Gəncə Məişət Xidməti Kollecini bitirən Kəmalə Rüstəmova, bu gün Dəliməmmədli şəhər tam orta məktəbində yüz nəfərə qədər ali təhsilli müəllimə “həm dərs keçir, həm də metodik tapşırıq və məsləhətlərini də verir”
Bir neçə il bundan əvvəl cənab Mikayıl Cabbarovun təhsil naziri vəzifəsinə təyin olunması və bu sahəsdə aparılan islahatlar, hal-hazırda öz bəhrəsini verməkdədir. Atılan addımlar içərisində istər müəllim kadrların yetişdirilməsi, istərsə də test imtahanlarının tətbiqi və.s, bu gün də hər kəs tərəfindən razılıqla qarşılanmaqdadır. Atılan addımlara baxmayaraq, yenə də bəzi təhsil şöbələrinin müdirləri qol qoyduqları əməlləri ilə, əldə olunan uğurlara kölgə salmaqla məşğul olurlar. Bu sırada Goranboy rayonu Dəliməmmədli şəhər tam orta məktəbinin adı, daha öndə gedən təhsil ocaqlarından biri hesab olunur. Məktəblə bağlı əldə etdiyimiz məlumatlar əsasında o da bəlli oldu ki, bu məktəb rayonun ən böyük təhsil ocaqlarından biridir. 800 nəfərədək şagirdin təhsil aldığı, 120 nəfər qədər isə müəllim kollektivinin çalışdığı təhsil ocağında, direktorun təlim-tərbiyə işləri üzrə müavini Rüstəmova Kəmalə Firudin qızıdır. Gəncə Məişət Xidməti Kollecini bitirdiyindən o, orta ixtisas təhsilli kadr hesab olunur. Bu yöndə apardığımız araşdırmalar zamanı o da bəlli oldu ki, Kəmalə xanım daşıdığı vəzifəsinə sabiq təhsil şöbəsinin müdiri Anar müəllimin himayədarlığı sayəsində nail olub.
Təəssüf doğuran hal odur ki, Dəliməmmədli şəhər tam orta məktəbində 100 nəfərə qədər ali təhsilli, nüfuzlu müəllim kollektivinin olmasına baxmayaraq, adı çəkilən təhsil ocağında təlim-tərbiyə işləri üzrə direktor müavini orta ixtisas təhsillidir. Belə olan halda ortaya çoxsaylı suallar çıxır ki, görəsən Kəmalə xanım hansı bilik və bacarığına görə müavin vəzifəsini daşıyır? Axı, o, kellecdə təhsilini başa vurub? Bu belə olduğu halda, görəsən Kəmalə xanım ali təhsilli, nüfuz sahibi olan müəllimlərə hansı metodik tapşırıq və məsləhətlərini də verə bilər? Əslinə baxsan bu gün o, əməlli-başlıca alver etməklə də məşğul olur. Hətta əldə etdiyimiz məlumatlara görə, Kəmalə xanım həftədə bir və yaxud iki dəfə Bakı şəhərindən “şmotka” aparır və apardığı malları da zor-xoş məktəb müəllimlərinə “sırıya da bilir”.
Verilən məlumatlarda o da bildirilir ki, adı çəkilən təhsil ocağında təlim-tərbiyə işləri üzrə direktor müavini vəzifəsini daşıyan Kəmalə xanım, hər ay müəllim və şagirdlərdən “inspektor” gəldi, jurnalistləri “yola salmaq” lazımdır, icra hakimiyyətindən tapşırıqlar verilib, tədbirlər keçiriləcək və.s adlar adı altında pul yığmaqla da məşğul olur.
