Azərbaycan hüquq-mühafizə orqanları Rusiya prezidentinin başçılıq etdiyi Şuraya daxil olan ləzgi təşkilatının rəhbərinin qohumlarını həbs edib

Azərbaycan hüquq-mühafizə orqanları Rusiya prezidenti Vladimir Putinin Bakıya səfəri ərəfəsində şok həbslər həyata keçirib.

Virtualaz.org-un əldə etdiyi xəbərlərə görə Rusiyada prezident Putinin rəhbərlik etdiyi millətlərarası münasibətlər üzrə Şuraya daxil olan Federal Ləzgi Milli-Mədəni Muxtariyyətinin liderlərinin qohumları həbs olunub. Saxlanılanlar sözügedən təşkilatın rəhbəri Arif Kərimovun və təşkilattın icraiyyə komitəsinin sədri Amil Sərkarrovun qohumlarıdır. Bu təşkilat neçə vaxtdır ki, Azərbaycana qarşı separatçı fəaliyyətlə məşğul idi və ləzgilərin, avarların hüquqlarının pozulması iddiaları əsasında iş aparırdı.

Federal Ləzgi Milli-Mədəni Muxtariyyətinin yaydığı məlumatda deyilir ki, saxlanılanlardan biri Azərbaycan vətəndaşı olan, 1956-cı il təvəllüdlü Eldar Məmmədovdur. O, iş adamıdır və Arif Kərimovun qaynıdır. Həmçinin iki Rusiya vətəndaşı-1977-ci il təvəllüdlü, neft-qaz mədən avadanlıqlar istehsal edən müəssisənin rəhbəri Cavid Babayev və Moskva regional ləzi milli-mədəni muxtariyyətinin təsisçilərindən biri, 1979-cu il təvəllüdlü Tariel Sərkarov həbs olunub. C.Babayevin A.Kərimovla qohumluq əlaqələrinin olduğu bildirilir, T.Sərkarov isə Amil Sərkarovun qardaşıdır.



C.Babayev avqustun 6-da Bakıda həbs olunub. Onun qohumlarını ziyarət etmək üçün gəldiyi deyilir. “Dörd naməlum şəxs mülki geyimdə özlərini təqdim etmədən ondan idarəyə getməyi tələb ediblər. Cavid Babayev gələnlərdən sənədlərini təqdim etməyi tələb edəndə onlar köməyə əlavə adamlar çağırıblar və zor tətbiq edərək saxlanılan şəxsi Daxili İşlər Nazirliyinə aparıblar” xəbərdə deyilir. T.Sərkarov isə avqustun 9-da Qəbələ rayonunun Kəmərvan kəndində həbs olunub, o anası ilə birlikdə atasının məzarını ziyarət etməyə gəlibmiş.

Təşkilat bəyan edir ki, A.Kərimovun qohumu olan E.Məmmədov Oğuz rayonunda həbs olunub. Onu DİN-in narrkotiklərlə mübarizə idarəsinə aparıblar. “Bakıda E.Məmmədovun üstünə narkotik atıblar və narkotik maddələrin saxlanılması, yayılması maddəsi üzrə iş qaldırıblar” bəyanatda qeyd olunub. Həbsin hansı tarixdə həyata keçirildiyi açıqlanmır. A.Kərimov isə həbslərlə bağlı xarici ölkələrdən birinə səfərini yarımçıq qoyaraq Rusiyaya dönüb. Qeyd edək ki, A.Kərimov əslən Oğuz rayonundandır.

Ləzgi təşkilatı bildirir ki, Rusiya hakimiyyəti bu ölkə vətəndaşlarının həbsi barədə məlumatlandırılmayıb, saxlanılanların yaxınları onların taleyi barədə bir neçə gündən sonra öyrənə biliblər. Təşkilat bu həbsləri “aktiv, müstəqil ləzgi fəallara qarşı repressiya” adlandırır və bildirir ki, həbslərin Putinin Bakıya səfəri ərəfəsində həyata keçirilməsi diqqəti cəlb edir. Rəsmi Bakı hələlik bu həbslərlə bağlı açıqlama verməyib.