Elman Məmmədovun qol qoyduğu “ən mötəbər” maxinasiyalardan biri də, məktəbdəki vakant yerlərin nazirlikdən gizlədilməsi olur

“Gündəm Xəbər” qəzetinin ötən saylarının birində Goranboy rayonu Dəliməmmədli şəhər tam orta məktəbində baş verən çoxsaylı qanunsuzluqlardan, məktəb direktorunun, onun müavininin təcrübəli, peşəkar müəllimləri gözümçıxdıya salmalarından və digər olaylardan az-çox bəhs etmişdik. Yazıb onu da qeyd etmişdik ki, bu gün də adıçəkilən təhsil ocağında elə bir maxinasiyalara qol qoyulur ki, bəlkə də təhsil naziri cənab Mikayıl Cabbarov baş verən hoqqalardan dəqiq xəbər tutarsa, o halda Elman Məmmədovla bərabər, onun müavini, kollec təhsilli Kəmalə Rüstəmovanı da təhsil sahəsindən birdəfəlik uzaqlaşdırar. Məhz, ona görə belə bir qənaətə gəlmişik ki, istər məktəbin direktoru, istərsə də onun təlim-tərbiyə işləri üzrə müavini, bu gün də təhsilimizin inkişafına deyil, birbaşa təhsilimizin məhvinə yönəlik addımlarını atmaqdadırlar.

Adıçəkilən təhsil ocağında yaşananlarla bağlı əldə etdiyimiz məlumatlardan bəlli oldu ki, Dəliməmmədli şəhər tam orta məktəbi rayonun ən böyük təhsil ocaqlarından biridir. 800 nəfərədək şagirdin təhsil aldığı, 120 nəfərə qədər isə müəllim kollektivinin çalışdığı təhsil ocağında, direktorun təlim-tərbiyə işləri üzrə müavini vəzifəsini, hal-hazırda kollec təhsilli Rüstəmova Kəmalə Firudin qızı daşımaqdadır. O, Gəncə Məişət Xidməti Kollecini bitirdiyindən, orta ixtisas təhsilli kadr hesab olunur və daşıdığı vəzifəsinə təqribən 6-7 il bundan əvvəl, indiki direktor Elman Məmmədovun “dobro”su və sabiq təhsil şöbəsinin müdiri Anar müəllimin himayədarlığı sayəsində nail olub. Onu da qeyd edək ki, kollec təhsilli Kəmalə Rüstəmova, bu gün müavin olduğu məktəbdə əvvəllər musiqi müəlliməsi də işləyib.

Təəssüf və təəccüb doğuran hal odur ki, hal-hazırda Dəliməmmədli şəhər tam orta məktəbində 100 nəfərə qədər ali təhsilli, nüfuzlu müəllim kollektivinin çalışmasına baxmayaraq, adı çəkilən təhsil ocağında təlim-tərbiyə işləri üzrə direktor müavini orta ixtisas təhsilli şəxsdir. Belə olan halda ortaya çoxsaylı suallar çıxır ki, görəsən Kəmalə xanım hansı bilik və bacarığına görə müavin vəzifəsini daşıyır və o, ali təhsilli, peşəkar, nüfuz sahibi olan müəllimlərə hansı metodik tapşırıq və məsləhətlərini

də verə bilir? Axı, o, kellec təhsilli kadr hesab olunur? Yəni, onun adicə pedoqoji sahə ilə məşğul olması, həm də qanunla qadağan olunur.

Məktəbdə yaşananlar haqda məlumatları “Gündəm Xəbər” çatdıran mənbə onu da bildirir ki, adı çəkilən təhsil ocağında təlim-tərbiyə işləri üzrə direktor müavini vəzifəsini daşıyan Kəmalə xanım, hər ay müəllim və şagirdlərdən “inspektor” gəldi, jurnalistləri “yola salmaq” lazımdır, icra hakimiyyətindən müəyyən tapşırıqlar verilib, tədbirlər keçiriləcək və.s adlar adı altında, pul yığmaqla da məşğul olur. Bütün bunlar istər ölkə rəhbəri İlham Əliyev cənablarının, istərsə də təhsil naziri cənab Mikayıl Cabbarovun, ölkəmizin təhsil sahəsində həyata keçirmək istədikləri addımlara, kölgə salmaqdan başqa bir şey deyil.

