Cəmil Həsənli: “İqtidar mətbuatının reytinqi kütlə arasında çox aşağıdır”
“MSK-da sənədlərim artıq qəbul oldu. Mən əvvəl seçkilərdə iştirak etmək istəmirdim, amma indi vaxt daralıb, ona görə razı oldum. Həm də müxalifət və müxalif düşüncəli elektorat Milli Şuranın sessiyasında ziyalı namizədin üzərində dayanmağı qərara aldı. Milli Şuranın mənim namizədliyimi irəli sürməsi siyasi status, amma yaradılan təşəbbüs qrupunun mənim namizədliyimi verməsi hüquqi status daşıyır”, - bu sözləri professor Cəmil Həsənli ANS PRESS-ə açıqlamasında bildirib.
Cəmil Həsənli iqtidarın verdiyi açıqlamalara münasibət bildirərək dedi ki, müxalifət partiyaları Milli Şurada rahatlıqla bir araya gəlib, öz namizədlərini seçə bilirlər. “ MSK-ya namizədliyi gec təqdim etmək Milli Şuranın işində mənfi hal kimi qiymətləndirilməməlidir. Seçkilərdə 21 günlük təbliğat kampaniyası namizədlər üçün çox məhduddur. İndi qocalar 100 manat, 80 manat pensiya alırlar. Xalqla hökumət arasında təmas sıx olmalıdır.”

Cəmil Həsənli bildirdi ki, Rüstəm İbrahimbəyov vahid namizəd olaraq qalır: “O, sonuncu günə qədər vətəndaşlıq problemini həll eləyə bilsə, Milli Şuranın vahid namizədi kimi seçkilərdə iştirak edəcək. Onda mən namizədliyimi MSK-dan geri götürəcəm. Milli Şura Rüstəm bəyin ideyasıdır”.

“10 illər boyu iqtidar müxalifətlə mübarizə aparır. Avtoritar rejimlərdə demokratiyaya münasibətin yaxşı təzahür forması var. Onlar deyirlər ki, Azərbaycanda demokratiya hökm sürəcək. Hökm ilə demokratiya ola bilməz”,– deyə Cəmil müəllim bildirdi.

Milli Şuranın sessiyasında namizəd kimi seçilib, çıxış etdikdə Cəmil Həsənlinin simasında sevinc dolu hisslər görünmürdü. Buna münasibət bildirərək dedi: “Mən bilirəm ki, ağır bir yükün altına girmişəm. Elmlə məşğul olmaq mənə daha rahatdır. Amma eyni zamanda xalqımızın taleyini düşünməliyik. Xalqın seçim hüququnu alanlara qarşı müqavimət hissi formalaşdırmalıyıq. İndi 21-ci əsrdir. Azərbaycan tarixə 1918-ci ildə demokratiya nümunəsi vermiş ölkədir. Ona görə də antidemokratik tədbirlərə qarşı mübarizə aparmalıyıq”.

Cəmil Həsənli bildiribki, YAP-ın mövqeləri zəifdir: “İqtidar mətbuatının reytinqi kütlə arasında çox aşağıdır”. “Mənim əsas prinsiplərim Azərbaycanda demokratiyanın tərəqqisini təşkil etmək və ədalətli iqtisadi inkişaf yaratmaqdır”,- deyə o seçki platformasından bir-iki kəlmə də açıqlayıb.