlı namizəd isə çıxışı zamanı onu vurğuladı ki, “yaşadığımız mənzilin yaxınlığında xeyr-şər evi var. 16 oktyabr günü “jek” işçilərini ora yığıblar və Ülvi Quliyevə səs verməyə dəvət ediblər. O, on il deputat olub və məişət zoraklığı haqqında qəbul olunmuş qanuna imza da atıb. Bizim birləşməyimizin səbəbi, Ülvi Quliyevin saxta əməllərini ifşa etməkdir ki, insanların səsini pulla, ərzaq paylamaqla və digər addımları atmaqla ələ almaq olmaz. Çünki, onun Şərifzadə küçəsində seçiciləri belə bir yolla ələ alması haqda məlumatlara malikəm. Hələ imzatoplama kampaniyası zamanı, onun adamları 10 manat verib kimlərdənsə imza da alırdılar. Elə sakinlər olub ki, Ülvi Quliyevin adamlarını qapıdan da qovublar. Hal-hazırda çalışmalıyıq ki, onun namizədliyinin ləğvinə nail ola bilək”.
Digər Nişad adlı namizəd də Ülvi Quliyevin saxtakarlıqlarından danışaraq onu bildirdi ki, onun təbliğat-təşviqat materiallarında istehsal tarixi göstərilməyib. Neçə dəfə olub ki, “lek” işçiləri məcburi qaydada onun tədbirinə dəvət olunublar. 2 saylı Baza Tibb Kollecində 4 saylı məntəqə yerləşir. Ülvi Quliyevə yaxınlığı ilə tanınan könüllülər gəlib-keçən seçicilərə bildirirlər ki, “siz Ülvi Quliyevə bu məntəqədə səs verəcəksiniz” deməklə, əslində onun təbliğatını aparırlar. Onun şəkilləri dövlət idarələrinə vurulur, məntəqələrdə görüşləri keçirilir.
Bütün bunlar bir daha onu göstərir ki, indidən baş alıb gedən qanun pozuntuları seçkilərin ədalətli, qanunun verdiyi prinsiplər əsasında deyil, birbaşa qanusuzluqlar çərçivəsində baş tutacaq. Çünki, 15 saylı Yasamal 1-ci seçki dairəsindən namizədliyi qeydə alınan Ülvi Quliyevin addımları və.s, əksəriyyəti belə düşünməyə vadar edir.

Gündəm Xəbər”