Məlum olduğu kimi Rusiya prezidenti Vladimir Putin avqustun 13-də Azərbaycana gəlib. Uzun fasilədən sonra V.Putinin böyük nümayəndə heyətinin müşayiəti ilə baş tutan bu səfəri təbii ki, Bakıda birmənalı qarşılanmayıb.
Belə ki, Rusiyanın və onun rəhbərliyinin Azərbaycanla bağlı siyasətini, xüsusilə də Qarabağla mövqeyini daim sərt tənqidə məruz qoyan bir sıra partiyalar Putinin budəfəki səfərinə dözümlü münasibət bəsləyiblər.

Bütöv Azərbaycan Xalq Cəbhəsi Partiyasının (BAXCP) sədr müavini Elçin Mirzəbəyli partiyasının mövqeyini Avropa.info-ya açıqlayaraq bildirib ki, Rusiya prezidentinin bu səfəri ölkələrimiz arasındakı münasibətlərin daha da yaxşılaşmasına xidmət edəcək. “Ümid edirəm ki, səfərin yekununda imzalanacaq sənədlər ölkələrimiz arasılndakı gələcək əməkdaşlığın yüksələn xətlə inkişafına öz töfhfəsinin verəcək”-E.Mirzəbəyli qeyd edib.

YAP-çı millət vəkili Aydın Mirzəzadə bu səfəri iki ölkə arasındakı münasibətlərin göstəricisi hesab edir. Onun fikrincə, hər iki ölkənin bir çox regional və beynəlxalq məsələlərdə mövqelələri üst-üstə düşür və bu məsələlərdə onların bir-birini dəstəkləməyə ciddi ehtiyacları var.

Səfər zamanı əsas müzakirə mövzularından biri kimi Qarabağ münaqişəsinin olduğunu deyən A.Mirzəzadənin fikrincə, Dağlıq Qarabağ konflikti Azərbaycanın ərazi bütövlüyü çərçivəsində həlli vacibdir. Çünki bu Rusiyanın regionda güc mərkəzi olaraq Cənubi Qafqazda sülhün yaradılmasına xidmət edəcək amilin göstəricisidir: “Əgər bu problem həll olunmazsa, Ermənistanın düşdüyü böhran vəziyyəti dərinləşə və Rusiyanın regiondakı nüfuzuna xələl gətirə bilər”.

Ana Vətən Partiyasının funksioneri, millət vəkili Zahid Oruc da Putinin bu səfərinin Azərbaycanın siyasi həyatında müəyyən dəyişikliklər yaradacağına inanır: “Səfər zamanı imzalanan sənədlər bir daha sübut edir ki, ortada iki ölkə arasındakı münasibətlərini strateji əməkdaşlıq səviyyəsinə nəqaldırmaq niyyəti var. Bu iki ölkə arasında ortaq məxrəclərə gəlmənin göstəricisidir. Putinin Bakıya səfəri Ermənistnı çox narahat edir”. Z.Oruc hesab edir ki, Putinin bu səfərinin baş tutması Rusiyanın Qafqazda itirillmiş mövqelərini bərpa etmək idisə, digər tərəfdən də,İlham Əliyevin lider kimi uğuru sayılmalıdır.

Vətəndaş və İnkişaf Partiyasının (VİP) sədri, prezidentliyə namizəd Əli Əliyevsə Rusiya prezidentinin Bakıya hərbi dəniz qüvvələrinin müşayiəti ilə gəlişinə sərt etirazını bildirib. Onun pariyasının yaydığı bəyanatda deyilir ki, Putinin Azərbaycana hərbi dəniz qüvvələrinin müşayiəti ilə gəlməsi Kremlin imperiya ambisiyalarının növbəti təzahürü kimi qiymətləndirilməlidir.

AXCP sədrinin müavinin Razi Nurullayevin də Putinin ölkəmizə sözügedən səfəri ilə bağlı maraqlı mülahizələri var. Sədr müavininin iddiasına görə, Rüstəm İbrahimbəyovun müxalifəıtin vahid namizədi olması Rusiyanın Azərbaycana diqtəsinin reallaşmasında müstəsna rolu oldu. Onun firkincə, R.İbrahimbəyovun müxalifətin vahid namizədi olması Azərbaycanın manevr imkanlarını məhdudlaşdırmaqla yanaşı, mövqelərini də zəiflətdi: “R.İbrahimbəyovun namizədliyindən istifadə edən Rusiya Azərbaycana təzyiq edərək öz təkliflərini Azərbaycan hakimiyyəti ilə razılaşdırmağa vadar etdi. Əgər İbrahimbəyov kartı olmasaydı ola bilsin ki, Putinin Azərbaycana bu səviyyəli səfəri reallaşa bilməzdi. Bu səfər bir daha sübut edir ki, iki ölkə arasında ikitərəfli və çoxtərəli məslələrdə artıq razılıq əldə olununb. Səfərin nəticəsi olaraq yəqin ki, Rusiya Şahdənizdə, TANAP və TAP-da öz iştirakçılıq payını alacaq”.