Bakı Şəhər İcra Hakimiyyətinin orqanı “Bakı” və “Baku” qəzetləri Ağa Hüseynovun korrupsiya girdabında

Əgər xatırlayırsınızsa,qəzetimizin ötən saylarının birində “Abutalıbovun mətbu orqanında ev maxinasiyası” adlı yazımız işıq üzü görmüşdü. Yazıda “Bakı”, “Baku” qəzetlərinin baş redaktoru Ağa Hüseynovun sayəsində qəzetlərin dövriyyəliyinin itirilməsindən, Ağa müəllimin saxta protokolla ev alma istəyindən,onun görkəmli jurnalist Nəsir İmanquliyevin adından vizit kartı kimi istifadə etməsindən söhbət açılmışdı. Yazı işıq üzü görən kimi ildə cəmi 3-4 sayı nəşr olunan “Bakı” qəzetinin baş redaktoru Ağa Hüseynov redaksiyamıza gəldi. Qeyd edək ki, “Baku” qəzetinin nəşri artıq tam dayandırılıb. Ağa müəllimlə söhbət zamanı bizi bir sual düşündürdü: “Biz həqiqətən də jurnalist ilə ünsiyyətdəyik?! Nəsir İmanquliyev kimi bir şəxsiyyətin ömrünü qoyduğu bu qəzetlərin taleyi bu şəxsə necə həvalə olunub? Sizlərin də Ağa Hüseynov haqqında məlumatınız olsun deyə onun dediklərindən bəzi məqamları nəzərinizə çatdırmağı özümüzə borc bildik:

“Şəhərə bir ağıllı adam gələcək,qəzeti dirildəcək”

- Ağa müəllim,necə olur ki, gündəlik nəşr olunan qəzetlərin yazarlarına ev verilmir, amma ildə 3-4 sayı çıxan “Bakı” qəzetinin baş redaktoru Ağa Hüseynova ev verilir?
- Bu mənim problemim deyil.
- Amma cəmiyyətin problemidir.
- Cəmiyyətin problemi də mənim problemim yox, sizin problemdir.
- Nədən Bakı Şəhər İcra Hakimiyyəti onun orqanı olan “Bakı”, “Baku” qəzetlərini maliyyələşdirmir?
- Özü bilər niyə etmir, imkanı yoxdur da.
- Dövlətdə özü bilər məsələsi yoxdur. Axı “Bakı” qəzeti dövlətin qəzetidir?
- Ə,jurnalist də jurnalistə barmaq edər? Get o birilərindən yaz da.
- “Bakı” qəzetinin hazırda Azərbaycan mediasında heç bir payı yoxdur. Sizə necə ev düşə bilər?
- Başbilənlər bilər pay var, ya yoxdur.
- Adınızı ev siyahısına vermisiniz?
- Vermişəm
- Axı, ildə 3-4 dəfə çıxırsınız?
- Çıxıram. Hansı qanunda yazılıb ki,ildə 5 dəfə çıxan qəzetə ev düşmür.
- Axı, əslində qəzetin ildə 3-4 sayının çıxması absurd məsələdir.
- Adə, absurddur, sənə nə var. Mən yığıncaq etmişəm, Əflatun Amaşov ölməyib, Qafar gəlib iştirak edib. Kollektivdə 5 əməkdaş var, 4-ü iclasda iştirak edib.
- Yəni bu 5 nəfər ilin 365 gününü işə gəlir və ildə cəmi qəzetin 4 sayı nəşr olunur? Bu necə iş olur?
- Olur da. Mənə Bakı Şəhər İcra Hakimiyyətindən pul verilmir. Maliyyə yoxdur. Qapı-qapı düşüb yalvarır,dilənirik,qəzet nəşr edirik.
- Sözünüzdən belə çıxır ki, biz qapı-qapı gəzib pul yığmalıyıq? Bunu bizə məsləhət bilirsiz?
- Mən yalnız çalışıram ki, “Bakı” qəzetinin heç olmasa adı qalsın. Bir gün bir ağıllı adam gələcək şəhərə, onda qəzet də diriləcək.............


Ağa Hüseynovun qəribə və tarixi etirafları və.........

