“Rəşadı namusuma xələl gətirən hərəkət edərək ləyaqətimi alçaltdığı üçün öldürmüşəm”

Dəhşətli qətl hadisəsi törətməkdə təqsirli bilinən Ucar rayon sakini, 1989-cu il təvəllüdlü Vüsal Mehdiyevin cinayət işi üzrə məhkəmə prosesi başa çatıb. İttihama görə, Vüsal Mehdiyev 6 dekabr 2011-ci il tarixdə Zərdab rayonunun Dəliquşçu kəndində, onunla qonşuluqda yaşayan Rəşad Zeynalovun istifadəsində olan mobil telefonundan onun həyat yoldaşı Elnurə Manaflının istifadəsində olan mobil telefonuna zəng etməsinin şahidi olub.

Vüsal Mehdiyev 2014-cü ilin təxminən dekabr ayında isə Rəşad Zeynalovun onun arvadına intim əlaqə təklif etməsini eşidib, eləcə də həmkəndliləri arasında namusunu qoruya bilməyən şəxslər barəsində söylədiklərini ona ünvanladığını güman edib.

Bundan sonra Vüsal Mehdiyev Rəşad Zeynalovun bu hərəkətlərini özünün şərəf və ləyaqətini alçaldan, namusunu ləkələyən hərəkət kimi qiymətləndirib. O, qısqanclıq zəminində Rəşad Zeynalova qarşı yaranmış kin-küdrət hissindən öldürməklə, ondan qisas almaq qərarına gəlib.

Bu niyyətlə o, 29 dekabr 2014-cü il tarixində Rəşad Zeynalov və digər tanışları ilə birgə özünün idarə etdiyi “Mercedes Benz” markalı avtomobillə Zərdab rayonunun Dəkkəoba kəndindəki toy məclisinə, daha sonra Gəlmə kəndindəki kafeyə gediblər.

O, Rəşad Zeynalovu həmin gün, saat 23.35 radələrində idarə etdiyi avtomobildə yaşadıqları Dəliquşçu kəndinə gətirərkən, Zərdab rayonu, Hüseynxanlı kəndi ərazisində satılacaq xırda buynuzlu heyvanlara baxmaq adı ilə aldadıb və Hüseynxanlı kəndindən 1,5 kilometr aralı məsafədə yerləşən, həmin kənd sakini Sahibət Bayramova məxsus əkin sahəsinə aparıb.

Orada Vüsal Mehdiyev avtomobilin təkərinin çalaya düşməsini bəhanə edərək Rəşad Zeynalova avtomobildən çıxaraq baxmağı xahiş edib. O, Rəşadın axırıncı düşərək təkərə baxdıqdan sonra bir qədər kənara çəkilib. Bu zaman o, qəsdən öldürmək məqsədi ilə Rəşad Zeynalova yaxınlaşaraq özündə olan bıçaqla onun döş nahiyəsinə bir zərbə vurub.

Rəşad Zeynalova bıçaq zərbələri vuran Vüsal Mehdiyev ondan qisas almaq məqsədilə bu hərəkətləri etdiyini bildirib. Həmin vaxt Rəşad onun əlindən çıxaraq qaçmağa başlayıb. Amma o, Rəşadın arxasınca qaçaraq, onu tutub və bıçaqla onun bədəninə daha bir-neçə zərbələr vurub.

Bundan sonra Rəşad Zeynalovun müqavimət göstərməsini görüb və həmin bıçaqla onun baş nahiyyəsinə daha bir zərbə vurub. Rəşad Zeynalov aldığı xəsarətlərdən ölüb.

Daha sonra Vüsal Mehdiyev idarə etdiyi avtomobildə olan 0,5 litrlik plastik butulkadakı yandırıcı mayeni Rəşad Zeynalovun meyitinin üzərinə töküb və onun meyitini yandırıb.

“Rəşad arvadıma söz atıb, yaxınlıq təklif edib”

Vüsal Mehdiyev Cinayət Məcəlləsinin 120.2.4-cü (xüsusi amansızlıqla və ya ümümi təhlükəli üsulla adam öldürmə) maddəsi ilə ittiham edilib. Lənkəran Ağır Cinayətlər Məhkəməsinin hökmü ilə Vüsal Mehdiyev 15 il müddətinə azadlıqdan məhrum edilib.

Hökmdən narazı qalan Baş Prokurorluq apelyasiya protesti verərək, Vüsal Mehdiyevin cəzasının ağırlaşdırılmasını istəyib. Eyni tələblə zərərçəkmiş tərəfdə apelyasiya şikayəti verib. Vüsal Mehdiyev də cəzasının yüngülləşdirilməsi ilə bağlı apelyasiya şikayəti verib. Tərəflərin şikayəti araşdırılması üçün Şirvan Apelyasiya Məhkəməsinə göndərilib.

