İsa Qəmbər namizədliyini irəli sürdükdən sonra İctimai
Palata daxilində olan AXCP-nin səbrlə gözləmə mövqeyi
tutması iqtidar texnoloqlarını ciddi düşünməyə vadar edib;
ümumi səsləri parçalamaq üçün “Hamınız namizəd olun” tapşırığı

Redaksiyamıza daxil olan məlumata əsasən hakimiyyətin siyasi texnoloqları 2013-cü ilin prezident seçkiləri ilə əlaqədar olaraq yeni taktiki planın icrasına başlayıblar. Hakimiyyətə yaxın mənbənin verdiyi xəbərdə deyilir ki, Prezident Adminstrasiyasında son zamanlar ölkənin daxilində siyasi müxalif qrupların fəallaşması fonunda yeni planın icrası ilə bağlı olaraq fəaliyyət başlayıb.
Məlumatda bildirilir ki, Rusiyaya meyil edən və konkret olaraq Kremlin himayəsi altında ölkədə siyasi müxaliflik etmək istəyənlərlə yanaşı, həmçinin də İranın və digər düşmən güclərin təsiri altında olan qrupların aktivləşməsi istənilən halda ciddi narahatlıqlar yaradıb. Məlumatlara görə, bu situatsiyanı dəyişmək üçün PA-dan artıq yeni planın icrası ilə bağlı olaraq göstərişlər də verilib. Məlumatlara əsasən illərdir ki, hakimiyyətin loyal yanaşdığı, hətta müxalifətin əsas gücləri ilə bəzən bir masada otura bilmək imkanları qazanmış kiçik – cib müxalifət partiyaları da seçkilərdə iştirak etməklə bağlı olaraq qərarlar verməyə başlayıblar. Mənbə iddia edir ki, yaxın bir-iki ay ərzində belə onlarla namizəd ortaya çıxacaq.
Bu ilin prezident seçkilərində müxalifətin vahid güc mərkəzi yaradaraq seçkilərəqatılması, tək namizədlə iştirak etməsi məsələsi əslində hakimiyyəti ciddi şəkildə narahat etməyə başlayıb. Məlumatda deyilir ki, Müsavat başqanı İsa Qəmbər namizədliyini irəli sürdükdən sonra İctimai Palata daxilində olan AXCP-nin səbrlə gözləmə mövqeyi tutması iqtidar texnoloqlarını ciddi düşünməyə vadar edib. Həmçinin də ortada olan bir-iki əsas müxalif partiyaların da vahid namizəd məsələsinin həll ediləcəyi təqdirdə iddialarından geri durmaqla bağlı olaraq açıq mövqe ifadə etmələri də gözlənilən xaotik situatsiyanı şəkilləndirib.
Məhz belə bir məqamda daha çox namizədin seçkiyə qatılması və sonucda səslərin çox kiçik fərqlərlə namizədlər arasında paylaşdırılması planı artıq icra edilməyə başlayıb. Onu da bildirək ki, artıq seçkidə «dejurnı» namizədlər öz kiçik kabinetlərində əmək haqqı verdikləri işçilərini yığaraq namizədliklərini irəli sürməyə başlayıblar. Onların adları bizə bəlli olduğundan hər halda dəyərli ziyarətçimiz bu namizədlərin kimlər olacağını anlamamış deyil.
Bizə məlumat verən mənbə iddia edir ki, hətta namizədlər bataqlığı yaradılması ilə imzatoplama və qeydə alınma prossesində də problemlərin yaradılması məsələsi müzakirə edilib. «Seçki məcəlləsi»nə görə bir vətəndaşın yalnız bir namizədə imza verə biləcəyi təsbit olunduğundan artıq imzatoplamada yarana biləcək təbii problemlər də iqtidar texnoloqları tərəfindən xeyirli bir göstərici kimi vurğulanıb. Qeyd edək ki, iqtidarın himayəsində olan və özünü müxalifət kimi təqdim edən kiçik sosial qrupların başçılarına lazım olan maliyyə vəsaitinin ayrılacağı vədi də verilib.

Azər