Hakimiyyətin Milli Şuraya qarşı müdhiş planı...
Qurumda təmsil olunanlara qarşı hücum və qara piar taktikası işə salınır, seçkidən sonra AXCP-Müsavat terror olunacaq
Rüstəm İbrahimbəyov Milli Şuranın Rusiyanın layihəsi olmasından və hansı namizədi dəstəkləyəcəyindən danışdı: “Xalq gec-tez ayağa qalxacaq”
Ölkənin siyasi həyatındakı durğunluğa son qoyulur. Seçkilər yaxınlaşdıqca ictimai-siyasi canlanmanın hərarəti daha da yüksəlməkdədir. Mayın 28-də Milli Şuranın elan olunması bu proseslərin qızışması və aktiv fazaya qədəm qoymasına səbəb oldu. Belə də isə hakimiyyət boş oturmur, tarixdə III Milli Şuranın yaradılmasına qeyri-ciddi yanaşmır və təhlükənin hansı istiqamətlərdən qaynaqlandığını görür. Milli Şuraya qarşı hücum taktikası, qara piar və bu qurumda təmsil olunanları tək-tək mənəvi baxımdan terror etmək planlaşdırılır.
İqtidardakı mötəbər qaynaqlardan “Gündəm-xəbər”ə sızan səhih xəbərə görə, hökumət daxilində Milli Şura ilə bağlı ciddi müzakirələr gedir. Məqsəd təşkilata qarşı hansı üsullara əl atmaq və qurumu cəmiyyətin gözündən salmaq cəhdidir. Eyni zamanda hakimiyyət Milli Şuranın Kremlin diktəsi ilə yarandığını və rus təhlükəsinin mövcudluğunu xalqın diqqətinə çatdırmaq ana xəttini tutub.
Azərbaycan toplumunda rus nüfuzu olduqca aşağıdır və Moskvanın ölkəmizə qarşı hər hansı planı düşmənçilik kimi qiymətləndirilir. İqtidar-müxalifətli xalq Avro-atlantik məkana inteqrasiyanın tərəfdarıdır. Bu da hakimiyyətə sərf edir və Milli Şuranın Rusiyanın ayağına yazmaqla təşkilatın cəmiyyətdə olacaq nüfuzunu bəri başdan gözdən salmağa çalışırlar. Mənbəmiz iddia edir ki, Moskvanın Milli Şurada xərçəng kimi yayılan qolları var və Azərbaycan tərəfi bu qanadları qırmaq niyyətindədir.
Qaynağımız qeyd edir ki, Azərbaycan rəhbərliyi Milli Şuraya və orada təmsil olunan qüvvələrə qarşı qəzəblidir. Hökumət bu seçkidən sakitliklə çıxmağı düşünür və Əliyevin prezidentliyi legitimləşəndən sonra MŞ-da olan qüvvələrdən qisas alınacaq.
Hakimiyyət bu qüvvələrin seçki ərəfəsində vəziyyətdən sui-istifadə etdiyi düşüncəsindədir və Kremlin oyununda dolayısı ilə iştirak etdiklərini hesab edir. O baxımdan intiqam hissi ilə alışıb-yanan iqtidar seçkini gözləyir.
Digər bir tərəfdən bu məsələdə ciddi arqument var. AXCP - Müsavat və digər partiyaların Kremlin layihəsi olduğu deyilən Şurada təmsil olunması onların gələcək taleyini şübhə altına qoyur. Məğlubiyyət olacağı halda hökumət ən şiddətli repressiyaları məhz bu iki partiyaya qarşı tətbiq edəcək, onları vətənə xəyanətdə suçlayacaq, qara piar işə düşəcək. Mənbəmiz bildirir ki, ortada qarışıq və yeknəsəq olmayan oyun gedir, bu durumda hər kəs öz oyununu oynayır. Kimin udub, kimin uduzacağını 16 oktyabrda görəcəyik. Bəs, Milli Şura nə edə bilər? Qurum ölkədə azad seçkilərin keçirilməsinə nail olacaqmı?
İlk baxışdan geniş formatlı birliyin yaranmasını təqdir etmək olar. Müxalif düşərgəni illər sonra İbrahimbəyov öz təşəbbüsü ilə Milli Şuranın çətiri altına toplayıb. İctimai Palatanın oxşarı olduğunu da öncədən qeyd etdiyimiz bu təşkilatın fərqi sadəcə bütün partiyaları, siyasi fiqurları əhatə etməsidir. Ki, bu da vəziyyəti mürəkkəbləşdirir.
Çünki MŞ-da iştirak edən partiyaların arasındakı haçalanma. Mehriban-düşmənçiliyin dərin kökləri var. Bu buzlaşmış münasibətlərin bir neçə gün ərzində əriyəcəyinə ümid etmək sadəlövhlük olardı. Sadəcə, bir neçə aydır elan olunacağı deyilən Milli Şura təsis olunmasaydı daha böyük rüsvayçılıq yaranardı. Odur ki, şərti və nəzəri olaraq bir razılıq əldə olunub və bütün təşkilatlar bir çətirin altına toplaşıblar. Burada hakimiyyətdən maliyyələşən və iqtidarın sözü ilə oturub-duran təşkilatlar belə var. O halda hansı birlikdən və rejimə qarşı mütəşəkkil mübarizədən danışmaq olar?
