Xidmət rəhbəri özünü və sərvətini qorumağın yolunu diplomatik toxunulmazlıq əldə etməkdə görür

gundemxeber.az Əmlak Məsələləri Dövlət Komitəsinin (ƏMDK) tabeliyində fəaliyyət göstərən Daşınmaz Əmlakın Dövlət Reyestri Xidmətinin rəhbəri Kərəm Həsənovun həbs təhlükəsilə üzləşdiyi barədə məlumat vermişdik. Qəzetimizin ötən sayında ƏMDK-dakı mənbəyə istinadən bu qurumun sədri Kərəm Həsənovun Xidmət rəhbəri Arif Qaraşovun 1997-ci ildən bəri verdiyi bütün kupçaları təftiş etdirdiyini bildirmişdik. Məlumatda həmçinin qeyd olunurdu ki, Kərəm Həsənov Arif Qaraşov haqda topladığı faktları hüquq-mühafizə orqanlarına təqdim etməklə onun həbsinə nail olmaq istəyir.
Aldığımız məlumatlara görə, Xidmət rəhbəri barədə bu məlumatların yayılması onun biznes ortaqlarının ciddi narahatlığına səbəb olub. A.Qaraşova yaxın olan şəxslərdən birinin qəzetimizə verdiyi məlumata görə, Xidmət rəhbərinin "vurulması" onun tabeliyində çalışan şəxsləri və qohumlarını da narahat edir. Mənbənin dediyinə görə, mövcud vəziyyət A.Qaraşovu daha ciddi narahat edir: "Arif Qaraşov müxtəlif vədlərlə yaxın ətrafını sakitləşdirməyə çalışır. O, tərəfdarlarını inandırmağa çalışır ki, prezident yeni yaradılmış ƏMDK-ın əsasnaməsini təsdiq edəndən sonra bütün söz-söhbətlər aradan qalxacaq. Xidmət rəhbəri özünün bu postda müvəqqəti əyləşdiyini deyib. Qaraşov yaxın ətrafını inandırıb ki, bir müddət sonra hökumətdə ciddi dəyişikliklər baş verəcək və o, baş nazirin birinci müavini Abid Şərifovun postunu tutacaq".
Buna baxmayaraq, mənbə A.Qaraşovun karyerası üçün ciddi təhlükə yarandığını istisna etməyib. Onun sözlərinə görə, hazırda hakimiyyətin ən yuxarı eşelonunda Xidmət rəhbərinin taleyilə bağlı ciddi müzakirələr aparılır. Müsahibimizin sözlərinə görə, A.Qaraşov özü də bu barədə məlumatlıdır: "Arif Qaraşov uzun illər hakimiyyət komandasında mühüm vəzifə tutduğu üçün "vurulmuş" vəzifəli şəxslərin hansı aqibətlə üzləşdiyini yaxşı bilir. Buna görə də o, ciddi-cəhdlə başının üzərini almış "qara bulud"ları qovmaq istəyir. O, bu günlərdə hakimiyyətin ən yuxarı eşelonunda təmsil olunan bəzi şəxslərlə görüşərək, MDB ölkələrindən birinə səfir göndərilməsini xahiş edib. Xidmət rəhbəri düşünür ki, yalnız diplomatik toxunulmazlıq əldə etməklə özünü və sərvətinin bir qismini sığortalaya bilər".
Qeyd edək ki, vaxtilə bir çox məmurlar Eldar Həsənov, Namiq Abbasov, Əli Nağıyev, Məhərrəm Əliyev və başqaları da səfir postuna yiyələnməklə həbs təhlükəsindən xilas ola biliblər. Bunların arasında Məhərrəm Əliyev hətta yenidən vəzifəyə qaytarılıb.

Samir