“Bakı”, “Baku” qəzetləri ilə bağlı qalmaqalın pərdəarxası

Deyirlər ki, fakt-yumruq zərbəsinə bənzəyir. Onu heç də xəfifə almaq olmaz. Bəziləri qəzet səhifələrindəki yazıları qərəz kimi qiymətləndirib, guya qərəzə qarşı mübarizə aparsalar da, əslində bunu edənlər qərəz sözündən zibil qutusu kimi istifadə etmiş olur, hər nə zibilləri olursa “qərəz”-adlandırıb ora atırlar. Lakin fakt faktlığında qalır və gec-tez özünün varlığını büruzə verir. Əgər xatırlayırsınızsa, bir müddət əvvəl sizləri “Bakı”, “Baku” qəzetlərinin baş redaktoru Ağahüseyn Hüseynovun ev maxinasiyasından, evi olsa da, adını evsizlər siyahısına yazdırmasından, Qafar Çaxmaqlının onunla birgə əldəqayırma bir iclas təşkil edib, saxta protokol tərtib etməsindən, Nəsir İmanquliyev ruhunun Ağahüseyn Hüseynov tərəfindən qapılarda necə inləməsindən xəbərdar etmişdik. Hətta yazı işıq üzü görəndən sonra , Ağahüseyn Hüseynov redaksiyamıza gələrək, yazılanlara jarqon ifadələrlə etirazını belə bildirmişdir. Lakin yazımız nəticəsiz qalmadı. Doğrudur, villa və imarətləri olan bəzi baş redaktorlar ev ala,evsiz jurnalistlərin payına sahib çıxa bildilər. Lakin saxta sənədlərlə ölkə prezidentini aldatmaq istəyən, Nəsir İmanquliyev adından visit kartı kimi istifadə edən, evi olsa da ev almaq üçün hər bir yola əl atan Ağahüseyn Hüseynova ölkə prezidentinin evsiz jurnalistlərə verdiyi evlərdən pay düşmədi. Qafar Çaxmaqlının iclasda iştirak etdiyini dəfələrlə deyən Ağahüseyn Hüseynov nədənsə bizimlə mübahisə zamanı bir məqamı da unudurdu ki, Qafar Çaxmaqlı Mətbuat Şurasının üzvü deyildi. O, sadəcə ehtiyat üzvü idi ki, onun da həmin iclasda iştirakı və səs verməsi qanuna zidd hərəkət idi. Sözsüz ki, MŞ-sı da baş verənlərdən nəticə çıxararaq bu seçkilərdə onu ehtiyat üzvü belə seçmədilər. Lakin nədənsə qəzetin maliyyə işləri sahəsində heç bir araşdırmalar aparılmadı,vergidən yayınma halları araşdırılmadı. Biz tezliklə bu işlərin də aparılacağına ümid edirik.
O gün qəzetlərin birində Ağahüseyn Hüseynovun müsahibəsini oxuduqdan sonra bu mövzuya yenidən müraciət etməli olduq. Çünki… Nəzərinizə çatdıraq ki, “ Bakı” qəzeti 1958-ci, “Baku” qəzeti isə 1962-ci ildən fəaliyyətə başlayıb. Nəşr olunan qəzetlərin əsas məqsədi dövlətin,şəhər rəhbərliyinin apardığı siyasəti geniş ictimayyətə çatdırmaq, paytaxtın iqtisadi, siyasi, mədəni və sosial həyatını əhatə edən maraqlı məlumatlar dərc etdirməkdən ibarət olub. Bunun keçmiş zamana aid olduğunu təsadüfən demirəm. Çünki bu gün ölkə prezidentinin gördüyü işlər, paytaxtın social və iqtisadi həyatında baş verən hadisələr Ağa Hüseynovun başçılıq etdiyi və Nəsir İmanquliyevin bizlərə miras qoyduğu “Bakı” qəzetində öz əksini tapmır. Əslində ildə cəmi 5-6 sayı işıq üzü görən qəzeti qəzet adlandırmaq belə gülüş doğurur. Elə götürək ötən il Bakıda keçirilən beynəlxalq mahnı müsabiqəsini. Həmin vaxt “Bakı”, “Baku” qəzetləri həmin müsabiqəni, Bakıdakı yenidənqurma işlərini, ölkəmizə gələn qonaqların Bakı ilə bağlı təəssüratlarını geniş şəkildə öz səhifələrində əks etdirməli idi. Lakin bu missiyanı başqa qəzetlər öz üzərinə götürdülər . Həmin vaxtlarda “Baku” qəzetinin nəşri zəruri idi. Lakin əfsuslar olsun ki,adı çəkilən qəzetin nəşri artıq illərdir ki, dayandırılıb. O qəzetin ki, onu Sovetlər Birliyində tanımayan, maraqla oxumayan yox idi. Acı da olsa etiraf etməliyik ki, vaxtilə bütün SSRİ-də məşhur olan “Baku” qəzeti Ağahüseyn Hüseynov əllərində məhv olub. Bu gün Azərbaycan mətbuatında Nəsir İmanquliyev, Şəmil Şahməmmədov şinelindən çıxanları bir araya toplayaraq adı çəkilən qəzetlərə ikinci həyat vermək olar. Bunun üçün sadəcə bir az istək, qəzetin yaradıcılarının ruhuna hörmət və bir də qəzeti məhv edən baş redaktoru dəyişdirmək kifayət edər. Bir vaxtlar böyük məktəb sayılan bu qəzetlərdə təcrübəyə gələn gənclər belə böyük məktəb keçmiş olurdular. Lakin ildə 5-6 sayı işıq üzü görən qəzetə 10 ildən çoxdur ki,təcrübəyə tələbə göndərilmir. Ali məktəblərdə bu qəzetlərin adları heç sonuncu yerdə belə yoxdur. Lakin baş redaktor qəzetin və Nəsir İmanquliyev adından bir visit kartı kimi öz şəxsi məqsədləri üçün istifadə edir. Bu azmış kimi,qəzet səhifələrində az qala özünü Azərbaycan jurnalistikasının fədaisi kimi göstərərək mədh edir.