Məhkəmədə ifadə verən Vüsal Mehdiyev ona verilmiş ittiham üzrə özünü qismən təqsirli bilib. O, bildirib ki, mərhum Rəşad Zeynalov ilə qonşuluqda yaşayıb, həmçinin əvvəllər dostluq münasibətində olublar:

“Rəşad arvadıma söz atıb, yaxınlıq təklif edib. Bu sözlərdən sonra artıq mənim səbrim tükənib və Rəşadı cəzalandırmaq qərarına gəlmişəm. Buna məqam gözləmişəm. İşlətdiyim mağazadan bir ədəd mətbəx bıçağı götürərək özümə məxsus avtomaşına qoymuşdum ki, Rəşadla haq-hesab çəkim”

“Dedim ki, bunu namusuma ləkə gətirdiyin üçün edirəm”

Təqsirləndirilən şəxsin sözlərinə görə, dekabrın 29-da Rəşaddan qisas almağı nəzərdə tutduğundan çayxana yanında dayanaraq onu gözləyib: “Səbuhigillə çayxanadan çıxan Rəşad onları rayonun Gəlmə kəndindəki kafeyə aparmağımı xahiş etdi. Mən də onunla razılaşdım. Bu vaxt Rəşadgil özləri ilə həmkəndliləri Elgünü də çağırdılar. Onların dördünü də öz avtomaşınımda həmin kafeyə gətirdim. Orada bir neçə bakal pivə içdik. Rəşadgillə Zərdab şəhərindəki kafeyə gedərək, orada çay içdikdən sonra Rəşadı bir bəhanə ilə özüm ilə, Elgüngildən ayrı saxlamaq üçün evə başqa yolla gedəcəyimi dedim. Rəşad isə qonşum olduğundan avtomaşınımda qaldı. Maşını bir qədər sürdüm və sonra guya maşının təkərinin çalaya düşdüyünü bəhanə edərək, kimsəsiz bir yerdə saxladım. Rəşada düşərək təkərə baxmağı təklif etdim”.

Vüsal Mehdiyev bildirib ki, Rəşad maşından düşərək təkərə baxıb və ona heç nə olmadığını deyib: “Bu zaman Rəşad kənara çəkilərək təbii ehtiyacını ödəməyə başladı. Bu məqamdan istifadə edərək əvvəlcədən maşına qoyduğum bıçağı götürdüm və ona yaxınlaşaraq nəyə görə məni tanışların yanında ələ salmasını soruşdum. Rəşad isə cavabında güldü. Bundan qəzəblənərək əlimdə olan bıçaqla Rəşadın sinəsinə zərbə endirdim. Bu zərbədən bir az geri atılan Rəşad “ə, nağayrırsan” deyərək etdiyim hərəkətin səbəbini soruşdu. Mən də ona “ bəs bilmirdin adamın arvadına sataşıb, onu ələ salanda nə olur” dedim. Ona anlatdım ki, bunu namusuma ləkə gətirdiyi, layaqətimi alçaltdığı üçün edirəm. Bu sözləri eşidib, əlimdə bıçaq görən Rəşad aralanaraq qaçmağa başladı”.

“Qəzəbimdən özümdə olmamışam”

Vüsal Mehdiyev qeyd edib ki, bu zaman Rəşadı təqib edib və ona çataraq, kürək nahiyəsinə bıçaqla zərbə vurub: “Bundan sonra Rəşad yerə yıxıldı. Mən də onun üstünə çökərək bıçaqla zərbələr vurdum. Həmin vaxt Rəşad müqavimət göstərərək əlimdən tutaraq bıçaq zərbələrindən müdafiə olunmağa çalışıb. Həmin vaxt qəzəbimdən artıq özümdə olmamışam. Məqsədim yalnız Rəşadı öldürmək olub. Ona görə də, yerdə olarkən Rəşada neçə və harasına bıçaq zərbəsi vurduğumu xatırlamıram. Çünki artıq qəzəbimdən özümdə olmamışam. Lakin zərbəni Rəşadın boğaz nahiyəsinə vurduğumu və bundan sonra Rəşadın hərəkətsiz qaldığını xatırlayıram. Bundan sonra Rəşadın hərəkətsiz vəziyyətdə qaldığını və artıq nəfəsi də gəlmədiyini görərək öldüyünü bildim. Sonra, bir qədər özümə gəldim, törətdiyim cinayətin izini itirmək üçün avtomobilində motorlu mişar üçün hazırladığım sürtgü yağı ilə qatışıq olan 0,5 litrlik şüşə butulkadakı yanacağı-benzini götürərək Rəşadın meyitinin üzərinə tökdüm. Sonra kibritlə alışdıraraq onun meyitini yandırdım və avtomaşınına minərək sürətlə hadisə yerindən uzaqlaşdım”.

