Nəqliyyat nazirinin prezidentə qarşı hansı yanlışı olub?

gundemxeber.az Ərəb ölkələrində baş verən inqilablardan sonra Azərbaycan mətbuatında ayrı-ayrı korrupsioner məmurların vəzifədən alınacağı haqda çoxsaylı informasiyalar səslənsə də, bu sahədə demək olar ki, heç bir addım atılmadı. Şübhəsiz, bu da cəmiyyətdə prezident İlham Əliyevin hakimiyyətdə hansısa islahatlara başlayacağı ilə bağlı inamı tamamilə öldürdü. Doğrudur, hələ də bəzi qəzetlər hansısa məmurun “yaxın vaxtlarda” alınacağı qənaətindədir. Ancaq indi bu informasiyalar daha çox bu və ya digər jurnalistin fantaziyasının məhsulu kimi oxucunun diqqətini cəlb edir. Çünki movcud hakimiyyət birmənalı olaraq islahatlar aparmaqda maraqlı deyil. İndi ictimaiyyətdə də hər kəsə bəllidir ki, bu günə qədər hansısa yüksək rütbəli məmurun vəzifədən alınması yalnız daxili maraqlar və çəkişmələr çərçivəsində baş tutub. Yəni bu zaman hansısa islahat xarakterli addımların atılması nəzərdə tutulmayıb.
Amma son günlər hakimiyyətdaxıli konfliktlərin kəskinləşməsi və qrupların həlledici döyüşə başlaması islahatlar məsələsini yenidən gündəmə gətirib. Bu günlərdə qəzetimizə daxil olan məlumat əsasında deyə bilərik ki, tezliklə daha bir nüfuzlu məmur iqtidardaxili çəkişmənin qurbanı ola bilər. Bizə bu haqda məlumat verən mənbənin sözlərinə görə, prezident İ.Əliyevin “qara siyahı”sında olan sözügedən məmur nəqliyyat naziri Ziya Məmmədovdur. Mənbə iddia edir ki, Z.Məmmədovun ölkə başçısına qarşı bağışlanmaz bir yanlışı onu bitirmək üzrədir: “Son vaxtlara qədər hakimiyyət daxilində də çoxlarına elə gəlirdi ki, nəqliyyat naziri Ziya Məmmədov cənab prezidentin ən yaxın adamlarından biridir. Xüsusən də, kimsə onun nə vaxtsa İlham Əliyevin maraqlarına zidd hansısa addım atacağını güman etməzdi. Lakin bu yaxınlarda bəlli oldu ki, heç də belə deyil və Ziya Məmmədov prezident üçün çox təhlükəli bir fiqura çevrilib”.
Mənbənin sözlərinə görə, hakimiyyətdə heç bir ciddi islahatlar aparılmaması üçün son vaxtlar iqtidar daxilində bəzi qruplar İ.Əliyevə “əzələ” nümayiş etdirirlər ki, onların arasında məhz Z.Məmmədov da var: “Bu haqda dəfələrlə mətbuatda da yazılıb ki, Rusiyameylli qruplaşma cənab prezidentin qərarlarına tabe olmaq istəmir. İndinin özündə də onlar ciddi müqavimət göstərirlər. Çox təəssüf olsun ki, Ziya Məmmədov da son günlər onlara dəstək verərək, islahatlara qarşı birmənalı dirəniş göstərir”.
Məlumata görə, nəqliyyat nazirinin bu addımı İ.Əliyevi qəzəbləndirib və bu səbəbdən yaxında istefaya göndəriləcək məmurlar siyahısında onun adı ilk yerlərdədir. Hətta onun yerinə təyin olunacaq şəxsin adı da bəllidir: “Məndə olan məlumata görə, cənab prezident bu vəzifəyə elə Ziya Məmmədovun müavinlərindən birini təyin eymək istəyir. Əlbəttə, bu şəxs Cavid Qurbanov ola bilməz, çünki onun adı bir çox qalmaqallarda hallanır. O cümlədən C.Qurbanov da zaman-zaman prezidentin maraqlarına zidd addımlar atmaqdadır. Bu baxımdan, çox güman ki, ölkə başçısı bu posta heç bir çirkli əməldə adı hallanmayan Musa Pənahovu təyin edəcək…”.

Tahir