Yeni təhsil naziri ona tapşırılan missiyanı həyata keçirə bilmir

Mikayıl Cabbarov təhsil naziri postuna təyin ediləndən sonra, onun radikal islahatlara gedəcəyinə kifayət qədər ümid edənlər var idi. Ən azından düşünülürdü ki, əgər Misir Mərdanovun yerinə 37 yaşlı bir gənci rəva görüblərsə, deməli, bu təyinatın arxasında duran imzalar yeni nazirdən Misir Mərdanovun yaratdığı böhranın durdurulması üçün çabalar gözləyir.
Amma ilkin olaraq görünəni odur ki, Mikayıl Cabbarov çox böyük bir problemlə üz-üzə qalıb. Əslində bu da anlaşılandır. Bu barədə danışan məlumatlı mənbə bildirir ki, bu gün Mikayıl Cabbarovun yeni komandasının formalaşdırma niyyətinin qarşısında belə böyük bir maneə var: «Məsələn, təhsil nazirliyinin aparat rəhbəri İlham Pirməmmədov vəzifəsindən alınsa da, o, yenidən nazirlikdə başqa bir görəvə - nazirin müşaviri postuna gətirildi. Bu, əslində təhsil sisteminə çökmüş mafiyanın müdaxiləsinin nəticəsi idi.
Çünki Mikayıl Cabbarov islahat aparmaqla yanaşı, həm də cəza mexanizmini işə salmalı idi. Yəni nazirliyin bir çox məmurlarının dosyaları hüquq-mühafizə orqanlarına göndərilməli idi. Amma bu, baş vermədi. Elşad Abdullayevin videobombardmanlarında Prezident Administrasiyasının rəhbəri Ramiz Mehdiyevin «kassiri» kimi təqdim olunan İlham Pirməmmədov nəinki məsuliyyətdən kənarda qaldı, hətta yeni təskinlikverici vəzifəyə də gətirildi. Hər halda, ortada bir kor məntiq var idi. Yəni əgər İlham Pirməmmədov məhz layiqsiz kadr olması səbəbindən vəzifəsindən alınırdısa, onun təkrarən hansısa posta gətirilməsi heç bir halda yeni nazirin könüllü təşəbbüsü ola bilməzdi».
Mənbəmiz bildirir ki, eyni zamanda Azərbaycan xalqının gələcəyinə ən böyük təhlükələrdən biri kimi dəyərləndirilən biabırçı dərslik siyasətinin birinci məsulu olan nazirliyin şöbə müdiri Faiq Şahbazlının da eyni qaydada məsuliyyətdən kənarda tutulması və hətta vəzifəsində saxlanılması Mikayıl Cabbarovun hələ çox səddləri aşa bilməməsinin göstəricisi kimi qəbul edilməlidir: «Faiq Şahbazlı, İlham Pirməmmədov və Misir Mərdanovun daha bir neçə açar ismi bu gün vəzifədə qalırsa, onlar «toxunulmaz» elan olunursa demək, hansısa ciddi islahatdan söhbət belə gedə bilməz».
Mənbəmiz bu arada maraqlı bir faktı da açıqladı: «Artıq təhsil nazirinin səlahiyyətlərinə müdaxilələr barədə olan məsələ hakimiyyətin ən üst düzəyi səviyyəsində müzakirə olunmaqdadır. Yəni Mikayıl Cabbarovun işinə hansısa «sirli qüvvə»nin müdaxiləsi nəticəsində yaranmış problemdən «yuxarılara» şikayət olunub. Ola bilsin ki, yaxın günlərdə bunun nəticəsi hiss olunacaq»
Tural