Onu da qeyd edək ki, təhsil haqqında Qanuna əsasən təhsil müəssisələrinə qeyri-pedoqoji ixtisaslar üzrə şəxslərin qəbulu qadağan olunur. Amma qanunun belə bir tələbinə baxmayaraq, Kəmalə Rüstəmova Gəncə Məişət Xidməti Kollecini bitirsə də, o, bu gün Dəliməmmədli şəhər tam orta məktəbində direktorun təlim-tərbiyə işləri üzrə müavini vəzifəsini daşımaqdadır. Onun diplomunun saxta olması haqda da, müəyyən çevrələrdə bəzi söz-söhbətlər də dolaşmaqdadır. Çünki, əldə etdiyimiz məlumatlarda o da vurğulanır ki, diplom problemi müzakirə olunarkən Kəmalə Rüstəmova hər il ayrı-ayrı təhsil ocaqlarına məxsus diplomlarını ortaya çıxarır. (yəqin ki, o, həmin diplomları bazar qanunları ilə tənzimlənən qiymətə alıb) Əslində bu versiya da araşdırılmalı, həqiqət də öz yerini tapmalıdır.

“Gündəm Xəbər”i məlumatlandıran mənbə onu da vurğulayır ki, dəfələrlə elə hallar olub ki, Kəmalə Rüstəmova ilə bağlı, aidiyyəti qurumlara müraciətlər ünvanlanıb. Təəssüflər olsun ki, həmin müraciətlər ünvanı üzrə çatdırılmayıb. Bu da onu söyləməyə əsas verir ki, yəqin ki, ona havadarlıq edənlər buna imkan verməyirlər. Dəliməmmədli şəhər tam orta məktəbində yaşanan olayları redaksiyamıza təqdim edən mənbənin danışdıqlarını əsas tutaraq, bu gün belə bir qənaətə də gəlmişik ki, yəqin ki, yaxın vaxtlarda cənab Mikayıl Cabbarovun tapşırığı əsasında yaşanan problemlər lazımınca araşdırılacaq. Çünki, kollec təhsili olan bir kimsənin hansısa havadarlarına söykənərək, 100 nəfərə qədər ali təhsilli, nüfuzlu, təcrübəli, peşəkar müəllimlərə bilik, metodiki göstəriş və.s verməsi, öz-özlüyündə qəbul edilməsi mümkün olmayan yanaşmadır.

Ümumiyyətlə, bu gün adı çəkilən təhsil ocağında elə bir qanunsuzluqlara qol qoyulur ki, həmin qanunsuzluqların nə sərhəddi, nə

də ki, hüdudu bilinir. Məsələn, məktəbin direktoru bir neçə ildir ki, Heydərov Samir Vaqif oğlunu qeyd olunan təhsil ocağına fiziki tərbiyə müəllimi təyin etsə də, bu günə qədər onun sifətini məktəbdə bir kimsə belə görməyib. Amma, hər ay Samir Heydərovun adına əmək haqqı yazılır, heç bir halda dərsi keçilmir və əldə olunan pullar isə, direktorla xanım müavini arasında “paypüş” edilir. Məlumatlı mənbə onu da bildirir ki, sən demə Samir Heydərovun məktəb üzü görməməsinə səbəb, onun gips zavodunda məsul vəzifəni daşıması olur. Adı məktəbin ştat cədvəlində dil-ədəbiyyat müəllimi kimi gedən Yusipova Raziyyə Yusif qızı da, Elman Məmmədovun “kəramətindən” yararlanan müəllimlərdəndir. Çünki, o da, düz 6-7 ildir ki, məktəb üzü görmür. Buna səbəb, Raziyyə Yusipovanın Moskva şəhərində biznes fəaliyyəti ilə məşğul olmasıdır. Onun da adına hər ay əmək haqqı yazılır və həmin əmək haqqı da, məktəb rəhbərliyində vəzifə sahibi olanlar tərəfindən “həzmi-rebedən” keçirilir.

