ASC sədri həbs olunan jurnalist dostu vasitəsilə iri məmurlar haqda mətbuata informasiya sızdırıb?
“Gündəm-xəbər” qəzetinin redaksiyasına nəqliyyat nazirinin müavini, “Azəryolservis” ASC-nin prezidenti Cavid Qurbanov haqda ilginc məlumatlar dərc olunub. Həmin informasiyalarda vurğulanır ki, artıq bəzi məmurlar Cavid Qurbanovu bir cıra ciddi ittihamlara məruz qoyublar və bu səbəbdən də indi ASC sədri çətin suallara cavab vermək zorunda qalıb.
Belə ki, son günlər «Azəryolservis» ASC-nin prezidenti, millət vəkili Cavid Qurbanovla bağlı müəmmalı xəbərlər yayılmaqdadır. Bildirək ki, 17 sentyabr tarixində Milli Təhlükəsizlik Nazirliyi tərəfindən həbs edilən «Bizim Yol» qəzetinin əməkdaşı, «moderator.az»xəbər portalının direktoru Pərviz Həşimli ilə bağlı məsələdə də Cavid Qurbanovun adı hallandırıldı və bildirildi ki, hətta Pərviz Həşimli həbs olunarkən ona yaxın şəxslər Cavid Qurbanova zəng də ediblər. Bu isə təsadüfi sayılmamalıdır.
Bununla bağlı qəzetimizə danışan mənbə iddia edir ki, hazırda həbsdə olan jurnalist Pərviz Həşimli Cavid Qurbanovun mətbuatdakı 1 nömrəli adamı olub və bu günə qədər ASC sədri bir çox məmurları məhz onun əliylə mətbuatda “vurub”. Pərviz Həşimlinin həbsindən sonra isə vaxtilə bu ikilinin təhdidlərilə üz-üzə qalan məmurlar Cavid Qurbanovdan şikayətçi olublar. Hazırda həmin şikayətlərin araşdırıldığını iddia edən mənbəmizin sözlərinə görə, b sitiuasiya Cavid Qurbanovu çox çıxılmaz duruma salıb. İndi ASC sədri ondan narahatdır ki, əleyhinə başlayan bu anti-kampaniya bir qədər də genişlənə bilər.
Mənbəmizin sözlərinə görə, onun bu əndişəsi isə heç də əsassız deyil. Belə ki, artıq bəzi dairələr bu məsələnin üzərində ciddi şəkildə işləyir və bunu Cavid Qurbanovun əleyhinə çox böyük kompromat kimi ictimailəşdirməyə cəhd edirlər. Onlar belə bir rəy formalaşdırmağa çalışırlar ki, Cavid Qurbanov indiyə qədər hakimiyyətin iri ranqlı məmurları barəsində mətbuata informasiyalar sızdırırmış. Mənbəmizin sözlərinə görə, elə bu səbəbdən də Cavid Qurbanov Pərviz Həşimlinin həbsindən sonra onun azadlığa buraxılması yönündə hansısa aktivlik sərgiləməyib.

Redaksiyamıza daxil olan məlumatlardan aydın olur ki, bu hadisə Cavid Qurbanovun iqtidar içindəki mövqelərinə çox ciddi zərbə vurub. Artıq bu iş səbəbilə Cavid Qurbanovun sorğu-suala çəkildiyini iddia edən mənbənin sözlərinə görə, bu hadisə ASC prezidentinin karyerasının üstündən birdəfəlik xətt çəkib: «Cavid Qurbanovla yanaşı, onun polis rəisi işləyən qardaşının da durumu ağırdır. Ola bilsin ki, yaxın günlərdə məhz qardaşı vəzifəsindən alınsın.

Hələlik bütün bunlar hadisələrin inkişaf axarından asılıdır. Çünki Cavid Qurbanov neçə gündür müdafiə olunmağa çalışır. Amma onun əleyhinə faktların toplanışı da davam edir».
Xatırladaq ki, hakim düşərgədəki bir çox məmurlar Cavid Qurbanovla çoxdandır ki, haqq-hesab çəkməyə çalışırdılar və buna dəfələrlə cəhdlər də göstəriblər. Nəqliyyat naziri Ziya Məmmədovun da öz müavini əleyhinə olan qruplaşmada yer aldığı iddia olunur. Məlumatda bildirilir ki, yol tikintisinin və təmirinin ASC sədri tərəfindən monopoliyaya alınmasıyla barışmayan Ziya Məmmədov indi əlinə düşən bu fürsəti heç cür fövtə vermək niyyətində deyil. Cavid Qurbanovun isə bu işin içindən necə çıxacağı olduqca maraqlıdır.
Şahin