Dövlət İdarəsini şəxsi evinə çevirən məmur...
Və ya Energetika Nazirliyinin Dövlət Qaz Nəzarəti İdarəsinin
Gəncə Regional Bolməsində rəzalət

Gəncəyə getməyimin səbəbi eşitdiklərim idi. Şəmkirdə yaşayan bir dostumun dediklərindən sonra qərara aldım ki, Energetika Nazirliyinin Dövlət Qaz Nəzarəti İdarəsinin Gəncə Regional Bolməsi adlanan idarədə olum. İdarənin qarşısına çatanda harada olduğumdan çaşdım. Binanın üzərində yazılardan belə məlum oldu ki, mən Energetika Nazirliyindəyəm. Çünkü üzərinə böyük hərflərlə Azərbaycan Respublikası Energetika Nazirliyi yazılmışdı. Kənarda isə sadəcə olaraq Dövlət Qaz Nəzarəti idarəsi sözləri yazılan lövhə asılmışdı. Yəni idarənin Gəncə bolməsi haqqında heç bir bilgi yox idi. Sadəcə olaraq bura gələnlərdə o təəssürat yaranırdı ki, bu idarə Gəncədə deyil Bakıda yerləşir. .... İdarəyə daxil oluram. Ölkəmizdə hansı idarə və müəssəyə daxil olursansa o təşkilatda elə girişdəcə ilk əvvəl Ümummilli lider Heydər Əliyevə aid guşə yerləşir. Burada isə nəinki H.Əliyev guşəsi, heç dovlət atributları olan lövhəyə belə rast gəlmədim. Idarənin içində ora- bura gəzən Gəncədən və ətraf rayonlardan gələn bir neçə vətəndaşla rastlaşdım. Onlara qoşuldum. Şərti olaraq Samuxdan olduğumu bildirib idarənin bir məmuruna yaxınlaşdım. Həmin məmura bildirdim ki, xiyar- pamidor əkmək üçün istixana tikmək istəyirəm və bunun üçün hansı sənədlər yığmalıyam. Gənc olan məmur mənə cavab verdi ki- qardaş bizim idarədə bütün məsələlərə rəisimiz Elxan Hüseynov baxır, əvvəlcə Siz onun yanına getməlisiniz. Həmin məmura bildirdim ki, mən heç bir sənəd imzalatmaq istəmirəm. Adətən rəislərin yanına sənəd imzalatmaq üçün girərlər. Yenə də həmin məmur mənə bildirdi ki, qardaş bizim müdir və ona yaxın olan Məsim Qasımovdan başqa heç kim bu idarədə sənə komək edə bilməz. Məsimin otağını soruşub onun yanına getmək istədim. Bildirdilər ki, Məsim müəllim rəisin tapşırığı ilə yoxlamadadır. Əlacsız qalıb rəisin otağına üz tutdum. Katibəsindən rəisin qəbuluna girmək üçün icazə istədim. Bildirdi ki, rəisin yanında qonaqlar var. Həqiqətəndə rəisin yanında qonaqlar var idi. Çünkü idarənin rəisi Elxan müəllimin ucadan danışmağından və oradakıların rəislə olan söhbətləri azca aralı olan qapının arasından eşidilirdi. Diqqətlə qulaq asdıqda içəridəki söhbətdən aydın olurdu ki, yanındakılar müəsissələrinə qaz çəkdirmək istəyirdilər. Dialoqdan anlaşılan isə belə idi;
-Rəis vallah çox istəyirsən. Cavabında isə;
-Vallah mənlik deyil Nazirlikdən o qədər deyiblər….
Idarəyə daxil olandan burnuma yemək iyi gəlmişdi. Işçilərdən soruşdum ki, idarənizin mətbəxi var? Aldığm cavab isə həqiqətəndə məni dəhşətə gətirdi. Dedilər ki, sən demə rəis Elxan müəllim idarənin 2 –ci mərtəbəsini 2 ildir ki, özü üçün ev kimi istifadə edir. Yuxarı çıxmaq istədim dedilər olmaz rəisin qonaqları var. Həqiqətəndə ora-bura qaçan və qışqırışan uşaqların səsi ikinci mərtəbəni başına götürmüşdü. Inana bilmədim ki, mən Dövlət idarəsindəyəm, yoxsa şəxsi evdə. Xülasə orada gördüklərim bununla qurtarmadı. Aldığım məlumatlardan aydın oldu ki, idarədə işçilər olsa da burada bütün işləri rəis Elxan Hüseynov və onun yaxını kimi tanınan Məsim Qasımovdan başqa heç kimi apara bilməz. Əgər belə olmasaydı Məsim müəllim prezidentin oktyabrın 20 də imzalamış olduğu “Sahibkarlıq sahəsində aparılan yoxlamaların dayandırılması haqqında” Azərbaycan Respublikasının Qanunun qüvvəyə mindiyi 1 noyabr 2015-ci il tarixindən 10-15 gün sonra bir çox təşkilatlarda qanunsuz olaraq yoxlamalar aparmazdı. Uzun olmasın deyə siyahını qısaldaraq Sizlərə təqdim edirəm. Özbaşına olaraq təkcə noyabr ayının 12-15 arasında qanunsuz yoxlama apardığı təşkilatlar aşağıdakılardır;
1 Gəncə Regional Periodontal Mərkəz
2. A.Səhət adına Gəncə şəhər uşaq xəstəxanası
3. Gəncə Şəhər Səhiyyə İdarəsi
4. Gəncə Ruhi –Əsəb disponseri.. və s.

Bu siyahını uzatmaq da olar. Lakin Sizləri yormayım deyə uzatmıram. Elxan Hüseynovun qanunsuz əməlləri bununla bitmir. Şəmkir də fəaliyyət göstərən Sevinc Mərdanovaya məxsus çörək sexinin əməkdaşı Dilqəm Zeynalovun başına gətirdikləri hələ də çoxlarının yadından çıxmayıb. Qanunsuz olaraq yazılan cərimənin qəbzi olmadığı bəs deyilmiş kimi, hələ əlavə olaraq onlardan küllü miqdarda rüşvət də alınıb. Ümumiyyətlə, Elxan Hüseynovun əməlləri bununla bitmir. Bəlkə də yuxarıda yazdıqlarım sizlərdə bir o qədər də maraq yaratmaz. Deyəcəksiniz ki, nə olsun? Bura Azərbaycandır və bizdə əksər məmurlar qanunsuzluqlar edir və rüşvət belə almaqdan çəkinmirlər. Amma mən görüb eşitmədim ki, hansısa məmur xadimənin maaşına göz diksin. Insanlıq adına, hər bir rəhbər öz işçılərinə qarşı tələbkar olmaqla yanaşı, hami və qayğıkeş olmalıdır. Amma Elxan müəllim, həm idarənin və eləcə də şəxsi evə çevirmiş olduğu 2-ci mərtəbənin də xadiməsi olan kasıb və qaçqın qadının məvacibinin tən yarısını yəni yüz manatın əllisini özünə götürməyi heç bir kriteriyaya və insanlığa sığmır. Yəqin ki, Energetika Nazirliyində kimsə bunları oxuyub, Elxan Hüseynov haqqında ölçü götürəcək.

S.Altunsoy
“Gündəm Xəbər”
P. S. Qarşı tərəfi də dinləməyə hazırıq.