Nazir bərbad təhsilin günahını testdə axtarır

Faciə bundadır ki, mövcud hakimiyyət təkcə ölkənin sərvətlərini talan etməklə kifayətlənməyib. Yəni, ölkəyə vurulan zərər təkcə maddiyyatla məhdudlaşmayıb, həm də mənəvi zərbələr vurulub. Ən böyük mənəvi zərbə isə təhsil sisteminin iflic vəziyyətə salınmasıdır. Bəli, təhsili sisteminin məhvi bütün dəyərlərin məhv edilməsi deməkdir. Təəssüflər olsun ki, Azərbyacan Universitetləri dünya reytinqlərində sonuncu yerləri tutur, hər dəfə imtahan nəticələri kütləvi savadsızlığı ortaya qoyur, təhsil verənlər dilənçi maaşına məhkum edilib və korrupsiya bu sahəni də ağuşuna alıb.

Amma hökumətimiz təhsilin bərbad vəziyyətini yarıtmaz idarəetmədə deyil, test üsülünda axtarır. Bəli, Təhsil Naziri Mikayıl Cabbarov “Hesabat” verilişində elə danışıb ki, sanki bütün bəlaların səbəbi test üsulu imiş. “Hazırkı imtahanın forması əmək bazarında tələb olunan müasir, uğurlu məzunun əldə olunması üçün bir sıra kompetensiyaları ölçmür və yaxud ölçmək qabiliyyətinə malik deyil” – deyə Mikayıl Cabbarov bildirib.

Təhsil naziri onu da vurğulayıb ki, testin daha bir çatışmazlığı məzunun gələcəyinin, taleyinin 3 saatlıq imtahanda həll olunmasıdır.

Xatırladaq ki, bir müddət əvvəl Mikayıl Cabbarov “dünya Azərbaycanın təhsil təcrübəsini öyrənir” söyləmişdi. Indi isə nazirimiz bu qərara gəlib ki, dünyaya yeni təcrübələr göstəmək lazımdır. Yəni, bu dəfə də testi ləğv etməklə nümunə göstərmək istəyirlər. Bəli, hökumət uzun illərdən sonra xəbər tutub ki, təhsilimizin “koma” vəziyyətinə düşməsi test üsulunun çatışmazlığı ilə bağlıymış. Belə çıxır ki, təhsil sektoruna ayrılan milyardların mənimsənilməsi, ucqarlarda tövləyə oxşayan məktəblərin fəaliyyət göstərməsi, müəllimin 150 manatın ümidinə qoyulması, imtahanların pulla yazılması, diplomun satılması, təhsilin bazara çevrilməsi testin günahıymış. Deməli, müasir uğurlu məzunun əldə olunmasına test üsulu əngəl olurmuş. Sanki, tələbənin yüksək təhsil haqqıyla, cüzi təqaüdlə sınağa çəkilməsi, xaricdə təhsil alan tələblərin ölkəyə qyıtmaq istəməməsi, elmi işçilərin 150-200 manat maaş alması, müəllim olmaq istəyənlərin sayının azalması test üsulunun yaratdığı bataqlıq imiş.

Göründüyü kimi hökumət hələ də imitasiya ilə məşğuldur, real maneələri gündəmdən çıxarır və yenə də günahı başqa yerdə axtarır. Bu hakimiyyətin dövründə heç vaxt təhsilin inkişaf etdirilməsi prioritet olmayıb, heç vaxt şagirdlərə, tələblərə stimul verəcək addımlar atılmayıb. Əksinə, bu hakimiyyət insanların beynində “oxuyanların əli bala batıb” qənaətini formalaşdırıb. Ölkənin professorları, fikir adamları xarici ölkələrə qaçıb, hökumətin münasibəti ölkədən beyin axınını zəruriləşdirib.

Bu gün təhsilin acınacaqlı vəziyyətdə olması hakimiyyətin məqsədyönlü siyasətinin nəticəsidir. Hakimiyyət üçün müəllim bilik verən şəxs kimi yox, seçkilərdə saxta bülleten daşıyan kimi önəmlidir. Orta təhsil demək olar ki, sıradan çıxıb və şagirdlər repetitorların ümüdünə qalıb. Müəllim elə vəziyyətə salınıb ki, repetitorluğa daha çox vaxt və enerji sərf edir. Orta məktəblər isə “fond pulu”, “süpürgə pulu”, “gül pulu”, “təbaşir pulu” yığmaqla məşğuldur.

Məktəbi bazara çevirib, uğursuluğu testin üzərinə atırlar. Testin ləğv olunması isə korrupsiyanın daha da çiçəklənməsinə xidmət edəcək. Qabaqcıl dünya təcrübəsiin öyrənmək, təhsil işçilərinin sosial vəziyyətini düzəltmək, korrupsiyanı ləğv etmək əvəzinə, testlə müharibəyə başlayıblar.

İlham