Rusiya Azərbaycanla sərhədlərin demarkasiyasını təxirə sala biləcəyinə işarə edir, rəsmi Bakının isə MDB Gömrük İttifaqına qarşı alternativi var

Rusiya prezidenti Vladimir Putinin Bakıya yaxın günlərdə baş tutacaq səfəri ərəfəsində Moskva ilə Bakı arasında üstüörtülü şəkildə taktika savaşı gedir. Səfər ərəfəsində Rusiya Federal Ləzgi Milli-Mədəni Muxtariyyətinin rəhbəri, neçə vaxtdır Azərbaycana qarşı separatçı fəaliyyətlə məşğul olan Arif Kərimov sərhədlərin delimitasiyası və demarkasiyasına dair Azərbaycan-Rusiya hökumətlərarası komissiyasının rusiyalı həmsədri, XİN-in baş maşviri Vadim Postnovla görüşüb.

Virtualaz.org-un rus qaynaqlarına istinadən verdiyi xəbərə görə, ləzgi təşkilatının saytının bu günlərdə yaydığı xəbərdə deyilirdi ki, görüşdə Azərbaycanla Rusiya arasında sərhəd razılaşmasının Dağıstanda yaratdığı problemlər müzakirə olunub.

“Görüşdə diplomat razılaşıb ki, delimitasiya razılaşması nəticəsində Dağıstandan keçən sərhəd xəttinin dəyişməsi, nəticədə Xraxoba və Uryanoba kəndlərinin Azərbaycanın tərkibində qalması, o cümlədən demarkasiya razılaşmasına uyğun olaraq Dağıstanın 2 min hektarlıq dağotlaq sahəsinin Azərbaycana verilməsi muxtar respublikada vəziyyəti gərginləşdirə bilər” - deyə ləzgi təşkilatı bildirir.

Xəbərə görə, V.Postnov bu problemin vəziyyəti daha yaxşı bilən Dağıstan rəsmilərinin danışıqlara cəlb olunmaması nəticəsində yarandığını təsdiq edib.

Qeyd edək ki, Rusiya ilə Azərbaycan arasında sərhədlərin delimitasiyasına dair razılaşma 2011-ci ildə imzalanıb və artıq ratifikasiya edilib. Bu razılaşma o zamankı prezident Dmitri Medvedyev tərəfindən imzalanmış və Xaçmaz rayonu ərazisində yerləşən anklav Rusiya ərazisi olan iki kənd Azərbaycanın tərkibinə verilmişdi. Bu razılaşma Dağıstanda narazılıq doğurub. Lakin razılaşma ratifikasiya olunduğundan onu dəyişdirmək mümkün deyil.

Bəs Rusiya XİN-in delimitasiya və demarkasiya danışıqlarına rəhbərlik edən rəsmisi ləzgi təşkilatının rəhbərini niyə məhz indi qəbul edir və bildirir ki, razılaşma Dağıstana problem yarada bilər?

Belə görünür ki, Rusiya tərəfi artıq hüquqi qüvvəyə minmiş dövlətlərarası razılaşmanın həyata keçirilməsini ləngidə biləcəyinə eyham edir və bununla rəsmi Bakıya təzyiq göstərməyə çalışır.

Xəbər verdiyimiz kimi, Bakıda prezidentlər Vladimir Putin və İlham Əliyev arasında keçiriləcək danışıqlarda Azərbaycanın MDB Gömrük İttifaqına qoşulması ən kritik müzakirə mövzusu olacaq. İstisna deyil ki, Rusiya bu məsələdə güzəştə nail olmaq üçün “ləzgi kartı”ından istifadəyə eyham vurur.

Lakin Azərbaycan tərəfinin də öz taktiki gedişləri var. Putinin səfərindən dərhal sonra Bakıda Türkdilli Ölkələrin Əməkdaşlıq Şurasının toplantısı keçiriləcək. Bu toplantıda türkdilli ölkələr arasında Gömrük İttifaqının yaradılması məsələsi müzakirəyə çıxarılacaq. Məlumatı jurnalistlərə bu günlərdə TürkPA-nın rəhbəri Ramil Həsənov vermişdi.

Yada salaq ki, türkdilli ölkələrin Gömrük İttifaqının yaradılması ideyası hələ 2010-cu ildən gündəmə gəlib. Bakı sammitində məsələ yüksək səviyyədə ilk dəfə müzakirəyə çıxarılacaq. Beləliklə, Rusiyanın Azərbaycanı MDB Gömrük İttifaqına çəkmək cəhdlərinə qarşı Bakının əlində mühüm “kozır” yaranır. Azərbaycan tərəfi nümayiş etdirir ki, MDB Gömrük İttifaqına qarşı alternativ azad ticarət zonası variantına malikdir və bunlardan hansının daha cəlbedici olduğunu araşdırmaq lazımdır. Beləliklə də rəsmi Bakı Putinin Avrasiya İttifaqı ideyasının əsasını təşkil edəcək birliyə qoşulmaq üçün vaxt uda bilər. Baxmayaraq ki, türkdilli ölkələrin Gömrük İttifaqı ideyası hələ real hesab edilmir. Ən azından belə ölkələrdən Qazaxıstan MDB Gömrük İttifaqını quranlardan biridir.