Eurovision terrorunun harda təşkil olunması və bunun da arxasında kimlərin durması haqda şok məlumatlar

gundemxeber.az Məlum olduğu kimi, "Eurovision-2012" mahnı müsabiqəsi ərəfəsində Milli Təhlükəsizlik Nazirliyi (MTN) Bakı, Sumqayıt, Gəncə şəhərlərində, o cümlədən Qax, Zaqatala, Şəki, Quba rayonlarında xüsusi əməliyyat keçirmiş, terror hadisələri planlaşdırmaqda şübhəli bilinən ümumilikdə 40 nəfəri zərərsizləşdirmişdi.
Dekabr ayının 3-də isə Bakı Ağır Cinayətlər Məhkəməsinin 4-nəfərə - Kamal Rəcəbova (14 il), Rəşad Şahbazova (13 il 6 ay) , Rəcəb Abbasova (12 il), və Afiq Allahverdiyevə (12 il) hökm oxunmuşdur. Lakin məsələ burasındadır ki, biz bu 4 nəfərin adını MTN tərəfindən bu ilin aprel ayında keçirilmiş əməliyyat zamanı həbs edlənlərin siyahısında görmürük. Bu məsələ ilə bağlı elektron ünvanımıza göndərilən yazını diqqətinizə çatdırırıq

Sui-qəsd olayında Dünyamin Xəlilovun adı

MTN öz 6 aprel əməliyyatı barədə o vaxt rəsmi açıqlama yaydıqdan sonra, həbs olunmuşların bəziləri barədə MTN-nin açıqlamaq istəmədiyi bəzi faktlar jurnalistlərin araşdırmaları nəticəsində aşkar oldu və KİV-də yayıldı. Məsələn, məlum oldu ki, terror ittihamı ilə həbs olunmuşlardan biri -Anar İsfəndiyar oğlu Ramazanov, vaxtilə, Şəki Apellyasiya Məhkəməsinin sabiq sədri Ramazan Burcayevin sürücüsü işləyibmiş. O, məhkəmə sədrinin xidməti avtomobili ilə Rəşad Aşurovun əldə etdiyi silah-sursatı lazımi ünvanlara çatdırırmış. Tezliklə, jurnalistlər Rəşad Aşurovun kimliyi barədə də şok açıqlamalar yaydılar. Məlum oldu ki, o, “Inter Security” şirkətinin Şəki-Balakən bölgəsi üzrə rəisidir, hansı ki, həmin şirkətin 450 nəfər işçisi Beynəlxalq Bankın özünün və filiallarının, bu bankdan asılı olan özəl obyektlərin, o cümlədən, Şəki, Qazax, Zaqatala, Qusar, Olimpiya Komplekslərinin, həmçinin “Şəki-Kərpic”, “Şəki-Bazar”, “Şəki-İpək” ASC-lərin və Şəkidəki daha bir sıra obyektlərin mühafizəsi işi ilə məşğuldurlar. Rəşad Aşurovun qərargahı isə "Şəki-İpək" ASC-nin idarə binasında idi. Məlumatlara görə o, sabiq deputat Dünyamin Xəlilovun da sürücüsü olub və 2005-ci il seçkilərində isə yerlərdə D.Xəlilovun rəsmi nümayəndəsi kimi fəaliyyət göstərmişdi. D.Xəlilov isə həm “Inter Security” şirkətinin təsisçisi, (hansı ki Beynəlxalq Banka məxsus obyektlərin mühafizəsi işi ilə məşğul olan bu qurumun rəisi isə İbrahim adlı MTN-dən qovulmuş bir şəxsdir və deyilənlərə görə o həm də "vəhhabistdir"), həm də "Pərvanə" MMC-nin rəhbəridir, hansı ki bu MMC saxta yolla "Şəki-İpək" ASC-nin investoru ola bilib və müəssisənin adına Beynəlxalq Bankdan 50 milyon manat kredit götürüb yox edib. Necə ki D.Xəlilov saxta yolla Bakıdakı “Xəzər Menecment Sistems” MMC-nin sədri də ola bilmişdi və həmin müəssisənin də adına Beynəlxalq Bankdan böyük məbləğdə kredit götürüb mənimsədikdən sonra müəssisəni söküb yerlə bir etmişdi və torpağını da satmışdı, eyni proses indi Şəkidədə davam etməkdədi...
MTN-nin 6 aprel əməliyyatı zamanı Rəşad Aşurovun evindən bir cəbhənin silah-sursatı tapılmışdı. Onların içində isə bizim üçün ən maraqlısı uşaq oyuncaqlarının içində yerləşdirilmiş dəhşətli gücə malik partlayıcılardır. Görəsən, Rəşad Aşurov oyuncaq-bombanı kimə qarşı tətbiq etmək istəyibmiş? Hörmətli oxucu, razılaşın ki, mənim kimi, sizin kimi adamı 1 güllə ilə də o dünyaya göndərmək olar, sözsüz ki bizi öldürmək istəsələr, elə bahalı və güclü silahdan istifadəyə ehtiyac yoxdu, elə dediyim kimi, 1 güllə, vəssalam. Deməli, həmin oyuncaq-bomba 1 güllə atmaq mümkün olmayan adamlar üçün nəzərdə tutulmuşdu. Gəlin fikirləşək görək kimə güllə atmaq mümkün deyil? Ağlınıza prezident gəlmirmi? Bəli, yalnız Prezidentə güllə atmaq mümkün deyil, çünki onun güclü mühafizəsi var!

