Komitə sədrinin tutduğu vəzifədən uzaqlaşdırılmasına hazırlıq gedir

gundemxeber.az Sabiq iqtisadi inkişaf naziri Fərhad Əliyein “vurulmasinda” xüsusi xidmətlər göstərmiş və bunun da müqabilində öz mövqelərini xeyli dərəcədə möhkəmləndirmiş Əmlak Məsələləri Dövlət Komitəsinin sədri Kərəm Həsənov yenidən diqqət mərkəzinə gəlib. Ümumiyyətlə, K.Həsənov o məmurlardandır ki, mətbuat mütəmadi olaraq onun fəaliyətini diqqətdə saxlayır. Onun qurduğu biznes şəbəkəsi, topladığı varidatla bağlı qəzetlərdə tez-tez müxtəlif məlumatlara rast gəlinir.
Məsələn, mətbuat yazır ki, K.Həsənov özəlləşdirmə prosesini özünün şəxsi qazanc mənbəyinə çevirərək, qısa müddət ərzində ölkədə barmaqla sayılan külli miqdarda var-dövlət sahiblərindən birinə çevrilib. “Kərəm Həsənov rəhbərlik etdiyi qurumun bütün strukturlarına özünün ən yaxın adamlarını yerləşdirməyə nail olub. Hazırda həmin qurumda çalışanların tam əksəriyyəti bir-biri ilə yaxın qohumdur. Kərəm Həsənov ölkə prezidentinin etibarından sui-istifadə edərək, rəhbərlik etdiyi komitədə elə eybəcər şərait yaradıb ki, bu qurumdakı dözülməz vəziyyətlə yaxından tanış olan istənilən şəxs ölkə rəhbərliyinə heç vaxt xoş münasibət bəsləyə bilməz. Buna görə də bəziləri, hətta bir qədər də irəli gedərək, komitə sədrinin bu hərəkətlərini haqlı olaraq ölkə prezidentinə xəyanət kimi də qiymətləndirirlər” – deyə, qəzetlər yazırlar. Belə iddia edənlər də var ki, K.Həsənov rəhbərlik etdiyi komitəni çox böyük məharətlə rüşvətxorluq və korrupsiya çarxına çevirib. Bundan başqa, K.Həsənovun Birləşmiş Ərəb Əmirliklərində biznes fəaliyyətilə məşğul olması barədə məlumatlara da rast gəlinir. Məsələn, bir müddət öncə onun Dubayda inşa etdirdiyi iddia olunan otel və ofislərin fotoları da mətbuatda dərc olunmuşdu.
K.Həsənovun qısa müddət ərzində özünə gözqamaşdırıcı səltənət qurması artıq yuxarıların da diqqətini çəkib. Məlumatlar var ki, K.Həsənovun prezident İlham Əliyevlə münasibətləri də əvvəlki xarakterini itirib. Hakimiyyətə yaxın mənbələr artıq İlham Əliyevin komitə sədrinə əvvəlki kimi etbar etmədiyini iddia edirlər. Onun fəaliyyətinin dövlət başçısının göstərişilə ciddi nəzarətə götürüldüyünə dair məlumatlar da var.
Əldə etdiyimiz son məlumatlara görə isə K.Həsənovun tutduğu vəzifədən uzaqlaşdırılmasına hazırlıq gedir. Bu barədə bizi bilgiləndirən mənbə K.Həsənovun hazırkı vızifəsində qalmaq imkanlarını tamamilə itirdiyini deyib. Onun sözlərinə görə, korrupsiyaya qarşı mübarizə apardığına dair görüntü yaratmağa çalışan hakimiyyət bu arada yüksək vəzifə tutan məmurlardan bir neçəsini istefaya göndərməyi də planlaşdırır. “Vurulacaq” məmurlar sırasında K.Həsənivun da olduğu bildirilir. “Kərəm Həsənov artıq bütün körpüləri yandırıb. Ona göstərilən etimadı doğrultmayıb. Artiq dövlət başçısı da ona etibarını tamamilə itirib. Odur ki, Kərəm Həsənovun bu arada vəzifəsindən uzaqlaşdırılması tamamilə yerinə düşəcək. Yəqin ki, yaxınlarda onun istefaya göndərilməsi barədə sərəncam imzalanacaq. Ondan başqa digər bir neçə məmurun da adı “qara siyahıya” salınıb. Amma “vurulacağı” daha real görünən məmur məhz Kərəm Həsənovdur. Onun tabeçiliyində olan şəxslər tərəfindən də “yuxarılara” şikayətlər edilməsi faktı da var. Yəqin ki, şikayətlər bundan sonra daha da artacaq” – deyə, mənbə bildirib.
Məlumatda o da qeyd olunur ki, ortada K.Həsənova məxsuz obyekt və mülklərin siyahısını hazırlamaq barədə göstəriş də var. Bu siyahı onun həm Azərbaycandakı, həm də ölkədən kənardakı malikanələri və ticarət obyektlərini əhatə edəcək.