Azər Allahverənov: “Miqrantlara qarşı etirazlar öncədən planlaşdırılan rejissor işidir”

“Rusiyada baş verən cinayət hadisələrinin 4 faizi miqrantların payına düşür. Moskvada isə miqrantlar tərəfindən törədilən cinayət hadisələrinin statistikası ümumi hadisələrin 12 faizini təşkil edir”.

Bunu virtualaz.org saytına açıqlamasında miqrasiya üzrə ekspert Azər Allahverənov deyib.

Ekspert bildirdi ki, Rusiyadakı bəzi siyasi dairələr miqrantların törətdiyi cinayət hadisələri üzərində oyun aparır: “Hadisələrin gedişatı göstərir ki, Yeqor Şerbakovun öldürülməsini Azərbaycanın əlehinə yönəltmək istəyən siyasi qüvvələr var. Miqrantlara qarşı etiraz aksiyalarının keçirilməsi əvvəlcədən planlaşdırılan rejissor işinə bənzəyir. Hadisə etnik zəmində baş verməyib. Lakin planlı şəkildə məsələni etnik müstəviyə yönəltməyə çalışırlar. Bu isə siyasi və iqtisadi maraqlardan xəbər verir”.

A.Allahverənov qeyd edib ki, cinayətin baş verdiyi ərazidə azərbaycanlıların nəzarətində olan kənd təsərrüfatı məhsulları bazası, bazar və kafelər var. Hadisələrin bu istiqamətə yönəldilməsi həmin ərazinin nəzarətə götürülməsi istəkləri ilə də bağlı ola bilər: “Azərbaycanlıların nəzarətində olan 30 bazar bağlanıb. 2015-ci ilədək daha 25-27 bazarın bağlanılacağı gözlənilir. Bu isə minlərlə soydaşımızın işsiz qalacağı ilə nəticələnəcək”.

A.Allahverənov nümayişlərin cinayətkarın cəzalandırılmasından daha çox bazarlara istiqamətləndirildiyini güman edir.

Qeyd edək ki, “Amnesty İnternational” beynəlxalq hüquq müdafiə təşkilatı oktyabrın 14-də Moskvanın Biryulyovo rayonundakı meyvə-tərəvəz bazasında 1200-dən çox miqrantların saxlanılmasını pisləyərək bu tədbirləri nümayiş xarakterli və diskriminasiyanın təzahürü adlandırıb.

“Bir nəfər ehtimal edilən qatilin tapılması üçün 1000-dən çox aidiyyəti olmayan miqrantın saxlanılması kəskin diskriminasiya xarakteri daşıyır və açıq-aydın qanunsuzdur. Bu, açıq-aydın nümayiş məqsədilə və bəraət qazandıracaq hər hansı bir səbəb olmadan edilib. Polis bu cür reaksiya verməklə sadəcə mövcud olan ksenofobiya meylərini daha da şiddətləndirir” - bunu “Amnesty İnternational” təşkilatının Rusiya üzrə təmsilçisi Denis Krivoşeyev bəyan edib.

Denis Krivoşeyevin sözlərinə görə, Rusiya hakimiyyəti ölkədə “dərinləşən irqçilik probleminin həlli ilə məşğul olmalı” və “cəmiyyətə yanlış siqnal verən” ritorikaya son qoymalıdır.

“Amnesty İnternational” Moskvada miqrantlara qarşı nifrət zəminində törədilən cinayətlərin artığını xatırladaraq qeyd edir ki, polis belə halların əksəriyyətinə göz yumur. Hüquq müdafiəçiləri həmçinin miqrantların bir çoxunun onlardan sənədlərini qanunsuz tələb edən “fəallar”ın hücumlarına məruz qaldığını da vurğulayırlar.

Təşkilat qeyd edir ki, ksenofobiya Rusiyada o qədər geniş yayılıb ki, hətta sentyabrda keçirilmiş mer seçkilərində belə antimiqrant siyasəti həm iqtidaryönümlü Sergey Sobyaninin, həm də müxalifətçi Aleksey Navalnının seçki kampaniyasının əsasını təşkil edib.

Qeyd edək ki, Biryulyovda miqrantların kütləvi şəkildə saxlanılması bu rayonda 25 yaşlı Yeqor Şerbakovun qətlinin səbəb olduğu iğtişaşlardan bir gün sonra həyata keçirilib. Qətli törətməkdə şübhəli bilinən Azərbaycan vətəndaşı Orxan Zeynalov saxlanılıb.