Azərbaycanda belə bir dəb var. Oğru doğruya öz adını qoyur, heç kim öz ayranına turş demir. Ağa Hüseynov da “Bakı”, “Baku” qəzetlərindəki “əvəzsiz xidmət”lərindən danışanda yada onun balkon əməliyyatları və şəhər merinin maliyyə dəstəyini bu qəzetlərdən niyə çəkmə səbəbləri düşür. Unudur ki, o , özünü “mətbuat fədaisi” adlandırsa da üstündə ölü marşı çalınan “Bakı”. “Baku” qəzetləri Ağahüseyn Hüseynovun nə qədər fədai olduğunu bariz şəkildə göstərir. Doğrudur, məhz onun “fədai”liyinin nəticəsi olaraq “Baku” qəzeti fəaliyyətini tam dayandırıb, “Bakı” qəzeti can verir. Bəlkə Ağa Hüseynovun xidmətləri qapı-qapı gəzilib pul toplamaqdadır? Bunu biz demirik,özü etiraf edir. Amma bu etirafı eşidənlər nədənsə ona rekert adını qoymurlar. Bəlkə dolayısı yolla qapılardan pul topladığını etiraf etdiyi üçün onun adı Azərbaycanın reketlər ordusunun siyahısına salınmır. Axı cinayəti etiraf edəndə yüngülləşdirici halların mövcudluğu heç kimə sirr deyil. Lakin görünən budur ki, Ağahüseyn Hüseynov hələ də Nəsir İmanquliyev kölgəsində sərinlənir. Bu azmış kimi müxtəlif mətbu orqanlarda Bakı merini tənqid və təhqir edir. Gah deyir ki,Hacıbala müəllimin qəzetçilikdən xəbəri yoxdur,gah deyir ki,şəhər merinin yerinə ağıllı adam gəlməlidir,gah da deyir ki… Unutmayaq ki,şəhər meri qəzetin də,qəzetçiliyin də nə olduğunu gözəl bilir. Hətta öz mətbu orqanından əllərini birdəfəlik üzən şəhər meri bayramlarda şəhərdə gedən yenidənqurma işlərini işıqlandıran jurnalistlərə pul mükafatı belə təqdim edir.
Müsahibəsi zamanı Ağa Hüseynov qəribə bir etiraf da edir. Dünyasını dəyişmiş şəxslərin adından özü haqqında ən xoş sözləri söyləyir. Bildirir ki, guya o,qəzetin 3-cü səhifəsini elə gözəl tərtib edirmiş ki, rəhmətlik Nəsir müəllim deyirmiş ki,sənin 3-cü səhifən elə gözəl alınır ki,o biri səhifələri oxuyan olmur.
Qəzetlərə müsahibə zamanı Nəsir İmanquliyevin əmanətinə xəyanət edən Ağahüseyn Hüseynov təkcə Hacıbala Abutalıbovdan şikayətlənmir. Onun digər hədəfi həm də Azərbaycan nəşriyyatıdır. Daim güzəşt olunmasına baxmayaraq Ağahüseyn Hüseynov nəşriyyat rəhbərliyinə də aşağıdakı tənqidləri ünvanlamaqdan çəlinməyib: “ Nəşriyyatda aylığı artıra-artıra gedirlər. Adama xəbər belə etmirlər. Ayın sonunda isə gəlib adamdan pul tələb edirlər.”
Bizlər isə özünü “Mətbuat fədaisi” adlandıran Ağahüseyn Hüseynovla bağlı araşdırmalarımızı davam etdirir, bizi maraqlandıran suallara cavab axtarırıq. Düşünürük ki, yəqin şəhərimizin MER-i öz qəzetlərinə tezliklə sahib çıxaraq, orada maliyyə yoxlanışlarının aparılmasına nail olacaq, qəzetin yeni heyət və yeni baş redaktorla yeni nəşrinə başlayacaq. O zaman Ağahüseyn müəllim şəhər merini qəzetə hörmətsizlikdə və qəzet naşılığında da ittiham da edə bilməyəcək. Bu işdə sözsüz ki,şəhər merinə Vergilər Nazirliyi də öz köməkliyini əsirgəlməyəcək.

Nazim SƏNANOĞLU