«Cənub» Elektrik Stansiyasının tikintisi zamanı milyonlar göyə sovrulub; «Azərenerji» rəhbəri özünə məxsus olan «Azenco» şirkəti vasitəsilə bəzi işlərini həyata keçirir
Prezident İlham Əliyev iyul ayının 1-də Şirvan şəhərinə səfəri zamanı «Cənub» Elektrik Stansiyasının açılışında iştirak etdi. Qeyd edək ki, stansiyanın bütün tikinti-quraşdırma və sazlama işləri «Azərenerji» Açıq Səhmdar Cəmiyyətinin (ASC) prezidenti Etibar Pirverdiyevə məxsus olan «Azenco» şirkəti tərəfindən həyata keçirilib. Açılış zamanı stansiyada görülən işlər barədə ölkə başçısına məlumat verən ASC rəhbəri hər şeyin ən yüksək səviyyədə təşkil olunduğunu diqqətə çatdırıb. Dünən isə özəl mənbələrdən «Cənub» Elektrik Stansiyasının tikintisində yol verilən nöqsanlarla bağlı ilginc faktlar əldə etmişik.
Məlumatlı mənbənin sözlərinə görə, milyonlar hesabına başa gələn stansiyanın bütün işlərinin «Azenco»ya həvalə edilməsi cəmiyyət prezidentinin planı olub: «Xatırladım ki, 2009-cu ildə Əmlak Məsələləri üzrə Dövlət Komitəsi «İnter Enerji» MMC-ni «Azenco» ASC-nin 97,5 faiz səhmlərinin satışı üzrə investisiya müsabiqəsinin qalibi elan edib. «İnter Enerji» silinmək üçün 100 min ədəd dövlət özəlləşdirmə çekinin təqdim edilməsini və dövlət büdcəsinə 6,4 milyon manat ödəməyi öhdəsinə götürüb. «Azenco» ASC 2008-ci ilə qədər "Azerenerji” ASC-nin tərkibində "Azerenerjitikinti” MMC adıyla fəaliyyət göstərib. Əmlak Məsələləri üzrə Dövlət Komitəsinin 9 oktyabr 2008-ci il tarixli əmrinə uyğun olaraq MMC "Azenco” Açıq Səhmdar Cəmiyyətinə çevrilib və investisiya müsabiqəsinə çıxarılıb. Qurumun rəhbəri təxminən 7 milyon manat qarşılığında bu şirkəti alıb. «İnter Enerji» MMC də cəmiyyət prezidentinə məxsusdur. Bu şirkətlərə onun qardaşı rəhbərlik edir. Stansiyanın tikintisinə dövlət büdcəsindən on milyonlarla manat vəsait ayrılmışdı və dövlət başçısı tərəfindən tapşırılmışdı ki, burda ən müasir avadanlıqlardan istifadə edilsin. Şəxsən mənim bildiyimə görə, stansiyanın tikintisi zamanı «Azenco» şirkəti tərəfindən 20 milyondan çox vəsait göyə sovrulub. Ölkədə enerji sahəsində fəaliyyət göstərən bir çox şirkət var. Amma ASC rəhbəri imkan vermir ki, onlar «Azərenerji»nin tikinti layihələrinə cəlb olunsunlar. Çalışdığı odur ki, bütün maliyyə kapitalını özünə məxsus olan şirkətə, ordan da öz şəxsi büdcəsinə yönəltsin. Son illər «Azərenerji» tərəfindən həyata keçirilən tikinti layihələrinin monitorinqini aparanda aydın olur ki, işlərin böyük hissəsini «Azenco» görüb. Bu özbaşınalığın ən son həddidir. Burdan belə çıxır ki, qurumun prezidenti büdcənin pullarını öz şirkəti vasitəsilə silir. Ölkənin ən böyük enerji mərkəzlərindən sayılan «Cənub» Elektrik Stansiyasının tikintisində maliyyə maxinasiyalarına yol verilib. Stansiyanın əhatə olunduğu sahədə salınan beton örtüyünə təkcə 6 milyondan çox vəsait sərf edilib. Burda quraşdırılan avadanlıqların qiyməti isə çox bahadır. Baş verən yeyinti işlərini araşdırıb tapmaq aidiyyəti qurumlar üçün elə də çətin bir iş deyil. Sadəcə, hansısa səbəblərə görə müvafiq qurumlar Etibar Pirverdiyevin nəzarətində olan sahəyə müdaxilə edə bilmirlər, sanki ona bilərəkdən güzəşt edilir». Mənbənin dediklərindən belə başa düşdük ki, ASC rəhbəri «Cənub» Elektrik Stansiyasının tikintisindən xeyli qazanc əldə edib. Açığı, bu barədə dəqiq məlumatlara malik deyilik. Yenə də hər ehtimala qarşı əlaqədar qurumlar məsələ ilə bağlı müvafiq yoxlamalar həyata keçirsəydilər, pis olmazdı. Bu arada, əldə etdiyimiz ən son məlumatlarda deyilir ki, «Azərenerji»də cərəyan edən qanunsuzluqlarla bağlı, konkret olaraq ASC rəhbərinin bəzi işlərindən rəsmi dairələrə zəruri materiallar təqdim olunub. Ehtimalllara görə, ən qısa zaman ərzində cəmiyyət rəhbərinin vəzifə məsələsinə baxılacaq və onun işinə davam edib-etməyəcəyi ilə bağlı yekun qərar veriləcək.
ASC prezidenti yazı ilə bağlı fikirlərini bildirmək istəsə, məmnuniyyətlə dərc edə bilərik.