Daha faciəli hal odur ki, məktəbin direktoru bir neçə ildir ki, Heydərov Seymur Vaqif oğlunu qeyd olunan təhsil ocağına idman müəllimi təyin etsə də, əslində bu günə qədər həmin müəllimin sifətini məktəbdə bir kimsə görməyib. Amma, hər ay Seymur Heydərovun adına əmək haqqı yazılır, heç bir halda dərs keçilmir və əldə olunan pullar isə, direktorla xanım müavin arasında “paypüş” edilib dədə malı kimi bölünür. Məlumatlı mənbə onu da bildirir ki, sən demə Seymur Heydərovun məktəb üzü görməməsinə səbəb, onun gips zavodunda məsul vəzifə daşıması olur. Elə ki, onun nöqsanlı iş fəaliyyəti haqda müzakirələr aparılır, bu zaman Seymur Heydərovun cavabı o olur ki, “mən yenə də işləyəcəyəm, heç kimin mənə gücü çatmaz. İlboyu məktəbin direktoruna 1000 manat pul verirəm, o da, məni işimdə saxlayır. Bu il də təzə müdirə “haqq-hesab” vermişəm, odur ki, yenə də işləyəcəyəm” dedikdə, hər kəsi təəccüb bürüyür.
Rəhbərliyin qol qoyduğu digər maxinasiyalardan biri də, məktəbdəki vakant yerlərin nazirlikdən gizlədilməsidir. Bu haqda da məlumatları redaksiyamıza çatdıran mənbə bildirir ki, qeyd olunan təhsil ocağının rəhbərliyi belə bir addımlarını atsa da, əslində o, bu il 5 nəfər qadın müəlliməni (etika naminə hələlik adlarını çəkmirik) müqavilə əsasında işə götürüb. Hansı ki, həmin qadın müəllimələr də məktəb üzü görmürlər, şagird sifəti tanımırlar. Amma, onların da adlarına az-çox əmək haqqı yazılır və rəhbərlik tərəfindən də “həzmi-rabedən” keçirilir.
Bütün bunlar təhsil naziri cənab Mikayıl Cabbarovun, təhsil sahəsində həyata keçirdiyi addımlara kölgə salmaqdan başqa bir şey deyil. Çünki, nazirin müvafiq sərəncamı ilə təhsil müəssisələrinə qeyri-pedoqoji ixtisaslar üzrə şəxslərin qəbulu qadağan edildiyi halda, Kəmalə Rüstəmova Gəncə Məişət Xidməti Kollecini bitirmişdir və bu gün də Dəliməmmədli şəhər tam orta məktəbində direktorun təlim-tərbiyə işləri üzrə müavini vəzifəsini daşımaqdadır. Hələ onun diplomunun saxta olması haqda, müəyyən çevrədə bəzi söz-söhbətlər də dolaşmaqdadır. Əslində bu versiya da araşdırılmalı, həqiqət öz yerini tapmalıdır.
Dəfələrlə elə hallar olub ki, Kəmalə Rüstəmovanın daşıdığı vəzifəsinin cənab nazirin imzaladığı sərəncamla ziddiyyət təşkil etməsi ilə bağlı, aidiyyəti qurumlara müraciətlər ünvanlansa da, təəssüflər olsun ki, əldə etdiyimiz məlumatlara görə həmin müraciətlər də ünvanı üzrə çatdırılmayıb. Bu da onu söyləməyə əsas verir ki, yəqin ki, ona havadarlıq edənlər buna imkan verməyiblər.
Dəliməmmədli şəhər tam orta məktəbində yaşanan olayları redaksiyamıza təqdim edən mənbənin danışdıqlarını əsas tutaraq, bu gün belə bir qənaətə gəlmişik ki, yəqin ki, yaxın vaxtlarda cənab Mikayıl Cabbarovun tapşırığı əsasında yaşanan problem lazımınca araşdırılacaq. Çünki, kollec təhsili olan bir kimsənin hansısa havadarlarına söykənərək, 100 nəfərə qədər ali təhsilli, nüfuzlu müəllimlərə bilik, metodiki göstəriş və.s verməsi, öz-özlüyündə qəbul edilməsi mümkün olmayan məsələlərdəndir.

P.S. Yaşanan problemlə bağlı araşdırmalarımızı davam etdirəcəyik. Çünki yaşanan olay, əslində 100 nəfərə qədər müəllimin hüququnun tapdalanması ilə bərabər, eyni zamanda cənab Mikayıl Cabbarovun imzaladığı sərəncamın da tapdalanması deməkdir. Adları çəkilən şəxslərin də, mövqelərini dinləyə bilərik.

Cəfər

gundemxeber.az