İkinci suala gəlincə, azad seçkilər keçirilməsi hakimiyyətin süqutu deməkdir. Mövcud iqtidar da bunu gözəl təhlil edir və 20 ildir şəffaf seçkiyə şərait yaratmır. Deməli, bu il də ondan fərqlənməyəcək. Yox, əgər Milli Şuranın hakimiyyətə təzyiqləri və müqaviməti güclü olsa onda hökumət geri çəkilə bilər. Seçkilər isə artıq çox uzaqda deyil və MŞ-da hələlik proqram, vahid strategiya və İdarə Heyəti müəyyənləşməyib. Azad seçkiyə xalq hərəkatını təşkil etməklə nail olmaq mümkündür. Ölkə isə məzarlıq sükutunu xatırladır və toplumun 2013-də dəyişiklik nicatı hiss olunmur.

Bu arada Ziyalılar Forumunun üzvü Rüstəm İbrahimbəyov azadliq.info saytına müsahibəsində deyib ki, Milli Şura hələ elan olunmamışdan hakimiyyət tərəfdən əks-təbliğatla üzləşmişdi: “Milli Şura yaranandan sonra bu təbliğat daha da şiddətlənib. Əsas ittiham isə Milli Şuranın guya Rusiyanın layihəsi olması ilə bağlıdır. Mən hökumət qəzetlərini oxumuram və saytlarına baxmıram. Amma biz dəfələrlə demişik ki, bu ittihamlar uydurmadır. Hakimiyyət qəsdən bu şayiələri buraxır. Bu, hakimiyyətin standart addımıdır. Bir müddət əvvəl hakimiyyət ABŞ-ın Azərbaycanda çevriliş hazırladığını bəyan edirdi və buna görə bir neçə gənci də həbs etdi. İndi də Rusiyanın çevriliş etmək istədyini bəyan edir. Bundan əvvəl «Milyarderlər İttifaqının» da yaranmasında Rusiyanın əlinin olduğu və onların Azərbaycanda çevriliş hazırladığı bəyan olunurdu. Azərbaycanda hər dəfə demokratik hərəkat yarananda, onun yaranma səbəblərini xaricdə axtarmağa çalışırlar. Bu, bir təxribatdır. Hakimiyyət bunu bilərəkdən edir ki, lazım olanda müxalifət liderlərini çevrilişdə ittiham etsin”.
Milli Şuranın seçkidə vahid namizədlə iştirak etmək planından danışan İbrahimbəyov qeyd edib ki, bu gələcəyin işidir: “Əvvəlcə gərək təşkilat öz işinə başlasın, proqramını elan etsin, İdarə Heyətini seçsin. Bütün bunlar ediləndən sonra hər bir şəxs vahid namizədlə bağlı təkliflərini verə bilər. Seçki yolu ilə vahid namizədi seçmək olar. Mənim də namizəd kimi adım bəzi şəxslər tərəfindən hallanır. Mən həmin şəxslərə göstərdikləri etimada görə təşəkkür edirəm. Amma mənim də öz namizədim var. Mən zamanı çatanda başqa bir hörmətli adamın namizədliyini irəli sürəcəm. İndi həmin şəxsin adını çəkmək istəmirəm. Çünki zamanı deyil. Fikrimcə, çox namizədin adı irəli sürüləcək və onlar arasından seçim ediləcək. Beynəlxalq aləmdə Milli Şuranın yaradılmasına rəğbət hiss olunur. Tanınmış “Reuters” agentliyi Milli Şuranın yaranması barədə məlumat verib və vurğulanıb ki, beynəlxalq aləm Azərbaycanda gedən prosesləri diqqətlə izləyir. Düşünürəm ki, demokratik qüvvələrin bir araya gəldiyi Milli Şuranın yaranmasından sonra beynəlxalq dəstək artacaq. Amma bir məqamı vurğulamaq istəyirəm: Məqsədimiz seçki vasitəsilə, dinc yolla Azərbaycanı demokratikləşdirməkdir. Biz xaos, inqilab tərəfdarı deyilik. Hakimiyyət xalqı elə vəziyyətə gətirir ki, xalq gec-tez ayağa qalxacaq. Ona görə biz çalışırıq ki, bu hadisələri qabaqlayaq və zəruri olan islahatlar dinc yolla həyata keçsin”. Ölkəyə qayıdacağını deyən Rüstəm bəy bildirib ki, bu iyunun 20-dən sonra olacaq: “Mütləq qayıdacağam. Mən hazırda iki filmin üzərində işləyirəm. Bu filmlərlə bağlı daha sonra Avropa və ABŞ-a getməliyəm. Bu təxminən iyunun 20-nə qədər çəkə bilər. Sonra mütləq Bakıya qayıdacam”.
AXCP sədri Əli Kərimli MŞ-la bağlı bunları deyib: “İndidən vahid namizədlə bağlı hər hansı mülahizə söyləmək mümkün deyil. Çünki bizim Milli Şuranın hazırlıq müzakirələrimizdə bu məsələyə toxunulmayıb. Mümkündür ki, Milli Şuranın seçkilərdə vahid namizədi olsun. Mən şəxsən bunu arzulayıram. Ümumiyyətlə, hələ Milli Şura formalaşmamışdan təxminən bir il əvvəl müxalifətin konsolidasiyası, daha böyük birliyinin yaranmasını təbliğ edirdim və açıq tərəfdarıyam. Hesab edirəm ki, müxalifət yalnız birləşməli deyil, həm də birləşmiş müxalifət vahid namizədlə prezident seçkilərinə getməlidir. Bu şəxsən mənim Xalq Cəbhəsinin sədri olaraq mülahizəmdir. Milli Şurada isə çeşidli qüvvələrlə bir yerdə olacağıq. Onlarla danışacağıq. Mümkün olsa, mən çalışacam ki, özümün doğru bildiyim bu mövqeyi digər həmkarlarıma da qəbul elətdirim”.

Aslan