«Vahid namizəd deyil, vahid mübarizə həyata keçirilməlidir» mesajının ardınca İctimai Palata da vahid namizəd müzakirələrini dayandırdı

gundemxeber.az Son günlər aktiv müzakirə predmetinə çevrilmiş müxalifətin vahid namizədi ilə bağlı İP daxilində müəyyən fikirlər mövcuddur. Bu istiqamətdə aparılan müzakirələrdə xeyli təkliflər var və onların arasında vahid namizədin müəyyən edilməsi üçün praymeriz məsələsi də gündəmdədir. Lakin müxalifət daxilində aparılan bu müzakirələrə Qərbin baxışları tamam fərqlidir. Etibarlı mənbələrdən daxil olan məlumatlarda iddia olunur ki, Qərbin siyasi dairələri Azərbaycan müxalifətində vahid namizədin müəyyənləşdirilməsinə heç də isti yanaşmır. Belə ki, mövcud siyasi vəziyyəti təhlil edən Qərb hesab edir ki, indiki məqamda vahid namizədlə deyil, vahid mübarizə üsulu ilə seçkilərə hazırlaşmaq lazımdır.
Mənbənin sözlərinə görə, Qərb dairələri indiki məqamda mövcud hakimiyyətə qalib gəlməyin yolunu birgə mübarizədə görür. Onların yanaşmasına görə, müxalifət hətta vahid namizədlə seçkilərə qatılarsa belə, seçkilər saxtalaşdırılacağı təqdirdə müqavimət göstərə bilməyəcəksə, o zaman indiki addım heç bir nəticə verməyəcək. Ona görə də, faktiki durumda bütün müxalifət qüvvələrinin birləşərək əvvəlcə seçki saxtakarlığına qarşı mübarizə aparmaları, daha sonra isə vahid namizədlə çıxış etmələri tövsiyyə olunur.
Bu məlumatın ardınca İctimai Palatanın vahid namizəd müzakirələrini dayandırması xəbəri xüsusilə diqqət çəkir. Azərbaycan Xalq Cəbhəsi Partiyasının (AXCP) Ali Məclisinin sədri Həsən Kərimov “Əli Kərimli “8-lik”in növbəti görüşündə iştirak edəcəkmi” sualını cavablandırarkən deyib:“Yenidən təşkil edilən görüşlə bağlı bizə rəsmi müraciət edilməyib. Belə bir təklif olarsa, biz bunu dəyərləndirəcəyik”. O qeyd edib ki, həmin partiyalarla vahid namizəd məsələsi müzakirə edilmir: “İctimai Palatanın qərarına əsasən vahid namizəd məsələsi müzakirələrdən çıxarılıb. Seçkiyə 10 ay qalıb. Qarşıya qoyduğumuz məqsəd seçki mühitinin demokratikləşməsi, seçki məcəlləsinin dəyişdirilməsi, sərbəst toplaşma azadlığının təmin edilməsi istiqamətində bütün partiyalarla əməkdaşlıq etməkdir. Bu məsələləri həll edəndən sonra İctimai Palatada namizəd məsələsi müzakirəyə çıxarılacaq. Digər partiyalarla da bu məsələ istiqamətində danışıqlar aparacağıq. Biz İP-də olmayan partiyalarla funksional əməkdaşlıq edirik. Ona görə onların belə dəvətlərindən imtina etməyəcəyik”.
Xatırladaq ki, dekabrın 7-də paytaxtdakı “Asiman” restoranında keçirilən görüşdə ADP sədri Sərdar Cəlaloğlu, AXCP sədri Əli Kərimli, Ümid partiyasının rəhbəri İqbal Ağazadə, ALP sədri Əvəz Temirxan, VİP sədri Əli Əliyev, AMİP sədri Yusif Bağırzadə, KXCP sədri Mirmahud Mirəlioğlu və Ziyalılar Forumunun üzvü Rafiq Əliyev iştirak ediblər. Partiya sədrlərinin növbəti görüşü AMİP sədri Yusif Bağırzadə tərəfindən təşkil olunacaq. Görüşün vaxtı və məkanı hələlik dəqiq bilinmir.

Çingiz