Şəkidə baş verən olay

İndi isə diqqətinizə çatdırdığımız foto ilə bağlı bəzi məqamlara nəzər yetirək. Dövlət başçısı17 noyabr 2011-ci il tarixində Şəkidəki “Green Hill İnn” mehmanxanasının açılışında iştirak edərkən Beynəlxalq Banka məxsus obyektlərin mühafizəsi işi ilə məşğul olan şirkətin (Inter Security) Şəki-Balakən bölgəsi üzrə rəisi Rəşad Aşurov, hansı ki "Şəki-İpək" ASC binasında oturur, prezidentin lap yaxınlığına qədər irəliləyə bilibmiş. Sonralar Rəşad Aşurovun evində bir cəbhənin silah-sursatı aşkar olunur və o, 40-a yaxın silahdaşı ilə birlikdə həbs edilir. Rəşad Aşurovun cəbbəxanasında içində partlayıcı maddələr olan uşaq oyuncaqları da vardı. Şəklə diqqət yetirin, çox güman ki şəkildə görünən uşaq oyuncaqlarının içində də partlayıcı maddələr olmuşdu, yəqin ki prezident yalnız xoş təsadüf nəticəsində onlara toxunmamış və bu xoşbəxtlikdən də partlayış baş verməmişdi.
O ki qaldı “Green Hill İnn” mehmanxanasına, o, elə bir uğursuz tikili idi ki, "Şəkinin inkişafı" adıyla onun prezidentə təqdim edilməsi və prezidentin də buraya gətirilməsi adi nöqteyi nəzərdən absurt görünürdü. Belə ki bu tikili əvvəla, tam hazır deyildi, 4-cü mərtəbədə cəmi 1 otağını düzəlmişdilər, vəssalam. Sonrası da ki, bu bina 2 tərəfdən qəbirstanlıqla əhatə olunmuşdu və həm də şəhərin arxitekturasını da əməlli-başlı korlayırdı. 3-cüsü də ki, bu binanı tikən şəxs Beynəlxalq Bankdan götürdüyü kredit şərtlərinin ağırlığına dözə bilməyərək qaçmışdı və sonda, hotel Cahangir Hacıyevin əlinə keçmişdi. Bütün bu sadaladıqlarımız, məhz burada prezidentə sui-qəsdin planlaşdırılmasına bizi daha çox inandırır.

Vəhabi izi

Yeri gəlmişkən onu da əlavə edək ki, əgər doğrudan da burada prezidentə sui-qəsd planlaşdırılmışdısa, bunu heç də tək Rəşad Aşurovun ayağına yazmaq doğru olmazdı. Bir qədər keçmişə dönüb baxsaq, görərik ki bu terrora deyəsən uzun müddət, məqsədyönlü surətdə hazırlıq işləri getmişdi. Məsələn, 2002-ci ildə istifadəyə verilmiş Şəki OİK-si 2-3 il sonra qəflətən, müəmmalı şəkildə təmirə dayanır?! Obyektin mühafizəsinə rəhbərlik Dünyamin Xəlilova tapşırılır, o da OİK-nun 20 nəfərdən çox şəkili mühafizəçisini, Zaqatala, yaxud digər şimal rayonlarından gətirilmiş adamlarla əvəz edir. OİK-si 5-6 il fəaliyyət göstərmir, qapıları şəkililərin üzünə bağlı qalır, hətta Dünyamin Xəlilovun göstərişi ilə Şəki şəhərinin icra hakimiyyəti başçısını da içəri buraxmırlar! Amma bura Şəkidə heç kimin tanımadığı adamlar gəlirdilər, burada məşq edirdilər, həm də gecələyirdilər! Heç bir qeydiyyat da aparılmırdı. Tezliklə, şəkidə az qala bütün obyektlərin mühafizəsi və həm də üstəlik obyektlərin özü "vəhhabist"lərin nəzarətinə keçmişdi. Rəşad Aşurovun sələfi Vahid Abdullayevi isə "Şəki-Bazar" ASC-nin sədri qoymuşdular və o da yalnız öz "vəhhabistlərini" dolandırırdı, Şəki camaatına isə qan yddururdu. Bütün bunlar Şəki polisinin, MTN Şəki şöbəsinin gözləri qarşısında baş verirdi. Deyilənlərə görə bir dəfə sakinlərdən kimsə 102 xidmətinə xəbər verər ki, vəhhabilərə məxsus silahlar filan yerdədir. Şikayətə uyğun olaraq, bazarda axtarış edilməsi lazım gələndə isə MTN-dən, yaxud polisdən vəhhabistlərə xəbərdarlıq edilir ki silahları yığışdırsınlar, gəlirik axtarışa! Vəhhabistlər də silahları aparıb atırlar bazarın yanındakı zibil qabına. Bunun nə qədər doğru olub-olmadığını deyə bilmərəm, amma bazarın zibil qabından odlu silahların tapılması tam dəqiqdir, belə ki bu kadrlar, yəni zibil qabından silah çıxması, televiziyada da nümayiş etdirilmişdir.