Komitə sədrinin deputat qardaşı ailə kapitalını ölkədən çıxarır

Deputat Malik Həsənov Novruz bayramından dərhal sonra Bakını tərk edərək Dubaya köçüb; ölkədəki siyasi qeyri-müəyyənlik Həsənov qardaşlarını bəzi qabaqlayıcı tədbirlər görməyə məcbur edib

Əmlak Məsələləri Dövlət Komitəsinin sədri Kərəm Həsənovun qardaşı, “AZINKO-holdinq”in prezidenti, deputat Malik Həsənov Novruz bayramından dərhal sonra Bakını tərk edərək Dubaya köçüb. Deputat Dubayda özünə biznes şəbəkəsi yaratmaqla məşğuldur. Bu barədə məlumatlı mənbələrdən xəbər daxil olub. Mənbənin məlumatına görə, M.Həsənov Dubaya getməzdən öncə Bakıdakı kiçik obyektlərini satmağa başlayıb: “M.Həsənov qardaşı K.Həsənovun yardımı ilə Bakının yaxşı yerlərində xeyli sayda qeyri-yaşayış sahəsi özəlləşdirib. Bu obyektlərin çoxu icarədə olub. M.Həsənov Dubay səfəri ərəfəsində bu obyektlərin çoxunu satıb. İndi də onun etibarnamə verdiyi xüsusi adamlar bu obyektlərin satışını davam etdirir. Obyektlərin satışından əldə edilən pullar Dubaya göndərilir və biznesə yatırılır”.
Mənbə deputatın əmlakının bir hissəsini Dubaya daşıması məsələsinə də aydınlıq gətirib: “Malik Həsənov yaxın ətrafına deyib ki, builki seçki çox gərgin keçəcəyindən vəziyyət yaxşı deyil. Yəni arzuolunmaz situasiya yarana bilər. Ona görə də hər ehtimala qarşı tədbir görmək lazımdır, riskə getməyə dəyməz”.
M.Həsənovun Dubayda olmasını yaxınları ilə dəqiqləşdirmək cəhdimiz alınmadı. Onun Milli Məclisdəki köməkçisi telefon zənglərimizə cavab vermədi. Ancaq parlament jurnalistləri Novruz bayramından sonra M.Həsənovun Milli Məclisin iclaslarına qatılmadığını təsdiqlədilər. Həsənovlar ailəsinə yaxın mənbələr də faktı təsdiqlədilər. Onların bildirdiyinə görə, indiki mərhələdə K.Həsənova qarşı xüsusi bir təhlükə olmasa da, siyasi qeyri-müəyyənlik, onun bəzi hakimiyyət daxili qruplaşmalarla münaqişə vəziyyətində olması yaxşı perspektiv vəd etmir. Hakimiyyət elitasında xüsusi söz sahibi olan vergilər naziri Fazil Məmmədovla qarşıdurma, müdafiə sənayesi naziri Yavər Camalovla əmlak mübahisəsi (sonuncu iki nazirlə mübahisələr indi məhkəmə müstəvisində çözülür-müəllif.) K.Həsənovun mövqeyini xeyli dərəcədə laxladıb. Üstəlik də ölkədəki siyasi qeyri-müəyyənlik Həsənov qardaşlarını bəzi qabaqlayıcı tədbirlər görməyə məcbur edib. Onlar sabiq nazirlərin aqibətini yaşayacaqlarından ehtiyatlanaraq indidən əmlaklarının ən azı bir hissəsini qorumaq üçün hərəkətə keçirlər. Onu da yaxşı bilirlər ki, “AZINKO-holdinq” kimi nəhəng müəssisələrdə real yox, virtual təsisçilik mövcuddur. Bir anın içində həmin müəssisə başqa adamın adına keçə bilər. Sabiq iqtisadi inkişaf nazirlərinə məxsus nəhəng holdinqlərin aqibəti buna sübutdur - Fərhad Əliyevə məxsus “Azpetrol” və Heydər Babayevə məxsus “ABU-holdinq” bir anın içində onlardan alınaraq başqa şəxslərin təsisçiliyinə və idarəetməsinə keçdi. Bu acı təcrübədən çıxış edən Həsənov qardaşları potensial təhlükə ərəfəsində əmlaklarının heç olması bir hissəsini təminatlı məkana transfer etməyə start veriblər. Kiçik obyektlərin satılması da bununla bağlıdır.
Mənbə bildirir ki, K.Həsənovun metal biznesinin monopoliyasından kənarlaşdırılması da onu əmlakının bir hissəsinin Dubaya köçürülməsini sürətləndirib. Son aylara qədər filizsaflaşdırma və poladəritmə sahələrində nəzarət paketi K.Həsənova məxsus idi. K.Həsənov dövlətin əmlakını idarə etməyə məsul olan qurumun başçısı kimi, “Azərboru” və “Daşkəsən Filizsaflaşdırma” ASC-ni, eləcə da 20-yə yaxın kiçik müəssisəni idarə edirdi. Ancaq bu yaxınlarda prezident sərəncamı ilə metal biznesi dövlətin nəzarətinə keçdi və K.Həsənov idarəçilikdən uzaqlaşdırıldı. Görünür, bunu ilk xəbərdarlıq kimi dəyərləndirən K.Həsənov əmlakının bir hissəsini xilas etmək üçün hərəkətə keçib. Çünki yaxın keçmişin təcrübəsində belə xəbərdarlıqların acı sonluğu barədə yetərincə nümunələr var - Fərhad Əliyev işdən çıxarılmazdan bir il öncə sənaye ilə bağlı səlahiyyətləri, bir ay öncə isə özəlləşdirmə ilə bağlı funksiyaları əlindən alındı. F.Əliyevin müavini olmuş K.Həsənov belə ssenarilərin sonunun nə ilə bitəcəyinin fərqindədir.

Tahir