Rusiya prezidenti Vladimir Putinin Bakıya bu ilin avqust ayında baş tutmuş səfəri ərəfəsində Azərbaycan hüquq-mühafizə orqanlarının həbs etdiyi dörd ləzgi separatçısından sonuncusu da azadlığa buraxılıb.
Bu barədə Rusiya Federal Ləzgi Milli-Mədəni Muxtariyyətinin rəhbəri, Rusiya prezidenti yanında Millətlərarası Münasibətlər Şurasının üzvü Arif Kərimovun bəyanatında bildirilir.

Məlum olur ki, saxlanılanlardan Azərbaycan vətəndaşı, milliyyətcə ləzği olan Eldar Məmmədov dekabrın 16-da axşam məhkəmə zalında azadlığa buraxılıb. Həmin şəxs A.Kərimovun qohumudur.

Xatırladaq ki, cəmi bir neçə ay əvvələ qədər - Kremlin Azərbaycanda hakimiyyət dəyişikliyinə dair planlarının müzakirə olunduğu bir vaxtda Federal Ləzgi Milli-Mədəni Muxtariyyəti, bu təşkilatın rəhbəri Bakıya qarşı sərt təbliğat aparmaqla və etnik separatçılığı qızışdırmaqla məşğul idi.

Əslən Oğuz rayonundan olan A.Kərimov Azərbaycanda ləzgilərin və avarların hüquqlarının tapdalandığı barədə təbliğat apararaq ölkəmizə qarşı açıq-aşkar düşmənçilik hərəkətləri edir, o cümlədən hakimiyyətin ünvanına kəskin ittihamlar yağdırırdı.

Bu işdə A.Kərimova Rusiya Dövlət Dumasının bəzi deputatları da kömək edirdi. Sözügedən təşkilatın saytında hər gün Azərbaycana qarşı çağırışlar, çıxışlar yer alırdı.

Belə bir vaxtda Azərbaycan hüquq-mühafizə orqanları ikisi A.Kərimovun yaxın qohumu olmaqla dörd nəfəri həbs etmişdi. Bunlardan üçü - Cavid Babayev, Tariyel Sərkarov (Federal Ləzgi Milli-Mədəni Muxtariyyətinin rəhbərlərindən biri olan Amil Sərkarovun qohumudur-red.) və Ayaz Azaxov Rusiya vətəndaşları, dördüncüsü Eldar Məmmədov isə A.Kərimovun qaynı və Azərbaycan vətəndaşıdır.

Sözügedən təşkilat bu həbslərlə bağlı Rusiyada geniş təbliğata başladı. Prezident Vladimir Putinin iştirak etdiyi toplantıda Azərbaycanda Rusiya vətəndaşlarının həbsi məsələsi qaldırıldı, Rusiya XİN işə qarışdı, Moskvada mətbuat konfransı keçirildi və s. addımlar atıldı.

Nəhayət, Azərbaycanda seçkilərin başa çatmasından sonra saxlanılan Rusiya vətəndaşları ölkəni tərk etməmək şərti ilə buraxıldı. A.Kərimovun bəyanatından məlum olur ki, E.Məmmədovun azad olunmasından sonra həmin üç nəfər dekabrın 17-də Azərbaycanı tərk edib və Rusiyaya gediblər.

A.Kərimov “Nəhayət, ədalət zəfər çaldı” adlı bəyanatında həmin şəxslərin azad olunması üçün kampaniyaya dəstək verənlərə, o cümlədən Rusiya Prezidentinin Administrasiyasındakı və XİN-dəki məsul şəxslərə, Azərbaycanın Ruiyadakı səfiri Polad Bülbüloğluna, jurnalistlərə, ictimaiyyət nümayəndələrinə təşəkkür edir.

Bəyanatda bildirilir ki, səfir yüksək insani keyfiyyətlər nümayiş etdirib, məsələnin mahiyyətini öyrənib və problemin həlli yolunu tapıb. Sonda isə A.Kərimov, yəni cəmi bir neçə ay əvvələ qədər Azərbaycana və onun hakimiyyətinə qarşı təbliğat aparan, bəyanatlar verən, separatçılığı qızışdıran şəxs prezident İlham Əliyevə təşəkkür edir.



Onu bəyanatında deyilir: “Əlbəttə, biz bir dəqiqə də olsun şübhə etmirdik ki, bu işin yekun həlli ölkə konstitusiyasının qarantı kimi Azərbaycan prezidenti İlham Əliyevin əlindədir. Biz bütün ailəmiz bu işin ədalətli şəkildə həllinə görə ona öz minnətdarlığımızı və təşəkkürlərimizi bildiririk. Federal Ləzgi Milli-Mədəni Muxtariyyətinin rəhbərliyi adından qardaş Azərbaycan xalqına dərin hörmətimizi ifadə edirik”.

Ümumən bu təşkilatın antiazərbaycan fəaliyyətinin son vaxtlar dayandığı müşahidə olunurdu.

...Bax, belə. Bu yerdə “Daşdəmir və yumşalma” arasındakı bağlılıq barədə məşhur Azərbaycan atalar misalını yada salmaq lazım gəlir...