Rəhbərliyin qol qoyduğu “ən mötəbər” maxinasiyalardan biri də, məktəbdəki vakant yerlərin nazirlikdən daim gizlədilməsi olur. Bu haqda da məlumatları redaksiyamıza çatdıran mənbə bildirir ki, qeyd olunan təhsil ocağının rəhbərliyi 65 yaş həddində olan təcrübəli müəllimləri zor gücünə olsa belə, təqaüdə yola sala bilir və onların əvəzinə müqavilə əsasında başqa müəllimləri saathesabı ilə işə götürür. Elə ki, tərəflər arasında müəyyən söz-söhbətlər əmələ gəlir, həmin vaxt Elman Məmmədov “heç kim hoppanıb düşməsin, bu nazirin əmridir və əmr də yerinə yetirilməlidir” deyir. Çox maraqlı və təəccüb doğuran açıqlama olur ki, onu da böyük bir kollektivə rəhbərlik edən şəxs dilindən səsləndirir. Axı, cənab nazirin 65 yaşdan sonra da, təcrübəli müəllimlərin müqavilə əsasında bir neçə il işləmələri haqda verdiyi tapşırıq da var. Bunu da nəzərə almaq lazımdır.

Onu da qeyd edək ki, Elman Məmmədov ixtisasca fiziki tərbiyə müəllimidir. O, 6-7 il bundan əvvəl qeyd olunan təhsil ocağına direktor təyin olunarkən, məktəbdə cəmi 2 nəfər fiziki tərbiyə müəllimi olub. Amma, bu gün fiziki tərbiyə müəllimlərinin sayı 7 nəfərə çatıb ki, buna da səbəb, onun hər il 1 və ya 2 nəfər qeyri-ixtisas sahibi, yəni kollec təhsilli şəxsləri müəyyən “haqq-hesab”ın müqabilində saathesabı işə qəbul etməsi olub. Yəni onlar kollec təhsilli olsalar da, fiziki tərbiyə müəllimi kimi işə qəbul ediliblər. Diqqəti o hal da cəlb edir ki, Elman Məmmədov 2 saat hesabı ilə işə qəbul etdiyi həmin müəllimlərin adlarını, bir neçə il keçdikdən sonra ştata da saldıra bilir. Baxmayaraq

ki, həmin müəllimlər də məktəb üzü tanımırlar və onların adlarına yazılan əmək haqları da, Elman Məmmədov və onun təlim-tərbiyə işləri üzrə müavini Kəmalə Rüstəmova, həçinin digər vəzifə sahibləri tərəfindən də “xrıd” edilir.

Məktəb rəhbərliyinin seçki prosesi zamanı mənimsəmələrə qol qoyması haqda da, müəyyən məlumatlara malikik. Yəni, seçki komissiyalarında təmsil olunan müəllimlər qanuna görə seçki dövründə dərsə gəlməməli və komissiyalarda fəaliyyətlərini davam etdirməlidirlər. Həmin vaxt Elman Məmmədovun bəxti sanki “gül açır”. Çünki, onun müəyyən maxinasiyaya qol qoyması üçün, lazımi şərait yaranır. Belə ki, o, həmin müəllimlərin dərsini guya əvəzləyici müəllimlər keçir adı altında, onların da əmək haqlarını mənimsəyə bilir.

Yuxarı sinif şagirdlərinin davamiyyətinə gəlincə onu deyə bilərik ki, 10 və 11-ci sinif şagirdlərindən dərs zamanı 4-nü, yaxud da 5-ni sinifdə tapmaq mümkün olur. Çünki, məktəb rəhbərliyi bu gün elə bir şərait yaradıb ki, yuxarı sinif şagirdləri repititor yanına getməyə məcbur olurlar və atdıqları addımın müqabilində, mütləq müdriyyətin büdcəsinə 100 manat “rüsum” da ödəyirlər.

