Müxalifətçisi çox olan rayonun icra başçısı işdən qovulacaq

Prezident seçkilərinə hələ bir neçə ay qalsa da, ali siyasi hakimiyyətin qarşıdakı seçkilərə ciddi şəkildə hazırlaşdığı şübhəsizdir. Hakimiyyətin nəzarətində olan KİV və xüsusilə də televiziyaların gecə-gündüz ölkədəki analoqsuz iqtisadi inkişafdan bəhs etməsi və bütün bu uğurları ölkə başçısının siyasi kursu ilə əlaqələndirməsi, şəhid ailələri, müharibə veteranları, məcburi köçkünlər, sosial baxımdan zəif təmin olunan ailələrə bağlı dövlətin “humanist siyasətinin” alqışlanması mövcud rejimin mümkün qədər ictimaiyyətdə özünə qarşı rəğbət yaratmaq niyyətində olduğunu göstərir. Lakin bununla belə, əvvəlki seçkilərin acı təcrübəsini nəzərə alaraq bu il seçkilərdə müxalif namizədlərin mümkün qədər az səs almasını təmin etməyə çalışan hakimiyyət yetkililəri, bunun üçün yerlərdəki icra başçılarının imkanlarından maksimum yararlanmaq niyyətindədir. Qarşıdakı seçkilərdə iqtidar təmsilçisinin qələbəsini təmin etmək üçün icra başçılarına ayrılan seçki yükünün ciddiliyi də rejimin qələbə arzusundan irəli gəlir.

Müxalifətçisi çox olan icra başçıları “yanacaq”

Bununla bağlı redaksiyamızı bilgiləndirən məbənin sözlərinə görə, artıq bununla bağlı mövcud rejim ciddi layihələrə start verməkdədir. Bu layhələrdən biri icra başçılarını yerlərdəki müxalif şəxs və qruplarla aktiv mübarizəyə sövq etmək, inzibati amirlik üsullarından istifadə edərək bu insanları neytrallaşdırmaqdan ibarətdir: “Qarşıdakı prezident seçkilərində hakimiyyətin icra başçılarına ayırdığı rol olduqca böyükdür. Belə ki, artıq indidən icra başçılarına bildirilib ki, cari seçkilərdə hansı rayondan müxalif namizdlər daha çox səs alsa, o zaman həmin rayonun icra başçısı işdən azad ediləcək. Bunun üçün də icra başçılarına artıq indidən işə başlamaq, rayon və şəhərdəki müxalifətçiləri müəyyənləşdirmək, onları bütün üsullardan istifadə etmək yolu ilə neytrallaşdırmaq və həmin rayonda iqtidar təmsilçisinin qələbəsi üçün zəmin yaratmaq tapşırılıb. Siyasi hakimiyyət bununla icra başçılarının prezident seçkilərində mümkün qədər yaxından iştirakına nail olmağa çalışır. Prezident Administrasiyasındakı ideoloqlar yaxşı başa düşür ki, xalqın sərvəti hesabına harınlayan və öz zövq-səfasına düşgün olan məmurları yalnız qorxu altında hərəkətə gətirmək mümkün ola bilər ki, məlum layihə də buna xidmət edir”.

“Müxalif fikirli vətəndaşlara basqılar artacaq”

Bilgili qaynağın sözlərinə görə, proseslərin bu şəkildə inkişafı yaxın gələcəkdə rayon və şəhərlərdəki müxalif fikirli vətəndaşlara dövlət basqısının daha da artmasına səbəb olacaq: “Məsələnin bu cür qoyuluşu artıq əksər rayonlarda icra başçılarını qəti olaraq hərəkətə gəlməyə vadar edib. Rayondakı güc orqanlarının vasitəsi ilə müxalif fikirli şəxslərə qarşı kampaniyaya start verən icra başçıları bununla müxalifətçiləri neytrallaşdırmaqdan daha çox, digər vətəndaşları qorxutmağa cəhd edir. İcra başçıları hesab edir ki, əgər üzdə olan müxalifətçilərdən fərqli olaraq, digər rayon və şəhər sakinləri “düz yolla” getsə, iqtidar təmsilçisinə səs versə, o zaman onlar dda Prezident Administrasiyası tərəfindən qoyulan sınaqdan üzüağ çıxarlar. Məhz bu səbəbdən də müxalifətçilərə qarşı basqı siyasətini gücləndirən icra başçıları buna paralel şəkildə təbliğat kampaniyası da aparır, digər vətəndaşları “gözü çıxmış qardaşdan” dərs almağa səsləyir. Lakin ən çox narahatlıq doğuran məqmlardan biri seçki ərəfəsində bu təzyiqlərin daha da arta biləcəyi təhlükəsi ilə bağlıdır. Bu gün baş verənləri nəzərə alaraq əminliklə söyləmək olar ki, seçkilərə qısa müddət qalmış rayon və şəhərlərdə müxalifətçilərin sözün həqiqi mənasında qəti cinayətkarlar kimi təqib edilməsi baş verəcək ki, bu da vətəndaş qarşıdurması və ölkədəki gərginliyi bir qədər də artıtracaqdır”.

“Vəziyyət ümidsizdir”

Mənbənin sözlərinə görə, Prezident Administrasiyasının “xeyir-duası” və icra başçılarının vəzifələrini itirmək qorxusu ilə başladılan “müxalifətçi ovu”nun yaxın gələcəkdə bir qədər də güclənəcəyi gözlənilən olsa da, demokratik düşərgənin baş verənlərə ciddi müqavimət göstərə biləcəyi o qədər də inandırıcı görünmür: “Vəziyyət həqiqətən də ümidsizdir. Çünki müxalif fikirli vətəndaşçların üzləşdiyi təzyiq fonunda demokratik düşərgənin ortaya qoyduğu müqavimət əsla adekvat deyil. Məhz bu səbəbdən də gələcəkdə vəziyyətin müxalifətin maraqları baxımından daha arzuedilməz məcrada inkişaf edəcəyini təxmin etmək olar. Çox güman ki, dövləti rıçaqlardan və inzibati amillərdən istifadə edərək müxalif düşüncəli vətəndaşları kütləvi təzyiq və repressiyalara məruz qoyan hakimiyyət öz arzusuna nail olacaq, demkratik düşərgəyə bu seçkilərdə də heç bir şans tanımayacaqdır. Demokratik qüvvə və müxalif siyasi partiyaların baş verənlərə yalnız bəyanat səviyyəsində reaksiya verməsi mümkündür ki, bu da öz növbəsində heç nəyi dəyişməyəcək”.

İlqar Rəsulov