Xətai sakinləri Prezident Administrasiya yürüş etdilər (Fotolar)
Evlərinin söküntüsünə etiraz edən Ərzurum qəsəbəsinin sakinləri yürüş aksiya keçirdi; daha 20 ev “Ağ şəhər”in güdazına getdi
İyulun 29-da Bakının Xətai rayonu, Ərzurum qəsəbəsində plana düşən evlərin söküntüsü davam etdirildi. Səhər saatlarında Xətai Rayon İcra Hakimiyyətinin nümayəndələri tərəfindən əvvəlcədən müəyyən olunan 20 evin söküntüsünə başlanıldı. Evlərinin sökülməsinə etiraz edən ailələr küçəyə toplaşaraq yaxınlıqdakı magistral yolu bağlamağa cəhd edincə, əraziyə çağırılan Xətai rayon Polis İdarəsinin əməkdaşları vəziyyətə müdaxilə etdilər. Post-patrul maşınları ilə yolu bağlamaq istəyən sakinlərin qarşısı kəsildi, etirazçılara qəsəbəyə dönmələri barədə xəbərdarlıq edildi.

Qəzəbli qəsəbə sakinlər birbaşa Prezident Administrasiya yürüş etməyə qərar verdilər. Təxminən 100-ə yaxın qəsəbə sakini bir neçə avtobusa doluşaraq Prezident Administrasiyasına getdilər. “İçərişhər” metro stansiyası qarşına toplaşan qəzəbli kütlə müxtəlif şüarlar yazılmış plakatlarla Prezident Administrasiyasına doğru yürüş etməyə başladılar. Səbail polisi sakinlərin aksiyasından xəbərdar olduqlarından Xətai sakinlərini qarşısı bir neçə dəfə kəsildi, plakatlar onlardan alındı. Qəzəbli kütlə administrasiyanın qarşısındakı bağa toplaşmağı bacardılar. Burda da polis aksiya iştirakçılarına müdaxilə etdi. O cümlədən Prezident Administrasiyasının mühafizəçiləri bağa toplaşan Xətai sakinlərini oradan çıxarmağa cəhd etdilər.

Sakinlər administrasiyadan bir nəfərin onları qəbul edərək şiakayətlərini dinləmələrini tələb etdilər. Aksiya iştirakçılarının nümayəndəsi Prezidenti Administrasiyasının Hüquq mühafizə orqanları ilə iş şöbəsinin müdiri Fuad Ələsgərovla görüşdü. Görüşdən çıxan “Qara şəhər” sakini administrasiyada onlara quru vəd verildiyini söylədi: “Xətai Rayon İcra Hakimiyyəti başçısının bizi aldatdığını, dövlət tərəfindən ayrılan kompensasiyanın yarısını mənimsədiklərini Fuad Ələsgərova çatdırdım. Şöbə müdiri lazımı tədbirlərin görüləcəyini deyərək quru vəd verdi ”.

Sakinlər bu gün yenidən üç fərqli yerdə -Xətai RİH, Bakı ŞİH və Prezident Administrasiyası qarşısında oturaq aksiya keçirəcəklərini söylədilər.

Nəzərə çatdıraq ki, sahəsi 221 hektar olan “Ağ şəhər” layihəsi üzrə yaşayış, iş, istirahət və əyləncə üçün ən yaxşı şərait təqdim edəcək şəhər tipli 10 universal kvartalın yaradılması nəzərdə tutulub. Bakının müasir mərkəzi həm də şəhər nəqliyyatının yeni şəbəkəsinin yaradılması sayəsində universal olacaq. Belə ki, “Ağ şəhər”in mərkəzi meydanına çıxışı olan metro stansiyasının inşa olunması, avtobus nəqliyyatı şəbəkəsinin inkişaf etdirilməsi nəzərdə tutulub. Bütün sahil boyu tramvay xəttinin çəkilməsi də planlaşdırılır. Həmçinin su nəqliyyatından istifadə edilməsi üçün bulvar xətti boyu dəniz yolunun salınması da nəzərdə tutulub.
Artıq “Ağ şəhər” layihəsinin infrastruktur kommunikasiyalarının işçi layihələri işlənib hazırlanıb. O planlar layihənin həyata keçirilməsi prosesinə cəlb edilmiş “Azəryolservis”, “Azərenerji”, “Azəriqaz”, “Aztelekom” və bu kimi müvafiq dövlət təşkilatları ilə razılaşdırılıb. Layihə üzərində işləmək üçün azərbaycanlı mütəxəssislərlə yanaşı, mühəndis dizaynı sahəsində ixtisaslaşan “Atkins” (Böyük Britaniya), “Foster + Rartners” və “F+A Architects” kimi məşhur memarlıq şirkətləri də prosesə cəlb edilib.
Layihənin gerçəkləşəcəyi məkanda 850-yə yaxın yaşayış evi plana düşüb. Xətai Rayon İcra Hakimiyyəti başçısının müavini Zaməddin Əkbərov sökülən evlərin sakinləri ilə razılığa gəlindiyini bildirib: “Sökülən evlərin hər kvadratmetrinə görə 1000 manat, evin damından kənarda olan əlavə tikililərin hər kvadratmetrinə görə isə 750 manat veriləcək. Bununla bağlı xüsusi komissiya yaradılıb. Bazar qiyməti öyrənilib. Vətəndaşlarla razılığa gəlinib və müqavilə bağlanıb. Amma qanunsuz tikililərin torpaq sahələrinə kompensasiya ödənilməyəcək. Çünki bu torpaq sahələri dövlətindir, indi də geri qaytarılır. Bunun üçün dövlət yenə pul ödəməlidirmi?!”