Rejim güc orqanlarına etnikləri cəlb edir

Bugünə qədər ölkədə baş verən lokal etirazlar fonunda güc orqanlarının etirazçılara qarşı ciddi zorakılıq sərgiləməsi, xüsusilə də əlaqədar orqanların etirazları amansızlıqla yatırması, bu qurumların hakimiyyətin əsas dayağına çevrildiyini göstərir. Bəzi ekspertlər isə hesab edir ki, xalq-hakimiyyət qarşıdurması gücləndikcə rejim daha çox güc orqanlarının dəstəyinə ehtiyac duyacaq ki, bu da ölkədaxili gərginliyin artmasına səbəb olacaq. Bugünlərdə etibarlı mənbədən redaksiyamıza daxil olan məlumatda güc orqanları ilə bağlı ciddi qərarlar qəbul etməsi ilə bağlı xəbərlər yer alıb.

Güc orqanlarına etnik axını

Mənbənin sözlərinə görə, güc orqanlarının şəxsi heyətinin daha da artırılmasına qərar verən hakimiyyət, bu qurumlara daha çox etniklərin cəlb edilməsinə qərar verib. Buna səbəb etniklərlə azərbaycanlılar arasında qan bağının olmaması, onların baş qaldıracaq etirazları daha qətiyyətlə yatıra biləcəkləri ilə bağlıdır: “Şübhəsiz, güc orqanlarında Azərbaycan xalqının maraqlarına bağlı olan kifayət qədər insan mövcuddur. Lakin mövcud rejimin ordu və polisi siyasiləşdirdiyi, dövlətin maraqlarına xidmət etməli olan qurumları öz maraqlarına çalışmağa vadar etdiyi bir zamanda bu qüvvələr bəzən əleyhinə oldqları qərarları icra etməli olur. Xüsusilə də paytaxt və bölgələrdə baş qaldıran xalq etirazlarının yatırılması məlum prosesdə iştirak edən güc orqanları əməkdaşları içərisində də müəyyən narazılıqlarla müşahidə edilməkdədir. Bu qurumlarda xidmət edən insanların bir çoxu hesab edir ki, öz haqq və hüquqlarını tələb edən etirazçılarla bunca amansızcasına davranmaq düzgün deyil. Məhz bu düşüncə içərisində olduqları üçün onların bəzisi verilən əmrlərin icrasına formal yanaşır, etirazçılara qarşı rejimin tələb etdiyi qətiyyət və qəddarlıqla mübarizə aparmırlar. Bu səbəbdən də hakimiyyət gələcək xalq etirazlarının daha amansızcasına yatırılması üçün güc orqanlarının sıralarının qeyri-azərbaycanlılar hesabına genişləndirilməsinə qərar verib. Hakimiyyətin yuxarı eşalonunda qərarlaşan ideoloqların fikrincə, rejimin zərbə və özünümüdafiə qüvvəsi olan bu qurumlara etniklərin kütləvi axını baş qaldıracaq etirazların daha qətiyyətlə yatırılmasına səbəb ola bilər”.

Etniklərə şamil ediləcək güzəştlər

Mənbənin məlumatına görə, istər güc orqanlarına cəlb ediləcək etniklərin çəkisini artırmaq üçün onlara bir sıra güzəştlərin edilməsi nəzərdə tutulub: “Etniklərin məlum güc orqanlarındakı sayını artırmaq üçün onlara bir çox güzəştlərin edilməsi planlaşdırılır ki, bunların da çoxu onların işə qəbulunun asanlaşdırılması, mənzil və sosial təminatının yaxşılaşdırması istiqamətindədir. Hakimiyyət tərəfindən güc orqanlarının rəhbərliyinə verilən göstərişə görə, bundan sonra adıçəkilən qurumlarda xidmət etmək istəyən qeyri-azərbaycanlılarin müraciəti mümkün qədər müsbət şəkildə dəyərləndirilməlidir. Güc orqanlarında xidmət üçün müraciət edən etniklərin bu xidmət üçün zəruri olan parametrlərə – boy, çəki, fiziki hazırlıq göstəricilərinə görə lazımi tələblərə cavab vermədiyi təqdirdə belə, həmin şəxslərin xidmətə cəlb olunması nəzərdə tutulub. Etniklərin yüksək maaş və rütbələrlə həvəsləndirilməsi də nəzərdə tutulan tədbirlər proqramına daxildir. Həmçinin, etniklərin mənzil probleminin həlli, sosial durumunun yaxşılaşdırılması üçün əlavə tədbirlərin həyata keçirilməsi də gündəmdədir. Bir sözlə, mövcud rejim nəyin bahasına olursa olsun etniklərin güc orqanlarındakı sayını artırmağa, bu qurumda azərbaycanlılarla qeyri-azərbaycanlılar arasında müəyyən balans yaratmağa çalışır”.

Mundirli etniklər xalqa nə vəd edir?

Azərbaycanda kütləvi işsizliyin mövcud olduğu indiki məqamda etniklərin güc orqanlarında xidmətə böyük maraq göstərəcəyini bildirən mənbə, güc orqanlarındakı bu dəyişikliyin xalqa yaxşı heç nə vəd etmədiyi qənaətindədir: “Bu gün işsizliyin yalnız etniklər üçün deyil, həmçinin azərbaycanlılar üçün də xarakterik problem olduğu hər kəsə bəllidir. Bu baxımdan etniklər üçün yaradılan bu şəraitin yaxın zamanda çoxlu sayda qeyri-azərbaycanlını güc orqanlarına cəlb edəcəyi şübhəsizdir. Ehtimal etmək olar ki, bəlli bir müddətdən sonra etniklər sözügedən güc orqanlarında müəyyən bir çoxluğa və yetkiyə sahib olacaqdır. Bu isə Azərbaycanda baş verəcək etirazların daha zorakı və sərt üsullarla yatırılması deməkdir. Əslində, etniklərin güc orqanların cəlb edilməsi siyastinin arxasında da bu məqsəd dayanır. Bundan başqa, Azərbaycan mundiri geyinən etniklərin Azərbaycan xalqına tutacağı divanın bütövlükdə ölkə daxilində etnik-milli zəmində də ədavətin inkişafına yol açması mümkündür. Əslində belə bir ədavətin mövcudluğu xalqın diqqətini əsas problemdən – anti-demokratik hakimiyyətdən yayındırmaqda maraqlı olan rejimin də maraqlarına uyğun gəlir. Ümumiyyətlə, etniklərin güc orqanlarına axınının bugünün və sabahın Azərbaycanı üçün ciddi problemlərə səbəb olacağı birmənalıdır”.