“2014-cü ildə miqrantların Rusiyadan çıxarılması sürətlənəcək”
Natiq Miri: “Bu proses çox eybəcər şəkildə aparılır...”
Ötən ay Moskvada baş verən qətl hadisəsindən - Şerbakov soyadlı gəncin öldürülməsindən sonra Rusiyada miqrantlara, xüsusən də azərbaycanlılara qarşı hücumlar müəyyən qədər səngiyib. Ancaq hücumlar dayansa da, hökumət miqrantları Moskvadan çıxarmaqda davam edir. Ötən həftənin cümə günü Biryulevo rayonunda miqrasiya qanununun müxtəlif cür pozulmasına görə saxlanan 200 miqrant Rusiyadan çıxarılıb.



Ötən ay Biryulevo rayonunda yerli sakin Yeqor Şerbakovun qətlindən sonra baş verən kütləvi iğtişaşlar zamanı 400 nəfər saxlanmışdı. Ancaq ehtimal olunur ki, bu rəqəm daha da artacaq, çünki tərəvəz bazasında tutulmuş qeyri-leqal miqrantların ölkədən çıxarılması davam edir. Bunların sayı isə xeyli çoxdur.



Moskvada ticarətlə məşğul olan həmyerlimiz Pərvin Mehdizadə ötən ay qeydə alınan gərginliyin müəyyən qədər səngidiyini deyir. Onun sözlərinə görə, sakitlik yaransa da, miqrantların əsas iş yerləri olan bazarların bağlanması prosesi davam edir: “Hazırda vəziyyət pis deyil, hamı hələ ki öz işlərindədir, bazarlar işləyir. Sadəcə deportasiyalar davam edir. Amma gəzən söhbətlərə görə, bazarların çoxunu bağlamaq planı var. Bu isə azərbaycanlıları narahat edir. Yerli hökumət bazarları bağlayıb ticarət mərkəzləri tikmək istəyir”.

P.Mehdizadə deyir ki, ümumiyyətlə son bir ayda baş verənlər, xüsusən də terrorçu-intiharçının partlayış törətməsindən sonra dindarlara münasibət bir qədər də pisləşib. Ancaq metroda və ictimai nəqliyyatda gərginlik müəyyən qədər azalıb. P.Mehdizadə deyir ki, Aşura mərasimləri zamanı heç bir insident qeydə alınmayıb: “Hər il Aşura zamanı məscidlərin ətrafında ciddi təhlükəsizlik tədbirləri olurdu. Amma bu il ciddi maneçilik olmadı, məscid ətrafında təhlükəsizlik tədbirləri həyata keçirilsə də, mərasimlərə maneələr olmadı”.

Siyasi şərhçi Natiq Mirinin fikrincə, miqrantların Moskvadan çıxarılması prosesi hazırkı Rusiya hökumətinin siyasi qərarıdır və bu proses davam edəcək: “Rusiyada miqrant problemi mövsüm, yaxud hansısa yaxın məqsədli siyasi xarakter daşımır. Bu bir dövlət siyasətidir və bu ilin əvvəlindən hökumət səviyyəsində ciddi müzakirə predmetinə çevrilib. Bu problem artıq Rusiyada o qədər eybəcər hala gəlib ki, dövlət bu müşkülün əlində aciz kimi görünür”.



N.Miri deyir ki, hazırda Rusiya hökumətində miqrantlar mövzusunda iki fikir mövcuddur. Birinci, Rusiyanı tamamilə miqrantlardan təmizləmək, digəri isə sadəcə müəyyən filtrasiya yolu ilə kriminal elementlərdən təmizləmək. N.Miri bu prosesin başlandığını deyir: “Hələlik görünən odur ki, Rusiya bu prosesi çox eybəcər şəkildə aparır. O qədər eybəcər ki, bu prosesin nəticəsində Rusiyanın strateji planı olan Gömrük və Avrasiya İttifaqı projesinə çox ciddi zərbələr vuruldu. Nəticədə bu siyasi projelərin bütün cəlbediciliyi köpük kimi əridi və mərkəzdənqaçma prosesinə rəvac verdi”.

N.Mirinin fikrincə, məhz bu prosesin nəticəsində Ukrayna, Moldova kimi ölkələr Avropaya inteqrasiyadan yana qərar veriblər. Eyni zamanda Azərbaycan kimi ölkələr də son anda ən azından qərar verməmiş iki dəfə düşünməli oldular. N.Miri bildirib ki, proseslərin bu şəkildə aparılması Rusiyanın siyasətinə təsir edib: “Hesab edirəm ki, Azərbaycanın qərarı da heç də Rusiyanın strateji seçimindən yana olmayacaq. Ancaq hər bir halda Rusiyanın miqrasiya siyasəti davam edəcək və ölkəni kriminal və qanunsuz miqrantlardan təmizləyəcəklər. Bu proses 2014-cü ildə daha intensiv həyata keçiriləcək. Bunun sayəsində soydaşlarımızın kütləvi vətənə və digər postsovet məkanı ölkələrə, xüsusilə Ukraynaya köçü baş verəcək. Artıq bu proses gedir. Təkcə son aylarda Rusiyadan Ukraynaya 60-80 min civarında soydaşlarımız köç edib və daimi və müvəqqəti qeydiyyata düşüblər. Bu rəqəmlər artıq köçün miqyasının o qədər də kiçik olmadığını göstərir”.