“Peşmanam”

Təqsirləndirilən şəxsin sözlərinə görə, əvvəl polisə gedərək törətdiyi əməl barədə məlumat vermək istəyib: “Lakin bunu dərhal etməyi bacarmadım. Səbəb isə qorxmuşam. Sonradan istintaqa cəlb edilərkən törətdiyim əməli səmimi etiraf etmişəm. Lakin ibtidai istintaq zamanı ifadə verərkən peşmançılıq və törətdiyim hadisə təsiri altında olduğumdan ilk ifadəsində Rəşad Zeynalovun üstünə benzin tökərkən onun ölmüş olduğunu bilməyimi və bunu izi itirmək üçün etdiyimi deməmişəm. Bu məqamın ifadəmdə necə əks olunduğunun mahiyyətinə də varmamışam. Ona görə də ibtidai istintaqda bu hal üzrə verdiyim ilk ifadəsini təsdiq etmirəm. Rəşad Zeynalovu namusuma xələl gətirən hərəkət edərək ləyaqətimi alçaltmağı səbəbindən öldürmüşəm. Bu zaman Rəşad Zeynalova iztirab vermək, onu qəddarlıqla öldürmək, diri-diri yandırmaq fikri olmayıb və bu məqsədlə də onun üstünə benzin tökərək yandırmamışam. Törətdiyim əməldən peşmançılıq çəkirəm”.

“Oğlumu xüsusi amansızlıqla öldürüb”

Zərərçəkmiş şəxsin hüquqi varisi İnşallah Zeynalovun sözlərinə görə, mərhum Rəşad Zeynalovun atasıdır: “Oğlum Rəşad təbiətən mülayim, qonşularla mehriban münasibətdə olub. Vüsal Mehdiyev arvadı və valideynləri ilə bizimlə çəpər qonşuluğunda yaşayıb, münasibətlərimiz yaxşı olub. Sonuncu dəfə oğlum Rəşadı 29 dekabr 2014-cü il tarixdə evdə görmüşəm. Bundan sonra Rəşad qonşularımız Vüsal Mehdiyevin mağazasına gedib ki, nisyə aldığı pres ipinin pulunu ödəyib və bu zaman mobil telefonunu evdə qoyub. Axşam oğlumun evə qayıtması ilə maraqlandım. Lakin səhər arvadım Rəşadın evə qayıtmadığını və evdə gecələmədiyini dedi. Bundan şübhələnərək dərhal Zərdab Rayon Polis Şöbəsinə məlumat verərək, oğlum ilə bağlı məlumatları olub-olmadığını soruşdum. Orada adını bilmədiyim bir polis əməkdaşı Zərdab rayonu, Hüseynxanlı kəndi ərazisində hadisə baş verdiyini bildirdi və onunla məscidə getməyi təklif etdi. Birlikdə məscidə gəldikdə orada yuyulan meyitin paltarlarından Rəşada məxsus olduğunu bildim. Sonrada istintaq orqanından aldığım məlumatdan bildim ki, oğlumu qonşumuz Vüsal Mehdiyev tərəfindən öldürülüb. Rəşadın Vüsal Mehdiyevin arvadına sataşması, ona atmacalar atması barədə əvvəllər heç bir məlumatım olmayıb, oğlumun belə hərəkətlər etməsinə inanmıram. Hesab edirəm ki, Vüsal Mehdiyevin oğlumu xüsusi amansızlıqla öldürüb”.

İnşallah Zeynalovun vəkili Adəm Məmmədov prokurorluğun protestin təmin olunmasını, məhkum edilmiş şəxsin müdafiəçisinin apelyasiya şikayətinin təmin olunmaması barədə qərar qəbul edilməsini xahiş edib. Nümayəndə Vüsal Mehdiyevin ittiham olunduğu maddənin sanksiyasında nəzərdə tutulmuş ən yuxarı həddə, 20 il və ya ömürlük azadlıqdan məhrum etmə cəzasının təyin olunmasını istəyib.

Dövlət ittihamçısı Ədalət Əzimov təqsirləndirilən şəxsin apelyasiya şikayətinin təmin edilməsini istəyib. O, bildirib ki, Vüsal Mehdiyevin cəzasının ağırlaşdırılması barədə qərar qəbul edilməsi üçün əsaslar var.

Vüsal Mehdiyevin vəkili Ruhid Əkbərov apelyasiya şikayətinin dəlillərinə uyğun çıxış edib. O, apelyasiya şikayətinin təmin edilməsini istəyib. Vəkil qeyd edib ki, müdafiə etdiyi şəxsin əməli Cinayət Məcəlləsinin 120.1-ci (qəsdən adam öldürmə) maddəsi ilə tövsif olunması üçün əsaslar var.

Ruhid Əkbərov müdafiə etdiyi şəxsin cəzasının daha yüngül cəza ilə əvəz edilməsini, prokurorluğun protestinin, həmçinin zərərçəkmiş tərəfin apelyasiya şikayətinin təmin edilməməsini xahiş edib.

Hakim kollegiyası sonda prokurorluğun protestinin təmin edilməsi barədə qərar açıqlayıb. Qərara görə, Vüsal Mehdiyevin cəzası artırılaraq, ona 17 il müddətinə azadlıqdan məhrum etmə cəzası təyin edilib. Təqsirləndirilən şəxsin və zərərçəkmiş tərəfin apelyasiya şikayətləri isə təmin edilməyib.