Əvvəla onu qeyd edim ki, Ağa Hüseynovun dediyi hər korrektəsiz sözə görə oxucularımızdan üzr istəyirik. Sadəcə onun kim olduğunu daha yaxşı bəlli etmək üçün Ağa Hüseynovun qiymətli kəlamlarını sizlərə çatdırdıq. Amma onun danışıqlarından bəzi məqamlar bizdə suallar yaratdı. Ağa müəllim deyir ki, qapı-qapı gəzib pul yığır,qəzet çıxarır. Amma Əflatun Amaşov belələrini reket adlandırır. Yəqin bu yazını oxuyandan sonra Cənab Amaşov öz dili ilə pul diləndiyini deyən Ağa Hüseynova da reket ştampını vurar.
Ağa Hüseynovun jarqonlu ifadələrini də,”ALƏ”-deyə müraciətini də qoyaq bir tərəfə,bəs sonda dediyi fikri necə anlayaq? “ Bir ağıllı adam gələcək şəhərə,qəzeti dirildəcək”. Gəlin əyri oturaq,düz danışaq,Ağa Hüseynov bu sözü ilə Hacıbala müəllimin şərəf və ləyaqətini təhqir etmirmi? Göz görəsi Hacıbala müəllim məni bağışlasın,ona dəli deyilmirmi? Hacıbala müəllimi belə təhqir etməklə əcəba Ağa Hüseynov yuxarılara hansı ismarıcı verir?
Sizləri bilmirəm, amma mən Ağa Hüseynovun danışıqlarını eşidəndən sonra tanınmış alim,pedaqoq,jurnalist Nəsir İmanquliyevin adını daşıyan qəzetlərin ona necə həvalə edildiyinə təəccüb edirəm. Sizcə Nəsir İmanquliyevin adını daşıyan qəzetin baş redaktorunun özünün də etiraf etdiyi kimi qapı-qapı gəzib pul yığması Nəsir İmanquliyev ruhuna hörmətsizlik deyilmi?

Ağa Hüseynova kiçik xatırlatmalar

Bu gün Ağa Hüseynov saxta protokolla özünə ev almaq iddiasındadır. Maraqlıdır, əcəba gözəl ənənələri olan “Bakı”, “Baku” qəzetlərini məhv etdiyinə, maliyyə maxinasiyalarına görəmi Ağa Hüseynov ev almaq istəyir, özü də Mətbuat Şurasının köməyi ilə? Aldığımız məlumata və araşdırmalarımıza görə Ağa Hüseynov başçılıq etdiyi qəzetin adından pensiya üçün fonda pul belə köçürmür. Qonararı isə qohum-əqrəbəsinin adına yazaraq özü mənimsəyir.
Vaxtilə Nəsir İmanquliyevin zamanlarında bu qəzetlərə çoxsaylı tələbələr təcrübəyə gəlirdi. Onlar Nəsir müəllimdən və bu qəzetdəki peşəkar jurnalistlərdən bəhrələnərdilər. Lakin əfsuslar olsun ki,10 ilə yaxın müddətdir ki,”Bakı”, “Baku” qəzetlərinə təcrübəyə tələbə göndərilmir. Bu qəzetlərin adı hətta ali məktəblərin siyahısından belə çıxarılıb. İldə 4 sayı nəşr olunan qəzetə gələn sizcə burada nə öyrənə bilər ki? Uzağı Ağa Hüseynovun etiraf etdiyi kimi qapı-qapı gəzib pul yalvarmağı.
Ağa Hüseynovun Azərbaycan dilinin qrammatik xüsusiyyətlərini və dil üslubunu necə bilməsi elə onun jarqonlarla bol olan danışığından da bəllidir. Maraqlıdır ki, 20 il ərzində qəzetdə maliyyə və digər yoxlamalar da aparılmayıb. Aldığımız digər məlumat daha maraqlıdır. Ən qəribəsi də budur ki, Ağa Hüseynovun baş redaktorluq etdiyi qəzetlər Mətbuat Şurasının nə üzvüdür, nə də ora üzvülük haqqı keçirir.
Bir məqamı da qeyd edək ki, Ağa Hüseynovun Ensiklopediyada işləyən həyat yoldaşı Nailə Hüseynovanın təkcə pensiya sənədlərini yoxlamaq kifayət edər ki,redaksiyanın büdcəsindən ona nə qədər pul yazılması məlum olsun. Lakin oranın əməkdaşları illərdir ki,pul ,məvacib almırlar. Onlar Ağa Hüseynov kimi qapı-qapı da gəzmirlər. Çünki işlədikləri qəzetlərinin əsl fədailəridirlər və Nəsir İmanquliyev ruhunu qapılarda pul dilənib təhqir etmirlər. Onlar ustadlarının ruhuna böyük ehtiramla yanaşırlar.

Son söz əvəzi

Ağa Hüseynov “Bakı” qəzetini özünün vizit kartı edərək, özü də etiraf etdiyi kimi “qapı-qapı gəzərək,şəhərə bir ağıllı adamın gələcəyini gözləyir”. Əslində analoji qəzetlər şəhər dinamikasının nəbzini,ictimai,siyasi,iqtisadi,mədəni proseslərin güzgüsüdür. Zənnimizcə “Bakı”, “Baku” qəzetləri Ağa Hüseynovun əsarətindən xilas edilməli, əvvəlki statusunu özünə qaytarmalıdır.

Nazim Sənanoğlu.