«Ölkədəki vəziyyət hər kəsin, eləcə də dindarların siyasi fəallığını zəruri edir»

Deputat Zahid Oruc son zamanlar ölkədə fəaliyyət göstərən dini qurumların müxalifətlə yaxınlaşdığını və bunun təhlükəli tendensiya olduğunu bildirib. Onun fikrincə, müxalifətin əsasən Irandan dəstək alan dini qüvvələrlə yaxınlaşması qüsurlu addımdır: “Bizim sağ-mərkəzçi adlanan qüvvələrin son zamanlar açıq şəkildə dini-fanatik dairələrə ”stavka" etdiyini birmənalı söyləmək mümkündür.
Xüsusilə, AXCP və Müsavat dini qurumlardan dəstək qazanmağa çalışır. Bu, Azərbaycan siyasi həyatı və siyasi sistemimiz üçün çox ciddi bir problem sayıla bilər. Açıq şəkildə özünün perspektivini görmədiyi halda, mübarizənin gələcəyini hesablayarkən, yəni, bu təhlükələrin nədən ibarət olacağını bilərəkdən dini-ekstremizmin, hədsiz fundamentalist baxışların stimullaşdırılması, onlara meydan verilməsi və siyasi həyatda onların istismarı birmənalı olaraq, bu müxalif qüvvələrin özünü yaşadan Azərbaycan üçün arzuolunmazdır".
Ölkədəki vəziyyət cəmiyyətin bütün kəsimlərinin, eləcə də dindarların öz hüquqları uğrunda mübarizə aparmasını zəruri edir. Bu ölkədə hər kəsin, eləcə də dindarların siyasi proseslərdə fəallıq göstərmək hüququ var. Heç kim bu hüququ onların əlindən ala, onlara bu məsələdə qadağa qoya bilməz. Son vaxtlar dindarlar məhz inanclarına görə repressiyalara məruz qalırlar. Bu da dindar kəsimdə bu qənaəti formalaşdırıb ki, ölkədə demokratik dəyişikliklər olmadan, hüquq və azadlıqlara təminat yaranmadan onların da etiqad azadlığı təmin edilməyəcək. Dindarlar bu zərurəti qəbul etdiklərinə görə demokratik dəyişikliklər uğrunda mübarizədə fəallaşıblar. Bu müsbət əlamətdir ki, cəmiyyətin bütün təbəqələri dəyişikliklər prosesində iştirak etməyə hazırdır.
Hakimiyyəti təmsil edən və onun maraqlarından çıxış edən bir şəxs kimi Zahid Orucun bu məsələdən narahat olması təbiidir. Hakimiyyət narahatdır ki, demokratik hərəkat bu cür genişlənib və prosesdə dindar kəsim də böyük rol almağa başlayıb. Bu, demokratik qüvvələrin xeyrinə olan prosesdir. Nəticə etibarilə bu, dəyişikliklər uğrunda mübarizə aparan qüvvələrin həm sosial baza, həm də cəmiyyətə təsir baxımından güclənməsinə gətirib çıxaracaq.
Elçin