Prezident yanında idaretməyə nəzarəti edəcək
İctimai Şura yaradılır; quruma qarşı “gizli əl” var

Azərbaycanda idaretməyə nəzarət edəcək yeni qurum yaradılır. Əldə etdiyimiz məlumata görə, Prezident yanında İctimai Şura adlanacaq bu qurum idaretməyə nəzarəti həyata keçirəcək. Bu sahədəki vəziyyətlə bağlı prezident üçün hesabat hazırlanacaq. Bu quruma QHT təmsilçilərinin, deputatların, müstəqil ekspertlərin, ayrı-ayrı sahələr üzrə mütəxəssislərin, əsasən də gənc kadrların cəlb olunacağı bildirilir. Artıq bu qurumun Əsasnaməsinin hazırlanması üçün müvafiq strukturlara tapşırıq verilib.
Bundan başqa bütün icra hakimiyyətlərində də belə bir İctimai Şura yaradılacaq. Ölkədə idaretmə sahəsindəki problemlər hakimiyyəti ciddi narahat edir və bu sahədəki vəziyyəti bir qədər düzəltmək, məmurları nəzarətdə saxlamaq üçün belə bir addımın atılması zərurəti ortaya çıxıb.
Qeyd edək ki, məmurların özbaşınalığı, vətəndaşların dövlət qurumlarında incidilməsi, insanlarla kobud davranılması kimi faktların geniş yayılması birbaşa prezident İlham Əliyevin dilindən də fevralın 12-də keçirilən müşavirədə səsləndirilib. Prezident belə məmurlara barmaq silkələyərək onlara sonuncu dəfə xəbərdarlıq edib.
Yeni yaranacaq qurumla bağlı danışan məlumatlı şəxs artıq bu xəbərin məmurlar arasında ciddi narahatlıq yaratdığını deyib. Hakimiyyətdə daxilində “gizli əl” bu şuranın yaradılmasını qarşı çıxır və ciddi cəhdlər maneələr yaratmağa səy göstərir.
“Gündəm xəbər”i bilgiləndirən qaynağın sözlərinə görə, bu şura yaradıldıqdan sonra normal fəaliyyət göstərsə, korrupsioner, rüşvətxor məmurlar öz əməllərini gizlədə bilməyəcək. Xüsusilə də, bölgələrdə icra hakimləri qanunsuzluğa aşkar şəkildə yol verməkdən çəkinəcəklər.
Ölkə rəhbərliyi də şuranın yaradılması təklifini dəstəkləyib və buna zərurət olduğunu vurğulayıb. Lakin bəzi qüvvələrə sərf etməyən bu şuranın fəaliyyətə başlayıb-başlamayacağı sual altındadır. Ehtimal olunur ki, seçki ərəfəsində bu qurumun fəaliyyəti ilə müəyyən reformasiyalar mümkündür və daxildəki narazılığı yatırtmaq üçün perspektivli texnologiyadır.

Aslan