Niyazi Mehdi: “Cəmiyyətin siyasi, kültürsəl strukturları suçludur”;

Azad İsazadə: “Populist əhval-ruhiyyə, çağırışlar zamanı adi insanlar tez təsir altına düşür”


Bu günlərdə Hafiz Hacıyev internet tv-lərdən birinə müsahibə verdi. Bahalaşma, məmur özbaşınalığı, insanların güzəranı barədə danışan H.Hacıyev bu müsahibədən sonra sosial şəbəkədə alqışlanmağa başladı. Cəmiyyət dünənə qədər birmənalı qiymət vermədiyi şəxsləri bir açıqlaması, bir jesti ilə az qala qəhrəman kürsüsündə oturdur. Bu, Azərbaycan insanının unutqanlığıdır, ya xilaskar axtarışı? Yaddaş problemi xalqa dünənə qədər neqativ yanaşdığı insanları qəhrəman edir? Ekspertlər duruma bir qədər fərqli prizmadan yanaşmanın tərəfdarıdır.

Filosof Niyazi Mehdi hesab edir ki, ictimai rəy hər yerdə vəfasızdır: “Sadəcə, toplum bilgili olanda onun rəyini tez dəyişmək də elə asan olmur ki, deyəsən nə yelbeyin camaatdır. Ancaq ictimai rəyin yelbeyinliyinə qarşı vasitələri də var: alternativ düşüncələrə geniş meydan, diskussiya və danışanların bioqrafiyası, etdiklərinin siyahısı”.

Müsahibimiz bu durumda günahkar axtarmağın tərəfdarı deyil. Onun sözlərinə görə, cəmiyyətin siyasi, kültürsəl strukturları suçludur: “Toplumda ictimai rəydəki yelbeyinliyin qarşısını alan institual şəbəkə olmalıdır. Olmamasına görə kimlər suçludur, siyasilər, mentalitet, gələnəklər?”




Psixoloq Azad İsazadə isə konkret hansısa siyasətçinin davranış və bəyanatlarını qiymətləndirmək istəmədiyini bildirdi. Onun fikrincə, hərə özünə cavabdeh olduğu uçün bu məsələdə təhlilə ehtiyac yoxdur. Amma psixoloq xalqımızın hansısa formada unutqan olduğunu düşünür: “İstər faciəvi hadisələrə görə, istərsə Qarabağ məsələsində millətin unutqan olması sübut edilib. Amma sizin haqqında danışdığınız vəziyyət unutqanlıqla bağlı deyil. Populist əhval-ruhiyyə, çağırışlar zamanı adi insanlar tez təsir altına düşür. İkincisi də böhran vəziyyətdə populist bəyanat o qədər də pis deyil. Sözsüz ki, hər bir siyasətçi seçkilərdə bir az populist olmalıdır. Amerika prezidentliyinə namizədlər də belə edir. Bu, onların seçki kampaniyaları zamanı ən effektli silahıdır”.



A.İsazadə bildirdi ki, böhran vəziyyətdə durum çətindir və bunu anlamaq olar. Onun sözlərinə görə, bu vəziyyətdə populist çıxış edən şəxslərə inanmağımız olduqca təbiidir: “Bizə elə gəlir ki, bu böhrandan çıxış yolu var. Düşünürük ki, bunu kimsə etsin, amma məndən başqa. Bu məqamda populist şüarlar yaxşı keçir. Fransada populist şüarlarla çıxış edən Lependaha çox səs topladı. Macarıstan baş naziri də məhz bu cür populist çıxışlarına görə səsvermədə irəliləyib. Ümumböhran dönəmində bu, xalqa qarşı istifadə olunan üsuldur və effekt verir”. (musavat.com)