Xalqın durumu olduqca ağırdır və ölkədə mövcud olan narazılıq
prezident seçkiləri zamanı mövcud hakimiyyətin əleyhinə işləyəcək;
əgər seçkilərin nəticəsi saxtalaşdırılmasa, o zaman buna nail olmaq,
hazırkı hakimiyyəti qanuni yolla devirmək mümkün olacaq

Azərbaycanda prezident seçkiləri yaxınlaşdıqca müxtəlif faktorların qarşıdakı seçkilərə təsiri ilə bağlı səslənən şərhlərin sayı da çoxlamaqdadır. Bütün bu şərhlərdə ən çox diqqət çəkən məqam isə seçkilərin Rusiya və Qərb amili ilə əlaqələndirilməsidir. Belə ki, bu gün yalnız adi vətəndaşlar deyil, əksər siyasilər də hesab edir ki, Azərbaycanda Rusiya və Qərbin arzuedilməz hesab etdiyi hər hansı bir şəxsin prezident postunda qərarlaşması mümkün deyil. Başqa sözlə desək, Azərbaycanda yalnız o şəxs prezident ola bilər ki, o, ya Rusiya, ya Qərb, ya da hər iki cəbhə tərəfindən müdafiə edilsin. Yalnız belə olacağı təqdirdə hər hansı bir siyasinin prezident postunda qərarlaşması mümkün hesab olunur.
Siyasilərin fikrincə, Ermənistanda sonuncu prezident seçkiləri zamanı namizəd məsələsi Qərb və Rusiya tərəfindən razılaşdırıldı və bu səbəbdən də keçirilən seçki və onun nəticəsi hər iki tərəfdən qəbul edildi. Bu baxımdan Azərbaycanda keçiriləcək seçkilərdə də Rusiya və Qərb amilinin aparıcı olacağı güman edilir. Lakin bütün bunlarla yanaşı keçiriləcək seçkilərdə xalq faktorunun vacibliyinə diqqət çəkən, bu faktoru yuxarıdakı digər iki amildən daha vacib hesab edən siyasilər də yox deyil. Bu qəbildən olan siyasilərin fikrincə, Rusiya və Qərb amilinin Azərbaycanda keçiriləcək prezident seçkilərinə ciddi təsiri olsa da, daha həlledici səs xalqa məxsusdur. Onların qənaətinə görə, məhz Azərbaycan xalqı seçkilər zamanı öz iradəsini ortaya qoyaraq prezident görmək istədiyi şəxsin kimliyini müəyyənləşdirəcək və öz taleyinə özünün yön verdiyini isbatlayacaqdır. Yəni əgər xalq bu məsələdə qəti iradə ortaya qoyarsa, o zaman Qərb və Rusiyanın hansı mövqe sərgiləməsindən asılı olmayaraq xalqın istədiyi şəxsin seçkilərdə qələbəsi təmin olunacaqdır.
Seçkilərdə xalq faktorunun rolu kənar amillərə nisbətən daha vacib və daha önəmlidir. Hazırda Azərbaycanda xalqın durumu olduqca ağırdır və ölkədə mövcud olan narazılıq prezident seçkiləri zamanı mövcud hakimiyyətin əleyhinə işləyəcək. Təbii ki, seçkilərdə aparıcı rolu hər zaman daxili amillər oynayır. Azərbaycanda hazırda etiraz o səviyyəyə çatıb ki, bu etirazın ümumxalq dalğasına çevrilməsi üçün əlverişli bir situasiyanın yaranması kifayətdir. Seçkilərin yaxınlaşması da indiki rejimə qarşı xalqın dinc yolla mübarizəsi baxımında böyük fürsətdir. Xalq bu fürsətdən istifadə edərək hakimiyyəti dəyişə, mövcud rejimin varlığına son qoya bilər.
Xalqın mövcud sistemi səsvermə yolu ilə devirməsi tamamilə mümkündür və əgər seçkilərin nəticəsi saxtalaşdırılmasa, o zaman buna nail olmaq, hazırkı hakimiyyəti qanuni yolla devirmək mümkün olacaq. Xalq mitinq və aksiyalarla yanaşı sonuc olaraq səsvermə yolu ilə bu məsələni həll edə bilər. Ancaq bir şərtlə ki, xalqın verdiyi səs sayıla bilsin. Yəni ortada hər hansı bri saxtakarlıq olmasın. Seçkinin nəticəsi saxtalaşdırılmazsa, xalqın iradəsi seçkinin taleyini birmənalı şəkildə həll edə bilər.
Bundan öncə keçirilən seçkilərdə mövcud rejimin qalib gəlməsinin səbəbi də məhz seçkilərin nəticəsinin saxtalaşdırılması ilə bağlıdır. Həmin seçkilərin nəticəsi saxtalaşdırıldığı üçün hakimiyyətin qalibiyyəti təmin edildi. Halbuki, nəticələr saxtalaşdırılmasaydı, seçkinin nəticələri xalqın iradəsini əks etdirsəydi, o zaman xalqın istəyinə uyğun olarq hakimiyyət dəyişikliyi reallaşmış olardı.

Azər Talıbov