Dəliməmmədlidə Məmmədovun və Rüstəmovanın iztirabından, məşəqqətli idarəçiliyindən zinhara gələn çoxsaylı müəllimlər var ki, onlardan biri də, Gülnarə xanım Ələsgərovadır. O, heç nədən çəkinmədən, bir kimsədən ehtiyat etmədən redaksiyamıza şikayət ərizəsi ünvanlayaraq bildirir ki, “ mənə qarşı Dəliməmmədli şəhər tam orta məktəbində bənzəri olmayan haqsızlıqlar olunur. Yəni, ali təhsilli fiziki tərbiyə müəllimi olmağıma, 25 il iş stajına malik olmağıma və bunun müqabilində 18 saat dərs saatı tələb etməyə haqqım çatdığına məhəl qoymayan Elman Məmmədov, bu gün məni gözümçıxdıya salmaqdadır. Elə ki, onun hərəkətlərindən təhsil şöbəsi rəhbərliyinə şikayət edəcəyimi dedim, o halda onun cavabı o oldu ki, “get şikayətini et, o halda mən sənin dərs saatını azaldaram” dedi. Əslində, bu belə də oldu. Üzləşdiyim problemin mahiyyətini təhsil şöbəsi müdirinin müavini Ağababa İbrahimova bildirdikdə o, bununla bağlı tədbir görəcəyinə söz verdi. Elə ki, səhəri gün məktəbə gəldim, Elman Məmmədov mənimlə rəhbər işçiyə yaraşmayan, etikadan kənar ifadə işlətməklə “rayona getdin nə oldu? Gördünmü burada hər şey mənlikdir, Samir müəllim dərsə gəlmir əcəb edir, get kimə nə deyirsən de” deyə ifadələr işlətdi. Onun belə bir yanaşması məni həkimə müraciət etmək zorunda qoydu ki, əziyyətini indi də çəkirəm. Yəni, bu gün də ambulator müalicədəyəm. Hələ bu

azmış kimi o, oktyabr ayında alacağım əmək haqqıma da “əl qoydu” deyir.

Diqqəti o hal da cəlb edir ki, bu gün istər Elman Məmmədov, istərsə də pedoqoji sahədə fəaliyyət göstərməsi qanunla qadağan olunan Kəmalə Rüstəmova, elə hay çəkib haray edirlər ki, “kim bizdən hara və kimə istəyirsə şikayətini verə bilər. Amma, bir nəticəsi olmayacaq”. Hətta, Kəmalə Rüstəmova bir az da irəli gedərək onu da bildirir ki, “mənim MTN-də polkovnik rütbəli qohumum işləyir. O, bizi hər bir vəzifə sahibinə tapşırıb, odur ki, bizə heç kim heçnə edə bilməz. Elə Gülnarə Ələsgərova da bizimlə bağlı təhsil şöbəsinə şikayət etdi. Son anda nə qazandı? İlk növbədə idman rəhbərliyi əlindən alındı və hər ay da aldığı əmək haqqından, bu gün 109 manat az maaş alır”. Bəli, bütün bunlar bir təhsil ocağında yaşanan olaylardır. Əslində bu cür addımların atılması, təhsilimizin ən böyük bəlalarından biridir ki, onu da Məmmədovun-Rüstəmovun işbirliyi yaşatmaqdadır.

P.S. Yaşanan problemlə bağlı araşdırmalarımızı davam etdirəcəyik. Çünki yaşanan olay, əslində 100 nəfərə qədər müəllimin hüququnun tapdalanması ilə bərabər, eyni zamanda cənab Mikayıl Cabbarovun imzaladığı sərəncamların, verdiyi tapşırıqların da tapdalanması deməkdir. Adları çəkilən şəxslərin də, mövqelərini dinləyə bilərik.

Cəfər

gundemxeber.az