Cəmil Həsənlinin namizədliyi qeydə alındı; Milli Şuranın vahid namizədinin qeydə alınmasını istəyənlər və buna qarşı olanların öz arqumentləri olub ; PA YAP-ın mövqeyinə dəstək verib, son qərar isə prezidentindir...
Hakimiyyət Milli Şuranın vahid namizədi ilə bağlı nəhayət ki, qərar verdi və sentyabrın 12-də 40291 imza etibarlı hesab olunaraq Cəmil Həsənlinin namizədliyini rəsmən qeydə aldılar. Mərkəzi Seçki Komissiyası Prezident Administrasiyasından asılı qurum olduğu üçün qərarı da oradan gözləyirdilər və Milli Şura namizədinə “yaşıl işıq” yandırılan kimi onlar da C. Həsənlinin namizədliyini rəsmiləşdirdilər. Qeyd edək ki, sentyabrın 12-dək MSK 7 nəfərin namizədliyini rəsmən qeydə almışdı.
Milli Şuranın vahid namizədi Cəmil Həsənli, REAL hərəkatının lideri İlqar Məmmədov, ADP sədri Sərdar Cəlaloğlu, Ədalət Partiyasının sədri, deputat İlyas İsmayılovun namizədlik məsələsinə isə baxılmamışdı.
Qeyd edək ki, C.Həsənlinin prezidentliyə namizəd kimi qeydə alınıb-alınmaması ətrafında ciddi müzakirələr gedib. Dünənədək qeydə alınanların heç biri YAP namizədinə real rəqib deyildi və hətta bəziləri illərdi indi guya müxaliflik etdikləri prezidentin siyasi kursunu təbliğ ediblər. Bu mənzərəni Qərb ölkələrin Bakıdakı səfirlikləri və beynəlxalq təşkilatlar da yaxşı bilirdi.
Hələ ki, qeydə alınmayanlar sırasında yeganə müxalifət isə hazırda həbsdə olan REAL sədri İlqar Məmmədovdur. Həbsdə olan İ.Məmmədovu qeydə almaqla hakimiyyət özünə ciddi problem yaratmış olar. Çünki adı seçki bülleteninə yazılan prezidentliyə namizədin həbsdə olması ciddi rezonans doğuracaq və hakimiyyətin seçkini qeyri-bərabər şəraitdə apardığına tutarlı sübut olacaq. İstisna deyil ki, namizədliyinin qeydə alınmayacağı təqdirdə İ.Məmmədov tərəfdarlarını C.Həsənlini dəstəkləməyə çağıra və ya boykot qərarı verə bilər.
Aldığımız məlumata görə, hakimiyyət daxilində C.Həsənli ilə bağlı iki bir-birinə zidd mövqe olub. YAP birmənalı Milli Şuranın namizədinin qeydə alınmasına qarşı çıxıb. Təsadüfi deyil ki, az qala hər gün açıqlama verən partiya funksionerləri bu qurumun tam dağıldığı və seçici arasında nüfuzunun olmadığı barədə rəy yaradırlar. Prezident Administrasiyası da Milli Şuranın namizədinin qeydə alınacağı təqdirdə sakit seçki prosesinin nəzarətdən çıxa biləcəyini, hakimiyyətə real alternativ namizədin dərhal diqqəti cəlb edəcəyini proqnozlaşdıraraq, YAP-ın rəyinə dəstək veriblər. Bu rəyi bölüşənlər Milli Şuranın seçkidən kənar saxlamasının daha faydalı olacağını iddia ediblər. Onların arqumenti belə olub ki, C.Həsənli mümkün saxtalaşdırma ilə keçiriləcək seçkidə də kifayət qədər səs qazanacaq. Üstəlik, seçkidən sonra müxalifət nəticələri tanımayacaq və seçkinin total saxtalaşdırıldığını iddia edərək, ciddi bir proses başladacaq. Bu arqumentlərə söykənənlər Milli Şura namizədini qeydə almamaqla seçkinin daha rahat keçirmək və iqtidarın seçki sonrası “xoşagəlməz” hadisələrdən sığortalanacağını iddia ediblər. Fikir verin, YAP Milli Şuranın prezidentliyə namizədi qeydə alınan kimi onun Seçki Məcəlləsini kobud şəkildə pozması ilə bağlı “faktlar” açıqladı.
YAP icra katibinin müavini, deputat Siyavuş Novruzov APA-ya açıqlamasında deyib ki, təbliğat-təşviqat kampaniyası başlamamışdan qəzetlərdə, saytlarda Milli Şuranın namizədinin reklamı, kampaniyası ilə məşğul olmağa başlayıblar. “Hansı ki, bu, Seçki Məcəlləsi ilə qadağan olunub”, deyə, YAP funksioneri bildirib. S. Novruzov qeyd edib ki, YAP bu faktlarla bağlı Mərkəzi Seçki Komissiyasına rəsmi müraciət ünvanlayacaq: “Qoy, MSK-da bu məsələyə baxılsın və xəbərdarlıq olunsun. Qanunvericiliyə hamı əməl etməlidir. Lakin bu gün müxalifət partiyaları, qəzetləri, onların namizədləri, Milli Şuraya toplaşanlar qanunvericiliyi olduqca kobud şəkildə pozurlar”.
İqtidardakı qərar verən çox az bir qrup isə “Milli Şuranı seçkidə bitirməyin” tərəfdarı olub. Bu qrup əsasən, Qərb dövlətləri ilə fəal işləyənlər, beynəlxalq təşkilatlarda təmsil olunanlar və xaricdə Azərbaycanın lobbi işini aparanlardan ibarətdir. Onlar da prezidenti inandırmağa çalışıblar ki, əslində real müxalifətsiz keçiriləcək seçkinin nəticələrini beynəlxalq aləmə həzm etdirmək daha çətin olacaq. İkinci bir tərəfdən, real şərtlər və müxalifətin hazırkı durumu hakimiyyətin daha riskli qərar verməsinə imkanlar açır. Milli Şuranın ilk mitinqinin gözlənilən kimi izdihamlı alınmamasına, son günlər isə qurumun daxilindəki partiyalar arasındakı ciddi qarşıdurmalara da diqqət verənlər C.Həsənlinin qeydiyyatının hakimiyyət üçün “iki qat uduşlu olacağını” iddia ediblər. Milli Şuranın vahid namizədinin qeydə alınmasını istəyənlərin daha bir mühüm arqumenti C.Həsənlinin personasına olan diqqət olub. Milli Şuranın onunla bağlı qərarı bilindikdən sonra Bakıdakı Qərb diplomatik korpusunun onu tanışlıq yeməyinə dəvəti, Londona hazırda da davam edən səfəri və ABŞ səfiri ilə görüşlərini də nəzərə almağı təklif ediblər.
Prezidentin tərəflərin hansının arqumentlərinə ağırlıq və dəyər verdiyi MSK-nın C.Həsənlinin qeydiyyatı ilə bağlı son qərarı elan edilməsi ilə bilindi...